Mbari e Like 21 - Obamba Kiwoyeti (mdt) NT Portions

Okuuli owuha

¹ Zezi okeesi o paani e nde, omoni anga osolo ma leehi ndamini e Ndziami ntsa anguli a mo ndzo e Ndziami.

² Nde se omoni okaasi okuuli owuha, alehi adoro a nkoso vuele ma akiehe.

³ Ŋa nde ndi: «Me eduha be sisiele, okaasi okuuli owuha yu omi vula abuha aso ompa.

⁴ Obila abuha alehi adoro a bo ma ali kaama kali. Ŋa nde ampi a nde aki na bo aso ma lebihi le nde.»

Zezi atooso etsalihi e ndzo e Ndziami

⁵ Baari ake aki ma wobo mo ndzo e Ndziami, ma aduha ndi yo na owali na akele a yo ma awali, na biibi ma ampi Ndziami. Ŋa Zezi ndi:

⁶ «E be lemono bi eso, etsuhu me edze oya, ma aka ma mono kele o yula kele ni. Ma tsala dzo eso.»

⁷ Bo apisi Zezi ndi: «E Nkumu maami maa ma dze oya o dzini ntini? Ndiimi elaha maami maa edze oka ma?»

⁸ Zezi okaali na bo ndi: «Leesa ayiba, leka nyiliha akiisi be ni! Obila baari kuna ma aya o nkuumi e me, bo aduha ndi: “Yu me Krisi!” Na “Antini ami to!” Ŋa leka luonoho bo ni.

⁹ Ntini e be ledze oyuha ma wobo ma eta, na baari ma saraha, leka monoho vuoho ni, obila ove maami ma asa aya. Ŋa ntini ekini to ni.»

¹⁰ Ŋa Zezi oluusi ndi: «Osi omo edzuana bla osi okima, nkani omo se adzuana bla nkani okima.

¹¹ Ntsie edila onyuha na mpari, ma ebiri kuna, na ndzala eva bla angaa a nkala, ma adze omono maami a luari, bla andiimi o yulu.

¹² Ŋa levusu le maami ma aso, ma kuara be, be lemono ampasi. Ma adze na be ntsa andzo ma avuonoho ma opama be. Omana alehe be ma ongeneŋe. Ma bira be o miisi ma ankani na apatima, obila o me.

¹³ Maami a be leedze omono maa, ma mpa be lengulu ma o siisa enyua o me.

¹⁴ Lelehe ntsa etima e be mbri: be leka sa baana oyeese maami a be leduha ni.

¹⁵ Obila me anku empa be mbari bla ntsimi eli abuha ma ombangu i sa ekemi ni, bo aso se i buuna obisa yo ni.

¹⁶ Na ataara a be bla anguhu se, na baana ma anguhu, na nkuono bla andihi a be, ma adze ompa be na ankani. Bo se ma adze obuma kuna o mpanihi e be.

¹⁷ Baari aso ma bele be obila o me.

¹⁸ Ŋa si lemfu lemo le ma otsui a be leka nyuoho ni.

¹⁹ Lesa nkomoho! Lya lemihi le be le edze ovusuha lebihi le be.»

Zezi atooso etsalihi e Zerizaleme

²⁰ «Ntini e be le edze omono aworo ma abuha ma ombangu, ama dzenehe Zerizaleme, be leyaa mbri ntini eya tuha ma tsala Zerizaleme.

²¹ Ŋa baari ma adze oka o Zide, ove bo adimi mpili ekuri. Baari ma adze oka ntsa onguundu, ove bo atsuuhi. Baari ma adze oka ntsa anguunu i ma nyuniha ntsa onguundu ni.

²² Obila bia ma edze oka etsuhu e mpasi. Maami ma ama teende o ntsa Osaangumu o Ndziami, ma adze oya.

²³ Etsuhu bia, ma eka etsuhu e ndoho ma akaasi ma ali na ayimi, na ma ampa baana abiele! Mpasi yo mini edze oka ma osi ki. Ŋa nkala e Ndziami edze oya o yula baari ama osi ki.

²⁴ Ma adze obuma ake ma ekuere, ma adze obira bo mbri engenehe ntsa esi eso. Ŋa baari ama esi ekema, atsala Zerizaleme, tii ngo antini a baari baa ma adze oyira.»

Edzihi e Muana mvuuru

²⁵ «Andiimi ma adze oka o ntsa tari bla ngondo na anyari. O yula ntsie, esi ma edze omono onguo bla vuoho bo mini. Obila ma lesuhu le mpari na epuhi ma okeri onini.

²⁶ Baari ma adze okua mo vuoho o ntini e bo ma tsimiha maami ma adze oya o yula ntsie. Obila, mpari e biibi ma eli o yulu eso me dze o triha.

²⁷ O ŋa ma adze omono Muana mvuuru aya o ntsa lenguri bla mpari na lekuma le nde le eso.

²⁸ Ntini e maami maa ma adze obaana oya, be letemehi, lesaari etsui, obila evusihi e be eya tuha.»

Ntsintsami oti a figie

²⁹ Ŋa Zezi oti bo ntsintsami ndi: «Lekeese oti a figie bla eti ma emo eso.

³⁰ Ntini e be lemono ntsuusi ebaana otsuuha, be leyaa mbri osibi ove oya tuha.

³¹ Ma osuumbu dzudzua, ntini e be lemono maami maa ma aya, ove be ledziabi mbri Onkani o Ndziami oya tuha.

³² Me eduha be sisiele ntini e maami maa ma adze oya, ndzubu e lobi eka adze okua eso ni.

³³ Yulu bla ntsie me edze oyira, ŋa mbari e me eka adze oyira ni.»

Leeka muo

³⁴ «Leesa ayiba! Lekaa nyiliha otima a be olemi ntsa atsinda na mali a kuna ni, si kali ma ampasi ma lebihi ni, obila tsuhu Opami edze oya be o limihi.

³⁵ Mva oyere, yo edze oka tsuhu e kruhu o baari a yula ntsie aso.

³⁶ Lekaa tsiaha tolo ni, levuono antini aso. Ŋa be lebaha okiini o maami ma adze oya aso. Mo vua be le edze obuuna oka ma etele o mua Muana mvuuru.»

³⁷ Na mui, Zezi ayisiha ntsa ndzo e Ndziami, ŋa na ekikolo nde oyeni yula okuri eti ma Eliive, lempiibi le tsiina.

³⁸ Ŋa baari aso nkara entsiere ayi ndzo e Ndziami ma oyuha nde.