Mbari e Like 20 - Obamba Kiwoyeti (mdt) NT Portions

Onkani o Zezi

¹ Tsuhu mo, Zezi aki ayisiha baari ntsa ndzo e Ndziami, nde se atooso bo Ntsia e Mve. Ankumu ma asi ma avuoŋi, bla ayisihi ma angri na ankumu ma okuha ayi.

² Bo apisi nde ndi: «Duha bisi, atumi we osa maami ma na? Ampi we onkani ma osa mo na?»

³ Zezi okaali bo ndi: «Me se ema lehe be oduhu. Lema duha me,

⁴ ateeme a Zan awuuhi na yulu si na baari?»

⁵ Ŋa bo aya ma tsimiha o mpanihi e bo ndi: «Saabe oduha mbri: “Na yulu”, nde okaala saabe ndi: “Be leka yalaha nde ni ma oma?”

⁶ Ŋa saabe oduha mbri: “Na baari”, baari aso ma adze otena saabe akele ma obuma saabe, obila bo aki ama yalaha ndi Zan owobi a mbari e Ndziami.»

⁷ Ŋa bo akaali ndi: «Bisi i yaa mpili ewi mo ni.»

⁸ Ŋa Zezi okaali bo ndi: «Me se eka duha be mvuuru ampi me onkani ma osa mo ni.»

Ntsintsami adzandzi a nguunu eti e viinye

⁹ Ŋa Zezi oya ata ntsintsami dzi na baari ndi: «Balaha mo ekuni nguunu eti e viinye, ompi na adzandzi a viinye, nde oyeni opiinga ma lebihi.

¹⁰ Ntini ma toloho mburu eto, nde otumi odzandzi omo mpili adzandzi a viinye, ndi bo ampa o nde obari o mburu e viinye. Bo abeeri nde, avuuri nde dziala onyaŋa.

¹¹ Onga nguunu ovurihi otumi odzandzi okima. Bo abeeri dzua se, bo atuhi nde, bo avuuri nde dziala onyaŋa.

¹² Nde ovurihi otumi odzandzi otari. Bo atiniŋi nde ampura se, bo atsuuri nde.

¹³ Ŋa onga nguunu e viinye ndi: “Me osa buni? Me ema tuma muana a me a dia, leke bo ma anyiima nde.”

¹⁴ Ŋa adzandzi a nguunu eti e viinye amono nde, bo aya ma wobo o mpanihi e bo ndi: “Mono onga wanda. Letsue lebuma nde, saabe le siila na wanda!”

¹⁵ Bo atusihi nde ntsa nguunu viinye, abumi nde.» Zezi opisi bo ndi: «Nga nguunu adze osa bo ŋa buni?

¹⁶ Nde adze oya, nde obuma adzandzi a nguunu eti e viinye, oyaha nguunu ompa na adzandzi akema.» Baari ayuha vua, aduhi ndi: «Kali, ka vua ni!»

¹⁷ Ŋa Zezi okeesi bo, na bo ndi: «Mbari e Ndziami ma ama ateende ndi: “Kele atui ma abisi, emi kiriha kele e kaama. Mbari dzia eduha ndi nki”?

¹⁸ Mpini mvuuru ava o yula kele dzia, okesihi. Kele dzia se ova o yula we, we kesihi.»

Lepo le Sezare

¹⁹ Ayisihi ma angri bla ankumu ma asi ma avuoŋi asahi okuara nde o ŋiŋa. Ŋa bo amoni vuoho o baari ma aki ŋa. Bo aki ama yaa ndi Zezi ata ntsintsami dzi ŋa o bo.

²⁰ Bo aya ma keese Zezi. Bo atumi baari ma kiisaha ndi bo ali tele o miisi a Ndziami, mpili e nde. Ma oyusuha dzaa e mbi etsuuha ma onyua a nde, ma ompa nde na lepatima ali na onkani bla onkumu.

²¹ Bo alehi nde oduhu yu ndi: «E Nkumu, bisi leyaa mbri we awobo yemiŋi, we se ayisiha yemiŋi. We aka pamaha reeŋe ni. We ayisiha ndzila e Ndziami bla asisiele.

²² Ŋa duha bisi yuhu bisi lebuuna owura lepo le Sezaare si kali?»

²³ Ŋa Zezi oki oma yaa ndi dzua oyere. Nde okaali na bo ndi:

²⁴ «Lelaha me doro a nkoso omo. Olia bla ampri ma awwana na?» Bo akaali ndi: «E Sezaare.»

²⁵ Zezi okaali bo ndi: «Levuura Sezaare e nde, be levuura Ndziami se e nde.»

²⁶ Bo aka buuna yuha dzaa e mbi o ntsa ewobihi e nde o miisi a baari ni. Bo akimi ekalihi e nde. Bo aya pi.

Oduhu ama enyusihi ma akui

²⁷ Asadisi ake atsiini mpili e Zezi, bo ma aka yalaha enyusihi ma akui ni. Bo alehi nde oduhu yu ndi:

²⁸ «E Nkumu, Moyize ateendi ngri dzi o bisi ndi: “Balaha oka na okari bla muarihi, nde okua baana kali, muarihi a nde abuuna oyaha okuuli, ma okula okulu a nde ama kua baana.”

²⁹ Ŋa eki na abalaha ntsaami o muo a bo. Antsomi oyahi okaasi, okui baana kali.

³⁰ Odzuele oyahi okuuli, nde se okui, baana kali.

³¹ Na otari se oyahi okuuli, okui. Ŋa bo aso a ntsaami akui, bo aka nyila baana ni.

³² Emana okaasi se okui.

³³ Ŋa tsuhu akui ma adze onyusiha nde adze oka okari a na? Nde ti aki okari a bo aso a ntsaami!»

³⁴ Zezi okaali bo ndi: «Ma antini ma, abalaha ma yaha akaasi ma abaala, ma mpa se akaasi ma abaala.

³⁵ Ŋa baari ma adze opama tele ma antini ma adze oya, bla enyusihi e ntsa leku ma aka ma yaha akari bla alumi ni.

³⁶ Bo ma aka ma buuna okua ni. Obila bo aya mva abaandzi. Bo baana a Ndziami, Ndziami ama nyuusa bo ma leku.

³⁷ Moyize ama duha nde anku ndi akui ma adze onyusuha. O ntini e nde aduhi dzaa oti ayahi mbaa, nde otsuoli Nkumu o “Ndziami Abraame, Ndziami a Izaake bla Ndziami a Zakobe.”

³⁸ Zezi oluusi ndi: Ndziami ka Ndziami akui ni, ŋa Ndziami a baari ma ali muo, obila bo aso ali muo o nde.»

³⁹ Ayisihi ma angri ake ayahi mbari ndi: «E Nkumu, we awobi ŋa yemiŋi.»

⁴⁰ Bo aka ma buuna olehe nde eduhi ekema ni.

Krisi bla Davide

⁴¹ Zezi na bo ndi: «Ma duuha ndi Krisi muana Davide ma oma?

⁴² Davide nde anku aduha ntsa osangumu o Soome ndi: “Ndziami a Nkumu ama duha na Nkumu a me ndi: Ka o ntsi o kuoho o me olumi.

⁴³ Tii ngo e me elehe abuha a we ma ombangu mva kiila o ntsina nyiili e we.”

⁴⁴ Ŋa Davide atsuolo nde o “Nkumu”, ŋa Krisi oma ka muana a nde buni?»

Zezi atiba ayisihi a mbari e Ndziami

⁴⁵ Baari aso aki ma ayuha Zezi, nde na aluoni a nde ndi:

⁴⁶ «Be lesi ayiba ma ayisihi ma angri! Bo ndzala odzieŋe na eringa ma ela ela, bo ndzala awosoho bo o mua ambuhu. Bo osuoloho ebiri ma levusu ntsa andzo ma avuonoho. Bla na ebiri ma levusu ma tsinda ma anini.

⁴⁷ Bo ma piinaha akuuli biibi e bo ma ali na dzo eso. Bo osiaha evuoni ma ela ela ndi amono bo. Opami a bo adze ovula abuha.»