Mbari e Like 2 - Obamba Kiwoyeti (mdt) NT Portions

Ekulihi e Zezi

¹ Ntini e Sezaare Ogise akihi nkumu esi e Rome, nde oti osiami ma osa onteende o baari aso ama esi e nde.

² Onteende a ntsomi dzua asi nde o ntini e Kirinise akihi lepatima o Siri.

³ Mvuuru na mvuuru oyeni onguundu ma kuli nde na asa onteende.

⁴ Zuzefe se owi Nazarete onguundu o ntsa Ngalili, ma ovuruha Betileyeme onguundu o ntsa Zide. Mpili ma kuli nkani Davide. Nde anku se aki ombisa o Davide.

⁵ Nde ayeni na asa onteende dzua bla Mariya adila oka ompala a nde, nde aki oya na yimi.

⁶ Ntini e bo ma kihi o Beteliyeme, tsuhu okula eto.

⁷ Nde okuli muana antsomi, muana a balaha. Oporihi nde mo olembe, otsuusi nde o biri mo edziaha anyama. Obila ntsa otini andzia ebiri eki kali.

Obaandzi atooso Ntsia e Mve na akieli ma endoombo

⁸ Ntsa enkese bia ekihi na akieli ma endoombo, bo ma moho na mpiibi ma okiele dziimi le bo le endoombo o ntsa anguunu.

⁹ Obaandzi a Nkumu omo owasihi na e bo. Lekuma le Nkumu ledzeniŋi bo bla oyalala. Bo amoni vuoho bo mini.

¹⁰ Obaandzi na bo ndi: «Leka mono vuoho ni, me eduha be ntsia e mve empa baari aso osuere bo mini.

¹¹ Lobi ntsa onguundu o Davide ami kula be Ovusihi nde Krisi, nde se Nkumu.

¹² Mono ndiimi e be ledze oyaa nde: be ledze omono muana ma kini ma okula, ama poroho nde ma olembe, ama tsuusa obiri edziaha anyama.»

¹³ O niŋa, abaandzi awi yulu kuna na abasaha obaandzi a ntsomi, bo ma yima aluumu a Ndziami ndi:

¹⁴ «Lekuma le Ndziami leka ma ebiri e nkara yulu, na oduusu se oka o yula ntsie o baari a nde ama dia.»

Akieli ma endoombo ma adze na Betileyeme

¹⁵ Ntini abaandzi ma nyili bo ma ovurihi na yulu, akieli ma endoombo na abuha ndi: «Ŋa letsue tii Betileyeme na amono maami ma yiri, a Nkumu ama laha saabe.»

¹⁶ Bo ayeni woowo, abasihi Mariya bla Zuzefe na muana ma kini ma okula o tolo, o biri edziaha anyama.

¹⁷ Bo ama omono nde, bo aduhi maami ma obaandzi aduhi na bo o muana dzua.

¹⁸ Baari aso ma yuhi akieli ma endoombo, akimi maami a bo ma duuhi.

¹⁹ Mariya akiele maami maa aso ntsa otsui, nde asaha osuumbu ma osa.

²⁰ Emana akieli ma endoombo avurihi. Bo ma yima lekuma bo se ma siha aluumu a Ndziami, o maami a bo ma yuhi na a bo ma moni. Mo aso ayiri ma osuumbu obaandzi atoosi bo.

Ma luha Zezi nkuumi

²¹ Emana etsuhu ntsaami, o mfuomo asi muana sasi, ampi nde nkuumi e Zezi ma osuumbu obaandzi aduhi na Mariya, nde oki kini obira yimi ni.

Ma laha Zezi na Ndziami

²² Emana ŋa, tsuhu e tsinda okuumbu eto lemihi na angri a Ndziami ampi Moyize. Mariya bla Zuzefe abiri muana Zerizaleme na alaha nde na Nkumu.

²³ Obila ama teende ntsa osaangumu angri a Nkumu ndi: «Ntuba muo a muana a balaha, adze oka buhu ma ama yeese o Nkumu.»

²⁴ Ŋa bo ayi se na ampa avuoŋi a tsinda okuumbu lemihi na angri a Nkumu: «Eki epebihi dziele si kali baana ma akuumbi vuele.»

Simion owobi a Ndziami

²⁵ Ŋa balaha mo ekihi o Zerizaleme nkuumi e nde Simion. Nde aki mvuuru a tele, anyiima Ndziami, adila na lila Ovusihi a baari a Isayele. Oduduma Santi aki o nde.

²⁶ Oduduma Santi oki oma baana odziese nde ndi: «We aka sa kua ni, we asa mono Krisi a Nkumu asuoli.»

²⁷ Oduduma Santi obiri Simion ntsa ndzo e Ndziami. Dzia biri e nguhu bla taara ma biri Muana ma osuumbu angri a Ndziami.

²⁸ Simion oyahi muana ntsa dziala e nde, ompi Ndziami leve ndi:

²⁹ «O ŋa Nkumu, nyila odzandzi a we okua ntsa oduusu lemihi na andahi a we,

³⁰ obila miisi a me ami mono Ovusihi,

³¹ a we ama ayeese o baari asiiso:

³² Nde oyalala edze olaha we na baari a yulu a ntsie. Nde adze oka lekuma le baari a we a Isayele.»

Simion awobo ma lengulu le Ndziami

³³ Taara bla nguhu a muana akimi o maami a Simion awobihi o nde.

³⁴ Simion ompi bo andosoho. Nde na Mariya ndi: «O muana we yu, kuna o ntsa Isayele ma ava, si kali ma nyusuha. Nde adze oka ndiimi e Ndziami, okoroho baari ma adze obele nde.

³⁵ Ŋa ma adze oyaa etsimiŋi e baari kuna. Ŋa we Mariya, mpasi edze otiila we otima mva dzuo.»

Aane owobi a mbari e Ndziami

³⁶ O ŋaa se ekihi na okaasi a nkuumi Aane muana Paniele ama lekaha la Aseere. Nde owobi a mbari e Ndziami, aki aya okubu. Ntsa ongondo o nde, nde osi esibi ntsaami bla olumi a nde.

³⁷ Emana oya okuuli. Nde ekuumi ma esibi mfuomo na esibi ena (84). Akihi ntsa ndzo e Ndziami ma odzandza antini aso, aka na ongerehe, nde se avuono.

³⁸ O ntini dzia nde se oyi, ompi Ndziami leve, owobi o muana na baari aso ma dilihi Ovusihi a Zerizaleme.

Obusi o Zezi o Nazarete

³⁹ Bo ama mana osa lemihi na angri a Nkumu apisihi, Mariya bla Zuzefe avurihi onguundu o bo Nazarete o ntsa Ngalili.

⁴⁰ Muana akulihi na mpari eso, na na ntsimi yo mini, mpolo e Ndziami eki bla nde.

Zezi oto esibi kuumi na dziele oyeni ndzo e Ndziami

⁴¹ Esibi eso, nguhu a nde bla taara a nde ayenihi Zerizaleme o tsinda a Azife ma tsuoloho o Paake.

⁴² Zezi oma to esibi kuumi na dziele, oyeni bla bo ma otiiri a bo.

⁴³ Bo amana tsinda avurihi. Ŋa muana bo, Zezi osiili o Zerizaleme taara bla nguhu aka yaa ni.

⁴⁴ Bo aki ndi muana oli bla abuha a bo a ndzila mo. Asi odziila okumuu, aya ma saha nde ntsa nkuono na andihi a bo.

⁴⁵ Bo aka mono nde ni. Avurihi na Zerizaleme na osaha nde.

⁴⁶ Tsuhu otari bo amoni muana ntsa ndzo e Ndziami. O ntsi, o mpaniŋi ayisihi ma Azife, nde ayuha bo, nde se alehe bo eduhu.

⁴⁷ Aso ma ayuhi muana akimi ntsimi ekalihi e nde.

⁴⁸ Bo ama mono nde, bo akimi. Nguhu na nde ndi: «E muana me we dzia dzaa e we ama sa bisi ma? Saa taara we lekihi ntsa onguo na lesaha le we.»

⁴⁹ Nde okaali bo ndi: «Be lesaha me ma oma? Be i ya mbri ove me esi dzandza e Taara me ni?»

⁵⁰ O ŋa bo aka yuha maami a nde aduuhi ni.

⁵¹ Emana Zezi osurihi bla bo Nazarete. Nde anyiima bo. Nguhu akiele maami maa aso ntsa otima a nde.

⁵² Zezi akulihi na ntsimi eso. Nde aki na mpolo o miisi a Ndziami na a baari. Na baari se ma adzuusa nde.