Mbari e Like 17 - Obamba Kiwoyeti (mdt) NT Portions

Mbiini bla leboloho

¹ Zezi na aluoni a nde ndi: «Maami ma atuma baari osa ambiini ma aka adze oyele ni, ŋa ndoho eka na mvuuru aya na mo.

² Tata akuri nde kele e nini o nkii, atuni nde ntsa okeri onini. Ŋa nde i ma buuna otuma muana onkere se omo osa ambiini ni.

³ Lesa ayiba! Muana nguhu a we osa mbiini, we owobi na nde yemiŋi. Ŋa nde okaala eku we obolihi nde.

⁴ Ŋa nde osoŋo we amihi ntsaami ma odziila a mui omo, nde se oya na aviriha amihi ntsaami mpili e we ndi: “Me emi mono obi”, we se obolihi nde.»

Mpari oyalihi

⁵ Antuma na Nkumu ndi: «Luusa bisi oyalihi.»

⁶ Ŋa Nkumu okaali na bo ndi: «Be leki ma oka na oyalihi oli na okiehe mva lemburu le otaade, kaa be lebuuna oduha na oti a sikomoore yu mbri: “Wunaha, dziehe na akuna nyuru we anku ntsa okeri”, nde se onyiimi be.»

Aluoni a Zezi adzandzi atu

⁷ «O mpaniŋi e be ali na odzandzi akuniha anguunu si kali akielehe endoombo, oduha na odzandzi ntini e nde awa anguunu ndi: “Dziaha asisari na kuma o tanda” na?

⁸ Kali, nde oduha na nde ndi: “Laama me biila, kaala amfa, ma olehe me biila, me edza, me nyua. Omana we se we odza, we nyua, ma a we antini.”

⁹ Nde ŋa ampa odzandzi leve ma osuumbu a nde asi maami a nde aduhi?

¹⁰ Na be se: ntini e be le esa maami ma aduhi be osa aso, be leduhi mbri: “Bisi adzandzi atu. Bisi lesi ni dzandza ma duhi bisi osa.”»

Zezi asalaha anga ebila kuumi

¹¹ Ntini e Zezi ayenihi na Zerizaleme, nde oyiri o mpanihi e Samari bla Ngalili.

¹² Nde onyunuha ntsa mpuhu mo, anga ebila kuumi ayi na e nde. Bo asyeli o lala.

¹³ Bo asaari dzuhi, na nde ndi: «E Zezi Nkumu, mono bisi nkerihi!»

¹⁴ Zezi omono bo, na bo ndi: «Ledziehe na alaha anyuru mpili asi ma avuoŋi.» Ŋa ntini e bo ma ayenihi, bo aki ami mana owuuma.

¹⁵ Omo o ntsa bo, omono ndi nde omi wuuma, oyi na avuriha, na okuusa lekuma le Ndziami nkara yulu.

¹⁶ Nde ovi o ntsina nyiili e Zezi mpaa o ntsie, ompi nde leve. Ŋa balaha dzia eki osi Samari.

¹⁷ Ŋa Zezi ndi: «Bo aso a kuumi aka wuuma ni? Ŋa maamo a wa, ali kuni?

¹⁸ Mvuuru si omo aka aya na avuriha na ampa Ndziami leve ni, ongula ndzia yu otu?»

¹⁹ Ŋa Zezi na nde ndi: «Temehe, dziehe, oyalihi o we omi vusuha we.»

Edzihi ma Onkani o Ndziami

²⁰ Afarizi apisi Zezi ndi: «Onkani o Ndziami ma odze oya o dzini ntini?» Nde okaali bo ndi: «Onkani o Ndziami ma oka adze oya mva kiila ma mono ni.

²¹ Ma aka adze oduha ndi: “Lemono bo o bu omi ya”, si kali: “Bo oli kuuni” ni. Obila onkani o Ndziami oli o mpanihi e be.»

Tsuhu le Muana mvuuru

²² Emana Zezi na aluoni ndi: «Antini ma adze oya a be ledia omono Muana mvuuru se tsuhu le mo, ŋa be leka adze omono nde ni.

²³ Ma adze oduha be ndi: “Nde ayu ku”, si kali: “Nde ayu ŋa” Be lekaa dziehe ni, lekaa dema ntsiini ni.

²⁴ Obila tsuhu e Muana mvuuru adze oya, edze oka mva epeeŋi e ngari o yulu. Oyalala o nde obaana odzi ntsuo oto ntsuo e mo.

²⁵ Ove Muana mvuuru osa mono ampasi kuna, ŋa ndzubu e lobi se edze obisa nde.

²⁶ Maami ma ayiri o ntini e Nowe, ma adze oka se osuumbu dzu dzua, mva tsuhu e Muana mvuuru adze oya.

²⁷ Baari aki ma adza, ma anyua, ma yaha akaasi ma abaala, ma mpa baana a bo ma akaasi se ma abaala. Tii ngo o tsuhu e Nowe anyunihi ntsa mbuungu. Oduumbu a mvula onohi, ntuuna eyi, baari akui aso.

²⁸ Edze oka se mva ntini e Loote: baari aki ma adza, ma anyua, ma suuma, ma tehe biibi, ma kuna, ma tua andzo.

²⁹ Ŋa tsuhu e Loote atsuuhi o Sodoome, Ndziami otumi mvula a mbaa bla owuru a mbaa, ŋa baari aso akui.

³⁰ Tsuhu e Muana mvuuru adze owasaha, maami ma adze oyira ma osuumbu dzu dzua.

³¹ O tsuhu dzia, mvuuru adze oka o yula ndzo aka ma suruha ma oyaha biibi e nde ni. Na adze oka ntsa anguunu se, aka aya na avuriha ndzo ni.»

³² Leyibiha okari a Lote!

³³ Mvuuru asaha okiele lebihi le nde, adze oyele lo. Avusaha lebihi le nde, adze okiele lo se.

³⁴ «Me eduha be, lempiibi lia baari vuele ma adze oka o yula ntari mo, ma ayaha omo, anyila omo.

³⁵ Akaasi vuele ma adze oka ma otsua biibi, ma atsiese omo, anyila omo.

³⁶ Abalaha vuele ma adze oka ntsa nguunu, ma adze obira omo, anyila omo.»

³⁷ Aluoni apisi nde ndi: «E Nkumu, maami maa ma adze oyira kuni?» Nde okaali bo ndi: «Biri edze oka obiimi, biri ambila ma adze okusuha abuha.»