Mbari e Like 16 - Obamba Kiwoyeti (mdt) NT Portions

Ntsintsami odzandzi ambalaha

¹ Zezi oduhi na aluoni a nde se ndi: «Balaha mo eli na osolo, eki na odzandzi. Abaniŋi odzandzi ndi nde adzibiha biibi e nkumu.

² Nkumu otsuoli nde, opisi nde ndi: “Maami a me eyuha o we ma buni? Duha osuumbu a we akielehe biibi e me, ŋa we se aka ma kiele dzo ni.”

³ Odzandzi owobi nde anku ndi: “Me oma sa ŋa buni, nkumu oya ndzala ndi me kiele biibi e nde kali? Letsima le ntsie? Me mpari kali. Me na okru o mpahi.

⁴ Aa! Me eyaa kiila o me esa o ntini e nde atsiese me mbumbu, me saha baari ma adze oyamba me ma andzo a bo!”

⁵ Nde otsuoli baari ma bihi biibi e nkumu a nde omo na omo. Nde na a ntsomi ndi: “We ama biha na nkumu a me kue?”

⁶ Nde okaali ndi: “Ambiina a maari ekuumi kuumi.” Odzandzi ndi: “Mono osaangumu, ka o ntsi teende ekuumi etaani.”

⁷ Emana nde oduhi na okima ndi: “Ŋa we abihi kue?” Dzua okaali ndi: “Ekuumi ma angara kuumi e mburu.” Odzandzi na nde ndi: “Mono osaangumu, teende ekuumi mfuomo.”

⁸ Ŋa nkumu odzuusi odzandzi obi ma obila o nde ayeesi maami. Baari ama antini ma avuli abuha a bla bo ambalaha, nkusa na baari ma ali ntsa oyalala.»

Ndziami bla Adoro

⁹ Zezi oluusi ndi: «Ŋa me eduha be, lesa leve na andihi a be bla osolo obi oma yula ntsie dzi. Tsuhu osolo ewa Ndziami adze oyamba be ma ebiri e mbumbu.

¹⁰ Mvuuru ma lehe lila o nde o maami ma akiehe, ma buuna se olehe lila o nde o maami ma anini. Mvuuru ali obi o maami ma akiehe, abuuna se oka obi o maami ma anini.

¹¹ Yuhu be le li tele ma osolo obi a yula ntsie, adze ompa be osolo a dzaa dzaa na?

¹² Yuhu be leka aka tele bla biibi e mvuuru ni, adze ompa be, e be anku na?

¹³ Odzandzi i buuna odzandza ma ankumu vuele ni, nde adze obele omo nde odii omo, si kali nde oka bla omo, obeli omo. Be i buuna odzandza o Ndziami omana be leki ayiha ma Adoro ni.»

Angri bla Onkani o Ndziami

¹⁴ Afarizi anga ndzala adoro, ma yuha mbari e nde awobihi eso, bo ma sebe Zezi.

¹⁵ Zezi na bo ndi: «O miisi a baari be lelaha mbri be tele, ŋa Ndziami oyaa etima e be. Obila kiila o baari ma mono o mpanihi e bo ndi kiila enini, o miisi a Ndziami obi bo mini.

¹⁶ Antini ma angri a Moyize bla awobi a mbari e Ndziami asyeli o Zan Batise. Ŋa ma si baana o Zan Batise, Ntsia e Mve Onkani o Ndziami ami tooso yo, mvuuru na mvuuru osi mpari ma onyunuha ntsa onkani o Ndziami.

¹⁷ Yulu bla ntsie ma adze oyira siami kali, ŋa angri a Ndziami si mpri mo ma adze otsiese kali.

¹⁸ Balaha etsuura okari a nde ma oyaha okima, nde asi ntsuuma. Eyaha okaasi olumi ama tsuura, ntsuuma nde se asiaha.»

Ntsintsami e nga osolo bla Lazaare

¹⁹ «Mvuuru omo aki nga osolo olaasaha amfa a mvunu, etsuhu eso nde osiaha atsinda.

²⁰ Onga owuha ma atsuolihi o Lazaare, akihi o tolo ma onyua a ndzo a nde, ŋa nyuru ampura.

²¹ Nde aki ndzala nde odzi odzurihi mo biila me evuaha o tanda e nga osolo, ŋa ongula amva alieŋe nde ampura.

²² Nga owuha okui, abaandzi abiri nde mpili Abraame. Nga osolo se okui, adzihi nde.

²³ O mpili akui aki ma suesehe nga osolo. Nde osaara miisi, otaali Abraame, Lazaare oli o paani e nde.

²⁴ Nde owuli ankima ndi: “Abraame, taara a me, mono me nkerihi! Tuma Lazaare otuba ntsuo oliemi a nde ma andza olehe me o yula lempele, obila me emono ampasi kuna ntsa mbaa.”

²⁵ Ŋa Abraame okaali ndi: “Muana a me yibiha eve e we abahi ntsa lebihi le we, ŋa Lazaare abahi ndoho. Ŋa paraabu nde ma akooso, ŋa we amono ampasi.

²⁶ Ongoula ŋa, mpanihi e be bla bisi mbie e nini, baari ma saha o tsiehe kuuni ma oya kua i buuna ni, ma saha otsiehe kua ma oya kuuni se i buuna ni.”

²⁷ Nga osolo ndi: “Ŋa kolo kolo e we taara, tuma Lazaare ndzo e taara a me.

²⁸ Obila me na barihi ataani. Nde oma dziese bo, bo se i ma ya o biri ampasi dzi ni.”

²⁹ Abraame okaali ndi: “Bo na Moyize bla awobi a mbari e Ndziami ma odziese bo, bo ayuha bo!”

³⁰ Nde ndi: “Kali Abraame taara, yuhu mvuuru awa mpili akui ma odze mpili e bo, bo akaala eku.”

³¹ Abraame na nde ndi: “Bo abisa oyuha Moyize bla awobi a mbari e Ndziami, si na mvuuru onyusaha mpili akui, ma odze mpili e bo, bo ma aka yalaha ni.»