Mbari e Like 14 - Obamba Kiwoyeti (mdt) NT Portions

Zezi asalaha obieri o tsuhu ma awuumaha

¹ Tsuhu ma awuumaha mo, Zezi oyeni na adza biila mpili e nkumu Afarizi omo. Baari ma aki ŋa ma keese nde.

² Ŋa balaha mo eki na ngaa ebiimaha nyuru. Nde aki o vusu o Zezi.

³ Zezi oyahi mbari, na ayisihi ma angri bla Afarizi ndi: «Ma buuna osalaha obieri o tsuhu ma awuumaha, si kali?»

⁴ Bo aya pi. Ŋa Zezi oyahi obieri, osalihi, onyili nde oyeni.

⁵ Emana nde na bo ndi: «O mpanihi e be ali na muana si kali ngoombo a nde ova ntsa terihi, abisa otusaha nde asisari o tsuhu ma awuumaha ni na?»

⁶ Bo aka buuna oyalaha ni.

Zezi atiba baari ma osuoloho ebiri ma lembisa

⁷ Zezi ama mono ndi baari ma dziaha ma atsinda osuoloho ebiri ma levusu. Ŋa nde oti bo ntsintsami ndi:

⁸ «Ntini e mvuuru atuolo we o tsinda e baala, we kaa kaha levusu ni. Ma oma, leke onga tsinda ama tuolo mvuuru okima avuli we okiimi,

⁹ ŋa ntini onga tsinda atsuoli be aso a vuele, oya na aduha na we ndi: “Yisa nde biri”, we ama temehe ma odze biri e mbisa ŋa na okru oso.

¹⁰ Ŋa ntini ma tuolo we o tsinda, dziehe na aka obiri lembisa, onga tsinda oma ya oduhi na we ndi: “E ndihi a me, dziaha na aka levusu.” O ŋa we omoni okiimi o mua baari ma ali bla we o tanda.

¹¹ Obila, ntini e mvuuru akuusa nyuru nde anku, avuuri nde ntsi, ŋa mvuuru avuriha ntsi, akuusi nde.»

Zezi atiba ma ompa anga owuha

¹² Nde se oduhi na mvuuru atuoli nde ndi: «Ntini e we atuolo baari ma odza, ka atuoloho andihi na baana ma anguhu, na nkuono e we, na anga osolo ma ali o paani e we ni. Tsaaki bo se atuoli we na adza, bo avuuri we ma lemihi le we ampi bo.

¹³ Ŋa ntini e we asa tsinda, tuolo anga owuha na ebuka, na eleme na baari ma ali i mono ni.

¹⁴ Ŋa we adze omono ove obila bo kiila ma buuna ovuura we onyaŋa. Ndziami adze ovuura we o tsuhu akui a tele ma adze onyusiha.»

Ntsintsami e tsinda e nini

¹⁵ Mvuuru omo aki o tanda oyuha vua na Zezi ndi: «Ove oka na mvuuru adze odza biila ntsa Onkani o Ndziami!»

¹⁶ Zezi oti bo ntsintsami dzi ndi: «Balaha mo ekusihi tsinda e nini, otsuoli baari kuna.

¹⁷ Ntini odza eto, otumi odzandzi a nde na aduha baari a nde atuoli ndi: “Ŋa ledziaha ntini emi to.”

¹⁸ Ŋa bo aso, omo na omo, apisi kolo kolo. A ntsomi ndi: “Me kini ma osuuma nguunu, ove me yeni na amono yo. Boloho me.”

¹⁹ Omo ndi: “Me kini ma osuuma angoombo kuumi, me edze na keese bo. Kolo kolo e we boloho me.”

²⁰ Okimandi: “Me kini esi baala, kia obila o me eli i buuna oya ni.”

²¹ Odzandzi oya na avuruha na e nkumu, oduhi nde maami maa aso a baari baa ma kaali. Ŋa nga ndzo obie nkala, na odzandzi ndi: “Dziehe asisari ma ambungu na ewoombo bla enguundu, we oya na anga owuha, ebuka, baari ma ali i mono ni, bla eleme.”

²² Emana ŋa odzandzi oyi na aduha ndi: “E Nkumu, aso a we aduhi me emi sa, ŋa ebiri ekini.”

²³ Nkumu na odzandzi ndi: “Dziehe ma andzila ma anguunu, mpa bo okura bo aya, ove ndzo e me eluuli.

²⁴ Ŋa me eduha be o ntsa baari a me eki ema tsuolo, si omo aka adze odza biila e me ni.”»

Lemihi la oluono Zezi

²⁵ Lemvuuru le kuna leki lelaana bla Zezi, nde okalihi mpili e bo ndi:

²⁶ «Mvuuru aya na e me ove nde odii me. Ŋa dia le nde o me, ove levuli le ema taara a nde, nguhu a nde, okari a nde, baana a nde. Akulu bla barihi a nde, ankeri a nde, na lebihi le nde anku. Nde yuhu i sa vua ni, nde i buuna oka oluoni a me ni.

²⁷ Mvuuru abisa obira lembandzi le nde, oturi me, i buuna oka oluoni a me ni.

²⁸ O mpanihi e be dzua mvuuru asaha otua ndzo, nde i sa ka o ntsi, otali adoro ma omono yuhu nde abuuna omana yo ni na?

²⁹ Ma oduma nde yuhu omi baana otua, nde okuoni, baari aso ma aya omono yo asebi nde.

³⁰ Bo ma adze oduha ndi: “Lemono mvuuru ama baana otua ndzo, nde aka buuna omana ni!”

³¹ Dzua nkani adze na adzuana eta bla nkani okima, i saa ka o ntsi ma omono yuhu nde abuuna bla okuumi aworo omo, odzuana na ali na ekuumi ma aworo dziele ni na?

³² Nde omono ndi nde i buuna ni, nde otumi antuma o ntini e buha akini la, ma osaha oduusu.

³³ Ma osuumbu dzua, mvuuru o mpanihi e be abisa osuba biibi e nde eso kalihi, i buuna oka oluoni a me ni.»

Mpiye ongua

³⁴ «Ongua kiila ove, ŋa ongua oyele mpie we ovuura yo buni?

³⁵ Nde oya ove mo ntsie na ewuru kali, atuni nde o ndzi. Ali na atsui ma oyuha, oyuhi!»