Mbari e Like 13 - Obamba Kiwoyeti (mdt) NT Portions

Lekaala le eku

¹ O ntini dzia baari ayi na aduha nde dzaa asi Ngalili, eli Pilaate ovusihi tohi le bo bla avuoŋi atumi obuma asi Galili, ntini e bo ma mpihi Ndziami avuoŋi.

² Zezi okaali na bo ndi: «Be letsimiŋa mbri asi Ngalili ma bumi ma osuumbu dzua, aki avuli asi Ngalili maamo ambiini osa?

³ Kali, me eduha be, ŋa be obisa okaala eku, be le edze okua be aso mva bo.

⁴ Ŋa baari a kuumi na mfuomo ma akui o ntsulu e Silowe, o ntini obaha owunihi, be letsimiha mbri bo aki avuli asi Zerizaleme maamo ambiini osa?

⁵ Kali, me eduha be, be obisa okaala eku, be ledze okua be aso mva bo.»

Ntsintsami oti ali i mpa mburu ni

⁶ Ŋa Zezi oti bo ntsintsami ndi: «Balaha mo aki na oti a nkuumi figie ntsa nguunu e viinye. Nde oyeni na atolo mburu o figie, nde aka baha ni.

⁷ Ŋa nde na odzandzi a viinye ndi: “Mono esibi eya etari e me eya na otolo mburu, me i baha ni. Cebe oti a figie yu! Na kiila o nde asiaha o yula ntsie ŋa onyaŋa!”

⁸ Ŋa odzandzi a viinye okaali na nde ndi: “Nkumu sa nyila nde osibi ki, me tsima ntsina nde me lehe ewuru.

⁹ Leke osibi o vusu nde ampa mburu. Nde obisa ompa we tsebi nde.”»

Zezi osalihi okaasi oleme, o tsuhu ma awuumaha

¹⁰ Zezi aki ayisiha ntsa ndzo ma avuonoho o tsuhu ma awuumaha.

¹¹ Okaasi omo aki na odidima obi, oma mpa nde onkoro esibi kuumi na mfuomo. Nde i buuna osiiha oki tele ni.

¹² Zezi omono okaasi dzua, otsuoli nde, na nde ndi: «We omi wuuma ma oleme o we.»

¹³ Nde olehi dziala o yula nde. O ntsi na ntsi ŋa, nde osihi oya tele. Oya akuusa lekuma le Ndziami.

¹⁴ Ŋa nkumu a ndzo ma avuonoho obie nkala, ma obila o Zezi asalihi mvuuru o tsuhu ma awuumaha. Nde na lemvuuru ndi: «Etsuhu e dzandza esiami, bia etsuhu ma salaha baari. Le eya, asalaha be ma etsuhu bia, ka o tsuhu ma awuumaŋa ni!»

¹⁵ Nkumu okaali na nde ndi: «Be na ompiele! Be leka nanaha ngoombo si kali aane o tsuhu ma awuumaha lempi bo andza ni?

¹⁶ Ŋa okaasi yu muana Abraame. Dzabri aki ama kura nde endi esibi kuumi na mfuomo, aki i buuna onaana nde endi o tsuhu ma awuumaha ni?»

¹⁷ Ntini e nde awobihi abuha ma ombangu amoni okru, ŋa lemvuuru leso leki lesuere, o maami ma ave a nde asihi.

Ntsintsami leviire

¹⁸ Zezi ndi: «Onkani o Ndziami owuana oma? Me oyelehe bo bla oma?

¹⁹ Onkani o Ndziami mva lemburu le otaade, le mvuuru akunaha ntsa nguunu e nde. Lekuli, lekirihi oti. Anyui atsui andzo o yulu entaha e nde.»

²⁰ Nde ovurihi oduhi ndi: «Me oyelehe Onkani o Ndziami bla oma?

²¹ Bo mva leviire le okaasi ayaha, ovusihi bla fariini a kuna, dzo eso ekumi.»

Osuumbu ma onyunuha ntsa Onkani o Ndziami

²² Zezi ayirihi ma enguundu na ampuhu na oyisaha. Nde ayenihi mpili onguundu o Zerizaleme.

²³ Mvuuru opisi nde ndi: «Ee Nkumu, baari ma adze ovuuha ma adze oka ntseeri?» Zezi okaali bo ndi:

²⁴ «Lesa mpari ma onyunuha, ma onyua a ndzo okiehe. Me eduha be, kuna ma adze osaha onyunuha, ŋa ma aka adze obuuna ni.

²⁵ Ŋa ntini e nkumu a ndzo adze otemehe, obiinda odibihi, be osiila o ndzi, be lebaana okuruha ndzo ma oduha ndi: “Nkumu, naana bisi,” ŋa nde adze okaala na be ndi: “Be asi kuni?”

²⁶ Ŋa be le edze oduha nde mbri: “Bisi lema adza, lema anyua bla we. We ama yisiha ntsa ewoombo ema enguundu e bisi.”

²⁷ Ŋa nde ovuriha okaala be ndi: “Be asi kuni? Letsiehe o paani e me, be aso lesiaha maami ma abi!”

²⁸ Be ledze oka ma olili ledza mii, o ntini e be ledze omono Abraame bla Izaake na Zakobe, na awobi a mbari e Ndziami aso ntsa Onkani o Ndziami. Ŋa be, atuna o ndzi!

²⁹ Ŋa baari ma adze owa na mpili e tari etemehe, na mpili e yo evuaha, na ntaana bla mbere. Bo ma adze oyaha biri o tanda, ntsa Onkani o Ndziami.

³⁰ Ŋa mo vua, ma ali lembisa ma adze oka levusu, ma ali levusu ma adze oka lembisa.»

Zezi aselehe odze na mpili e Zerizaleme

³¹ O ŋiŋa Afarizi ake atsiini mpili e Zezi ndi: «Tsiehe o ŋa, dze la, Erode Atipaase asaha obuma we.»

³² Zezi oduhi na bo ndi: «Ledze na aduha na obahi dzua mbri: “Me etsuura edidima ma ebi, me esalaha baari, na lobi na osuuha, ŋa mbisa osuuha me mana dzandza e me.”

³³ Ŋa ove me yeni na vusu, na lobi na osuuha, na tsuhu nkima. Ma oma owobi a mbari e Ndziami i kua la na Zerizaleme ni.»

³⁴ «Zerizaleme, Zerizaleme, we abumaŋa awobi a mbari e Ndziami. We abuma ma akele a Ndziami atumi we. Antini kuna me ema dia okusaha baana a we, mva okari a ntsusu akusaha baana ma ntsusu ntsina apaabi a nde, ŋa be leka adia ni!

³⁵ Ŋa ma adze osuba ndzo e be kalihi. Ŋa me eduha be, be leka adze omono me ni, tii ngo ntini e be ledze oduha mbri: “Andosoho aka na mvuuru aya o nkuumi e Nkumu!”»