Mbari e Like 12 - Obamba Kiwoyeti (mdt) NT Portions

Baari ma yalaha Zezi

¹ O ntini dzia, lemvuuru le kuna ledzenihi Zezi. Bo ma dzaraha nyiili ma abuha. Zezi obaani owobo na aluoni ndi: «Be lesi ayiba ma leviire le Afarizi, lo oma kaha ompiele o bo.

² Maami a ma adzisihi aso ma adze otsuuha, a ma adzisihi aso se ma adze oyaa.

³ Kia obila eli maami aso a be le edze oduha ntsa lempiibi, ma adze oyuha na mui. A be le edze oduha ma awawa otsui le buha ntsa otini o ndzo, ma adze otsuuha o mua mpuhu.»

Mvuuru ma abuuna onyiima

⁴ Me eduha be ma andihi a me, lekaa monoho vuoho o baari ma bumaha akabi ni. Ongula ŋa bo i buuna osa dzaa nkima ni.

⁵ Me eduha be, mvuuru a be lebuuna onyiima Ndziami. Nde na mpari ma otuma be ntsa biri ampasi, ngula leku. Ee me eduha be, nde mvuuru a be lebuuna onyiima!

⁶ «Ma buuna otehe baana ma anyui ataani ma adoro vuele? Okoroho Ndziami i limiha si omo ni.

⁷ Na mfu eli ma etsui e be, ama tala yo. Lekaa monoho vuoho ni, be levuli baana ma anyui a kuna mvunu!»

⁸ «Me eduha be: mpini mvuuru adze oyalaha me o miisi a baari, Muana Mvuuru se adze oyalaha nde o miisi ma abaandzi a Ndziami.

⁹ Ŋa mvuuru abisa me o miisi a baari, Muana mvuuru se adze obisa nde o miisi ma abaandzi a Ndziami.

¹⁰ Mvuuru owobo mbari e mbi o Muana mvuuru, ma adze oboloho nde. Ŋa atuha Oduduma Santi ma aka adze oboloho nde ni.

¹¹ Ntini ma adze obira be ntsa andzo ma avuonoho ma opama be, o miisi ma ankumu na ankani, be lekaa monoho vuoho mo mbari e be le edze owobo na a be le edze oduha ni.

¹² Obila Oduduma Santi adze oyisiha be o ŋiŋa dzaa e be le edze oduha.»

Zezi aduha ntsintsami e balaha eli na ndzala osolo

¹³ Mvuuru omo o ntsa lemvuuru na Zezi ndi: «E Nkumu, duha na okulu a me okaba wanda e saande.»

¹⁴ Zezi okaali nde ndi: «Ama tsuusa me ŋa ma opama maami na le kaba la osolo a be na?»

¹⁵ Emana nde oduhi na bo ndi: «Be lesi ayiba! Leka siaha ndzala biibi kuna ni. Lebihi le mvuuru ka mvuuha ni, si nde avula osolo.»

¹⁶ Nde oti bo ntsintsami ndi: «Balaha mo e nga osolo evuusi biila kuna ma anguunu a nde.

¹⁷ Nde atsimiha ntsa otima ndi: “Me osa buni? Me biri otsuusa biila kali?”

¹⁸ Ŋa nde ndi: “Me yaa osuumbu a me esa. Me tsala etala, me tuha ma evuli onini. Ŋa me lehe mburu e me eso, na biibi e me ekema.

¹⁹ Ŋa me eduha na Oduduma a me mbri we na mvuuha kuna, ma esibi kuna. Wuuma, dza, nyua, suere.”

²⁰ Ŋa Ndziami na nde ndi: “We odzili! Ma lempiibi le lobi li me eyaha owuru a we. Ŋa eso e we ama yeese ma etala, asiila na dzo na?”»

²¹ Zezi oluusi ndi: «Mono maami ma aya o mvuuru asaha osolo a nde anku, nde osolo o miisi a Ndziami kali.»

Lelehe tari o Ndziami

²² Emana Zezi oduhi na aluoni a nde ndi: «Dzia biri e me eduha be mbri, be leka monoho onguo ma lebihi le be, na kiila o be ledza, bla amfa ma olaasa ni.

²³ Obila lebihi levuli biila, ŋa nyuru evuli amfa.

²⁴ Lekeese enkuaŋa, dzo i kuna ni, dzo i kiele mburu ni, okoroho Ndziami abunuŋa dzo. Be levuli anyui mvunu.

²⁵ O mpanihi e be abuuna oluusa etsuhu ntsa lebihi le nde obila ma onguo na?

²⁶ Yuhu be i buuna osa maami ma akiehe ni, ŋa be lemonoho onguo o maami maamo buni?

²⁷ Lemono mva ekulaha wula efuuma ma anguunu, yo i dzandza ni, i tua amfa ni. Okoroho me eduha be ntini e nkani Salomon aki na osolo a nde aso, nde aka laasa amfa ma awali ma vuli wula si mo ni.

²⁸ Ndziami alaasa efuuma ma anguunu lobi ma adze otsuha osuuha, ŋa nkusa na be? Be oyalihi ntseeri!

²⁹ Ŋa be i ma saha kiila o be le edze odza na onyua ni, be i ma mono onguo ni.

³⁰ Bya eso osahi dzo antini aso, baari a yula ntsie ma ali i yaa Ndziami ni. Ŋa taara a be oyaa ndi be na kaama.

³¹ Lesa saha Onkumu o Ndziami o yula be, ŋa ma emo oma luusa be lembisa.»

³² «Be leka monoho vuoho ni, dziimi le ekiehe. Obila taara a be amono ove ma ompa be eve ma Onkani o nde.

³³ Letehe biibi ma eli na be, lempa anga owuha adoro. Lesaha osolo a mbumbu, osolo oli i wa o yulu ni. Mpili eli odzibi i tsiina ni, antsieri i dza ni.

³⁴ Ŋa biri eli osolo a be, biri edze oka etima e be.»

Adzandzi ma amoho

³⁵ Leka ma amfa a dzandza, be lekiele abaami ma mbaa a be aka ma onama.

³⁶ Be leki mva adzandzi ma adila nkumu awa tsinda e baala. Ntini e nde adze oya, na o nde adze okuruha, onaani nde ndzo.

³⁷ Osuere oka na adzandzi ma ali nkumu oya, obasihi bo ma amoho! Sisiele me eduha be, nde adze oselehe amfa, olehe bo o tanda, omana ompa bo biila.

³⁸ Nde oya na avuruha o mua otima lempiibi, si kali ma etsihi e tsuhu, nde obasihi bo muo, osuere oka na bo!

³⁹ «Be leyaa mbri: o nga ndzo aki ma oyaa ntini edziaha odzibi, kaa nde aka nyila nde onyunihi o ndzo e nde ni.

⁴⁰ Be se le deli, ma oma Muana Mvuuru adze oya o ntini e be le eli i yaa ni.»

Odzandzi ali tele na oyeri

⁴¹ Piere na nde ndi: «E Nkumu, we ata ntsintsami dzi ŋa o bisi atu, si o baari aso?»

⁴² Nkumu okaali na nde ndi: «Dzua odzandzi ali tele na oyeri a nkumu ama tsuusa ma okiele ndzo na lempa la abuha biila antini aso na?

⁴³ Osuere oka na odzandzi ali nkumu oya na avuruha, nde obasihi nde asa dzandza!

⁴⁴ Me eduha be sisiele: Nde adze ompa odzandzi onkumu o yula osolo a nde aso.

⁴⁵ Ŋa odzandzi otsuomo na otsimiŋa ntsa otima a nde ndi: “Nkumu a me aka aya paraabu ni”, ŋa nde oya abeere adzandzi maamo, ma abalaha na ma akaasi. Nde odzi, onyui, okoli.

⁴⁶ Ŋa nkumu odzandzi dzua adze oya o tsuhu na tari e nde ali i yaa ni. Nkumu adze otsuura nde na leliisa le nde, mva baari ma ali ka tele ni.

⁴⁷ Ŋa odzandzi adziabi ediŋii e nkumu a nde, omana nde i ma sa mva e nkumu adii ni, mbaa nkumu adze obeere nde ekatsi e kuna.

⁴⁸ Ŋa odzandzi ali i yaa ediŋii e nkumu ni, asa maami ma abi, ma adze obeere nde ekatsi ntseeri. Ma adze opisa kuna na mvuuru ma ama mpa kuna. Ma ama ampa kuna, ma adze oselehe opisa nde kuna.»

Zezi ndi baari ma adze obaha abuha o nde

⁴⁹ «Me eyi na mbaa o yula ntsie. Me ndzala yo enama!

⁵⁰ Ove me yahi ateeme, onguo osa me yuhu me kini yaha mo ni.

⁵¹ Be letsima mbri me eyi ŋa na ampa oduusu o yula ntsie? Kali, me eduha be me eyi na ombayi.

⁵² Ŋa ma obaana o lobi baari ataani o ndzo ma baha abuha. Atari ma dzuana na vuele, vuele ma dzuana na atari.

⁵³ Taara abele muana a balaha, muana a balaha abele taara, nguhu abele muana okaasi, muana okaasi abele nguhu, nguhu olumi abele okari a muana, okari a muana abele nguhu olumi.»

Ove leyaa andiimi a Ndziami

⁵⁴ Nde aselehe oduha na lemvuuru ndi: «Ntini e be lemono yulu emipiina mpili e tari evuaha, be mbri: “Mvula lobi anoho”, nde se onohi.

⁵⁵ Ntini e be lemono piebi ewa na mbere eya na ntaana, be leduhi mbri: “Lobi na ndzuusi”, yo se eyi.

⁵⁶ Be anga ompiele! Be leyaa maami ma yira o yulu bla ntsie, ŋa ma yira ma antini ma, be i yaa ni?»

⁵⁷ «Be i paama be anku osuumbu osa maami a tele ni?

⁵⁸ Ntini e mvuuru abanaŋa we, omana be leyeni ososo, ove be leyeesi o ndzila, ma oduma be oto kua, opami oma mpa we na oworo, olehe we ongeneŋe.

⁵⁹ Me eduha we, we i buuna otsuuha ma ongeneŋe yuhu we kini wura obiimi oso ni.»