Mbari e Like 10 - Obamba Kiwoyeti (mdt) NT Portions

Zezi atuma aluoni ekuumi ntsaami na vuele

¹ Emana ŋa, Nkumu ovurihi osuoli aluoni akima, ekuumi ntsaami na vuele. Nde otumi bo levusu le nde, vuele vuele. Ntsa enguundu na ampuhu a nde adze odze.

² Nde oduhi na bo ndi: «Letolo le biila ntsa nguunu siami, ŋa adzandzi ma otolo dzo akiehe. Levuono Nkumu a nguunu otuma adzandzi kuna.

³ Ledziehe, me etuma be mva baana ma endoombo o mpanihi ambulu.

⁴ Be lekaa biriha adoro, na mpie bla akoroho ni, be i sura o ndzila ma owooso mvuuru ni.

⁵ Ntini e be lenyuniha ntsa ndzo mo ntu, be lesa aduha na bo mbri: “Oduusu oka o ndzo e be.”

⁶ Be obasaha mvuuru oduusu o ndzo dzia, oduusu oki bla nde. Nde se obisa oyamba be, oduusu ovurihi bla be.

⁷ Leka ntsa ndzo dzia. Be ledzi, lenyui ma ampa be. Ma oma, odzandzi ove na wura. Be i yira ma andzo otsa otsa ni.

⁸ Ntini e be lenyuniha ntsa onguundu oyamba be, be ledzi biila ma ampa be.

⁹ Be lesalihi abieri ma ali ŋa. Be leduhi baari aso mbri: “Onkani o Ndziami omi tsiina tuha na be.”

¹⁰ Ŋa be oto ntsa onguundu obisa oyamba be, be leyeni o mua lebuhu na aduha mbri:

¹¹ “Bisi lekubuha ogru onguundu o be ali o ntaami e bisi. Ŋa ove be ledziabi mbri onkani o Ndziami omi tsiina tuha na be.”

¹² Ŋa me eselehe oduha be mbri: tsuhu opami, opami asi Sodoome adze oya, adze oka okiehe. Ŋa opami onguundu kia adze ovula a Sodoome onini.»

Baari ma enguundu eke abisi oyalaha Ndziami

¹³ «Ŋa ndoho eka na be baari ma onguundu o Sorazi! Ndoho eka na be baari ma onguundu o Betesayida! Ma oma, emaa ma asi o mpanihi e be eki ma oka o Tiire bla Sidon, ka baari ama kaala etima, ama laasa amfa ma ampie, na lekla la ewuru ma anyuru.

¹⁴ Kia obila eli, tsuhu opami, ampasi a be ma adze ovula a Tiire bla Sidon.

¹⁵ Ŋa be asi Kaprenaume, be le edze ovula abuha o yulu? Kali. Ma adze opiisa we mpili akui.»

¹⁶ Zezi ovurihi oduhi na aluoni a nde ndi: «Ntini e mvuuru ayuha be, nde ayuhi me. Ŋa abisa be, nde abisi me. Mvuuru abisa me, nde abisi mvuuru atumi me.»

Aluoni ma ekuumi ntsaami na vuele ma aya na avuriha

¹⁷ Emana aluoni ma ekuumi ntsaami na vuele, ayi na avuriha ntsa osuere. Bo na Zezi ndi: «E Nkumu, na edidima ma ebi ma enyiima bisi o nkuumi e we!»

¹⁸ Zezi ndi: «Me moni Sata owi yulu mva epeeŋi e ngari, ovi o ntsie.

¹⁹ Leyuha, me empa be mpari ma odzie o yula antaari na angia. Na ma odzaraha mpari o nga mbele eso. Kiila se omo osa be obi kali.

²⁰ Ŋa be lekaa suere obu mbri edidima ma ebi ma enyiima be ni. Ŋa lesuere ma ankuumi a be ma ami teende o yulu.»

Zezi asuere

²¹ O ntsi na ntsi ŋa Zezi osueri ma Oduduma Santi. Nde ndi: «Me empa we leve Taara, Nkumu a yulu na ntsie. Ma osuumbu a we ama dzisiha maami ma na anga ntsimi bla oyeri, we ama laha na baari ma ali mva enkere. We anku Taara, mvuuru adii.

²² Taara a me ama ampa me eso. Mvuuru i yaa Muana ni, ongula Taara. Mvuuru se i yaa Taara ni, ongula Muana, na baari akima a Muana adia olaha Taara na bo.»

²³ Emana nde okalihi mpili aluoni ndi: «Osuere oka na be lemono maami ma.

²⁴ Ŋa me eduha be, awobi a mbari e Ndziami bla ankani kuna asahi omono maami ma. Bo aka mono a be lemono ma ni. Bo asahi oyuha a be leyuha ma, ŋa bo aka yuha ni.»

Ledia le Ndziami bla buha

²⁵ Ŋa oyisihi angri a Ndziami omo otemiŋi, olehi Zezi oduhu ndi: «Nkumu me ma obaha lebihi le mbumbu me osa buni?»

²⁶ Zezi na nde ndi: «Ama teende ntsa Angri ndi oma? We aliiriha kari buni?»

²⁷ Nde okaali ndi: «Ove we dii Ndziami a Nkumu a we ntsa otima a we aso, na oduduma a we, na mpari e we, na etsimihi e we eso. Ŋa ove se we odii buha le we, mva e we ama dia nyuru e we anku.»

²⁸ Zezi na nde ndi: «We ayalihi yemiŋi. Sa vua, we adze obaha lebihi.»

Ntsintsami osi Samari ove

²⁹ Ŋa oyisihi angri a Ndziami osahi olaha ndi oduhu a nde aki tele. Nde opisi Zezi ndi: «Ŋa buha le me na?»

³⁰ Zezi oyahi mbari ndi: «Balaha mo aki asuruha Zerizaleme ma odze na Zeriko, embeŋe ekuari nde, ebeeri nde, epiini nde amfa, eyeni, enyili nde ntsa olabi.

³¹ Osi avuoŋi omo aki ayira o ndzila dzia, omoni mvuuru dzua o ntsie, oyiri.

³² Odzandzi a Ndziami omo se, ama ombisa o Levi, oyiri, omoni balaha dzia. Opesi nde, olabihi.

³³ Ŋa osi Samari omo ayira na opiinga a nde, oto paani e nde, omoni nde, nkerihi esi nde.

³⁴ Otsiini paani e nde, odzirihi nde maari bla mali ma ampura, emana okuri. Osaari, olehi nde o yula nyama a nde anku, obiri nde ndzo andzia, ma oselehe osalaha nde.

³⁵ Tsuhu etsa, osi Samari otusihi adoro, ompi onga ndzo andzia, na nde ndi: “Kiele nde, adoro a we adze okaba ovula me oya na avuriha, me vuura we.”»

³⁶ Zezi oluusi ndi: «O ntsa bo atari ali buha le mvuuru embeŋe ma ebeeri na?»

³⁷ Oyisihi angri okaali ndi: «Mvuuru amoni nde nkerihi.» Zezi na nde ndi: «Dziehe, we se sa vua.»

Maate bla Mariya ma yamba Zezi

³⁸ Ntini e Zezi aki o ndzila bla aluoni a nde, bo ato mpuhu mo. Okaasi a nkuumi Maate oyambi nde o ndzo e nde.

³⁹ Nde aki na muarihi nkuumi Mariya, oya o ntsi o paani e nyiili e Nkumu, ayuha mbari e nde.

⁴⁰ Maate dzandza eki ema vula kuna. Nde owasihi ndi: «Nkumu, we i mono obi ma osuumbu a muarihi a me ama nyila me edzandza me otu ni? Duha nde oma yamaha me.»

⁴¹ Nkumu okaali na nde ndi: «Maate, Maate, we amono onguo we afuba o maami kuna!

⁴² Ŋa dzaa e mve eli mo ntu. Mariya ama suolo lengulu le eve, ma ali i buuna otsiese nde lo ni.»