Mbari e Like 1 - Obamba Kiwoyeti (mdt) NT Portions

Ebaanihi

¹ Baari kuna aki ama baana oteende maami ma ayiri o mpanihi e saabe.

² Bo atoosi maami maa ma osuumbu a baari ma amoni ebanihi e mo, bo se aduhi saabe. Bo se ama kiriha adzandzi a Ndziami ma otooso mbari e nde.

³ Ŋa kia obila o me se emoni ove, me yiri na osaha, na opisa ndzele ndzele, maami aso ma ayiri ma ebaanihi, me eteende we osaangumu o yemiŋi, nkani Tiofile.

⁴ Me esa vua mo bu mbri, we oyaa mbri maami ma ayisihi we aki asisiele.

Obaandzi atooso ekulihi e Zan Batise

⁵ Ntini Erode akihi nkumu osi o Zide, eki na osi avuoŋi omo, nkuumi e nde Zakari a ndzubu Abia asi ma avuoŋi. Okari a nde Elisabete aki ma ombisa Arone.

⁶ Bo aso vuele aki tele o miisi a Ndziami, ma anyiima angri na esibi e Nkumu eso ndzele ndzele.

⁷ Bo aki baana kali, obila Elisabete aki onguuma, bo aso vuele aki aya ekubu.

⁸ Tsuhu mo, Zakari akihi ma osa dzandza e nde, lempa la avuoŋi ntsa ndzo e Ndziami. Dzia eki tsuhu odzua a ndzubu e nde e dzandza.

⁹ Vua eki otiiri ma asi ma avuoŋi, asuoli nde ma onyunuŋa ntsa nkiina e Nkumu, ma otsuha vuoŋi oyombo.

¹⁰ Baari a Ndziami kuna aki o ndzi ma ovuono o ntini ma ampihi vuoŋi oyombo.

¹¹ O ŋa, obaandzi a Nkumu owasihi o paani e Zakari. Nde akihi mo kuoho olumi o nkiina, mpili ma atsuha eyombo.

¹² Zakari omono nde, onguo osi nde bla vuoho bo mini.

¹³ Ŋa obaandzi na nde ndi: «We ka mono vuoho ni Zakari, Ndziami omi yalaha evuoniŋi e we. Okari a we Elisabete adze okula muana a balaha, we adze ompa nde nkuumi e Zan.

¹⁴ We adze omono osuere bo mini. Baari kuna ma adze otsaba me ekulihi e nde.

¹⁵ O miisi a Nkumu, nde adze oka mvuuru onini. Nde aka adze onyua mali a ba, na mali akimaa nkala ni. Oduduma Santi adze oluula o nde ntsa muo a nguhu a nde.

¹⁶ Nde adze osa ndi baana a Isayele avuruha na e Ndziami a Nkumu a bo.

¹⁷ Nde adze oya mva ntuma a Ndziami na oduduma bla mpari Owobi a mbari e Ndziami Eli. Mo oyeese etima ma ataara bla baana. Nde adze okaala etima e baari ma ali i nyiima Ndziami ni. Bo ma adze otsimiŋa mva baari ma ali tele. Nde ayeese baari aka tele o miisi a Nkumu.»

¹⁸ Zakari okaali na obaandzi ndi: «Me oyaa mbri kari dzaa dzaa buni?» Me okubu, okari a me oya okuuru.

¹⁹ Obaandzi okaali nde ndi: «Me Ngabriyele, me okaaha bla Ndziami atumi me na aduha we ntsia e mve.

²⁰ Ŋa we aka yalaha mbari e me ni, we adze oka nkina tii ngo e maami maa ma adze oto.»

²¹ Baari aso ma adilihi nde, akimi lebihi le Zakari ntsa nkiina.

²² Etsuuhi e nde kua, oya i tiha ni, bo ayaa ndi nde omi mono maami a luari ntsa nkiina. Nde oya owobo na bo ma eliemi.

²³ Zakari omana etsuhu e nde e dzandza ntsa ndzo e Ndziami, ovurihi ndzo e nde.

²⁴ Etsuhu ema yira, Elisabete obiri yimi. Osi angondo ataani i tsuuha o ndzi ni. Nde awobo ntsa otima a nde ndi:

²⁵ «Ŋa mono dzaa e Nkumu ami sa o me ma antini ma, nde omi sa me dzaa e mve, nde omi tsiese me okru o miisi a baari.»

Obaandzi atooso ekulihi e Zezi

²⁶ Yimi Elisabete eto angondo asiami, Ndziami otumi obaandzi a nde Ngabriyele ntsa Nazarete, onguundu o Ngalili,

²⁷ mpili ondzambu okaasi a nkuumi Mariya, aki okini onkiina. Ompala Zuzefe, a mo ombisa o nkani Davide.

²⁸ Obaandzi owasihi na e nde ndi: «Suere, mpolo e Ndziami eli bla we, na Nkumu oli bla we se.»

²⁹ Mariya okimi, otsimiŋi ndi: «Bi ewosihi ema?»

³⁰ Obaandzi okaali ndi: «We oka mono vuoho ni Mariya, mpolo e Ndziami eli bla we.

³¹ We adze obira yimi, we okula muana a balaha, we adze oluha nde nkuumi e Zezi.

³² Nde adze oka mvuuru onini, ma adze otsuolo nde o Muana Ndziami a Nkara Yulu. Ndziami a Nkumu adze ompa nde onkani mva eki ombisa o nde Davide.

³³ Nde adze okuuma o yula baari a ndzo e Zakobe, onkumu o nde ma oka adze owa ni.»

³⁴ Mariya okaali na obaandzi ndi: «Kari edze oyira buni? Me kini onkiina.»

³⁵ Obaandzi okaali nde ndi: «Oduduma Santi adze oya o yula we, mpari e Ndziami a Nkara Yulu edze owuha we mva odziiŋi. Kia obila ma adze otsuolo muana a we akula dzua, ma opeende, ma adze otsuolo nde o Muana Ndziami.

³⁶ Nkuono e we Elisabete se, ma atsuolihi ma onguuma oya na yimi angondo asiami ntsa okubu, nde adze okula muana a balaha.

³⁷ Obila Ndziami okuono kali.»

³⁸ Mariya okaali ndi: «Me odzandzi a Nkumu. Ndziami osa ma osuumbu a we aduhi.» Emana obaandzi onyili nde.

Mariya akie Elisabete

³⁹ Etsuhu eyiri, Mariya oyeni asisari onguundu o yulu okuri o Zide.

⁴⁰ Nde onyuniŋi ntsa ndzo e Zakari, owoosi Elisabete.

⁴¹ Ntini Elisabete ayuhi dzuuyi le Mariya, muana ofubi ntsa muo a nde, Oduduma Santi oluuli mo Elisabete.

⁴² Nde wuli nkima nkara yulu ndi: «O yula akaasi aso, Ndziami omi mpa we andosoho, na muana ali ntsa muo a we se.

⁴³ Na me ŋa se mvuuru a nguhu a Nkumu abuuna okie?

⁴⁴ Obila we na owooso me ŋa muana ofubi, osueri ntsa muo a me.

⁴⁵ Osuere oka na we, mvuuru ayalihi maami a Nkumu aduhi, ma adze omono mo!»

Luumu le Mariya

⁴⁶ Mariya ndi: «Oduduma a me akuusa onkani o Nkumu,

⁴⁷ otima a me oli ntsa osuere obila o Ndziami ovusihi a me!

⁴⁸ Nde se ama yibiha me, odzandzi a nde a mvunu kali. Ee, ma obaana o tsuhu e lobi, na antini aso, baari a yula ntsie aso ma duha ndi me eli ntsa osuere,

⁴⁹ ma oma, Ndziami a mpari ama asa maami ma ave, nkuumi e nde opeende.

⁵⁰ Nde oli ove antini aso mo baari ma anyiima nde.

⁵¹ Nde ama laha onkani o nde ntsa mpari: ama tsuura anga etima e kuuna,

⁵² Nde ama buuna ankani ma ambara a bo, emana okuusi baari ma ali na baani.

⁵³ Nde ama mpa anga ndzala biila, otsuuri anga osolo dziala onyaŋa.

⁵⁴ Nde aya na ayamaŋa baari a Isayele, adzandzi a nde: nde aka limiha olaha ove o nde

⁵⁵ o mbumbu na Abraame bla baana ni, mva e nde alehi ndahi na akuuru a saabe.»

⁵⁶ Mariya oki bla Elisabete angondo mbri atari, emana ovuruhi mpuhu e nde.

Ekulihi e Zan Batise

⁵⁷ Ntini ema to, Elisabete okuli muana a balaha.

⁵⁸ Baari ma aki paani e Elisabete bla nkuono e nde, ayuhi ndi Nkumu omi sa nde ove bo mini, bo se asueri bla nde.

⁵⁹ Amana okula muana etsuhu ntsaami eyiri, o mfuomo asi nde sasi, bo asahi oluha nde nkuumi e taara nde Zakari.

⁶⁰ Ŋa nguhu a nde ndi: «Kali, nkuumi e nde edze oka Zan.»

⁶¹ Bo na nde ndi: «Nkuono e we nkuumi dzia kali!»

⁶² Alabi eliemi mpili e taara ma opisa nkuumi e nde asaha ompa muana.

⁶³ Zakari opisi kiila ma oteende, oteendi ndi: «Nkuumi e nde Zan.» Bo aso aya ntsa lekimi.

⁶⁴ O ŋiŋa Zakari oya avuruha owobo, nde oya avuono Ndziami.

⁶⁵ Baari ma aki o paani e bo amoni vuoho, osi o Zide oso o yulu okuri, oya ewobo lo.

⁶⁶ Aso ma ayuhi maami maa, aya ma tsimiŋa, ma pisa abuha ndi: «Muana yu adze oka buni?» Ŋa mpari e Nkumu eli bla nde.

Luumu le Zakari

⁶⁷ Oduduma Santi oluuli o Zakari a taara a muana, oya awobo ma lengulu le Ndziami ndi:

⁶⁸ «Leve le Nkumu, Ndziami a Isayele ma obila o nde ayi na ayamaŋa, na levusaha le baari a nde.

⁶⁹ Nde omitusaha saabe ovusihi onini ntsa ndzo e nkani Davide, odzandzi a nde.

⁷⁰ Nde aki ama biha na otooso na kala, ma enyua ma awobi a mbari e nde ma ali epeende:

⁷¹ Nde ovusihi atusaha saabe o ntsa dziala ma anga ombangu, na o mpari e baari ma ali na mbele e saabe.»

⁷² Nde olahi ove o nde na akuuru a saabe, oyibihi ondihi ma opeende le etini.

⁷³ Ndziami olabi okesi na Abraame a taara saabe,

⁷⁴ ma otusaha saabe ntsa dziala ma anga ombangu, mo bu ndi i ma vuono nde bla vuoho ni,

⁷⁵ mo bu ndi, saabe leka tele ntsa opeende o miisi a nde etsuhu eso ma lebihi le saabe.

⁷⁶ Zakari ovurihi oduhi ndi: «Ŋa we muana me, ma adze otsuolo we ma owobi a mbari e Ndziami a Nkara Yulu.» We adze otsuomo levusu le Nkumu, ma oselehe nde ndzila.

⁷⁷ Ma oduha se na baari a nde ndi, nde adze ovusaha bo, na leboloho la ambiini a bo.

⁷⁸ «Ndziami a saabe ama luula ma oduusu, nde se ove: nde adze olehe saabe oyalala o yulu, mva ebalihi e mui na entsiere,

⁷⁹ ma olaha baari ma ali ntsa lempiibi na odziiŋi a leku, oyalala, ma obira saabe o ndzila oduusu.»

⁸⁰ Muana akula, na oduduma nde se abaha mpari. Nde aki okaha ntsa ebiri e kayi, tii ngo tsuhu e nde ayi o miisi a baari a Isayele.