Dzandza 9 - Obamba Kiwoyeti (mdt) NT Portions

Sole o ndzila e Damase

¹ Sole asahi ni ombangu na lebuma le aluoni a Nkumu. Nde oyeni na amono osi avuoŋi onini.

² Sole opisi nde osaangumu etuma nde ntsa andzo ma avuonoŋo a Damase. Mo bu ndi nde onyuniŋa, omono abalaha si kali akaasi ma luonii ndzila e Nkumu, nde okuari bo, oyeni na bo Zerizaleme.

³ Sole aki okini o ndzila tuha na Damase, o ŋiŋa oyalala owi yulu ekieme, odzeneŋi nde.

⁴ Nde ovi o ntsie, oyuhi dzuuhi leduha na nde ndi: «E Sole, Sole, we asuesehe me ma oma?»

⁵ Nde opisi ndi: «We na, Nkumu?» Dzuuyi lekaali ndi: «Me Zezi a we ali ma osuesehe.

⁶ Ŋa temeŋe we onyuniŋa ntsa onguundu, aduha we osuumbu a we asa.»

⁷ Abuha a nde avusihi ndzila bla bo asuri, aka buuna oduha dzaa si mo ni. Bo aki ma yuha dzuuyi, okoroho bo i mono mvuuru ni.

⁸ Sole otemiŋi onana miisi, nde aka ya i ma mono ni. Abuha ma aki bla nde akuari nde okuoho ayeni na nde Damase.

⁹ Nde osi etsuhu etari nde i mono ni, nde se i dza ni i nyua ni.

¹⁰ Ŋa oluoni a Zezi omo aki o Damase nkuumi e nde Ananiase. Nkumu oduhi na nde o ntsa luoro ndi: «Ananiase!» Ananiase oyalihi ndi: «Me eyu Nkumu.»

¹¹ Nkumu na nde ndi: «Dziehe asisari ma owoombo ma tsuoloho ma owoombo a Tele. O ntsa ndzo e Zida, we opisa balaha e nkuumi Sole osi Tarse oli kua avuono.

¹² Nde omoni balaha ma tsuoloho ma Ananiase o ntsa luoro enyuniŋa, elehe dziala o yula nde, mo bu ndi nde ovuriha omono.»

¹³ Ananiase okaali ndi: «E Nkumu me ema yuha baari kuna ma wobo o balaha dzi. Me yaa obi o nde ama sa epeende e we o Zerizaleme.

¹⁴ Na asi ma avuoŋi ma anini ama mpa nde onkumu ma okura baari ma luonoŋo we endi. Na baari aso ma kasaha nkuumi e we.»

¹⁵ Ŋa Nkumu okaali na nde ndi: «Dziehe na abasaha nde. Obila nde odzandzi a me ema suolo ma owobo o nkuumi e me ntsa esi ma emo, na ankani bla baari a Isayele se.

¹⁶ Me edze olaha nde me anku ampasi a nde adze omono obila o nkuumi e me.»

¹⁷ Ananiase oyeni, onyuniŋi ntsa ndzo, olehi dziala o yula Sole na nde ndi: «Muana nguhu a me Sole, Nkumu mvuuru atumi me. Zezi dzu dzua alahi nyuru na we o ndzila ntini e we alaniŋi. Nde atumi me ndi we vuruha omono, Oduduma Santi se oluula o we.»

¹⁸ O ŋiŋa mpiesi eki o miisi a nde episihi. Nde ovurihi omoni. Nde otemiŋi ampi nde ateeme.

¹⁹ Emana nde odzi biila, obahi mpari. Sole osi aka etsuhu eke bla aluoni ma aki o Damase.

Sole atooso Ntsia e Mve o Damase

²⁰ O ntsi na ntsi ŋa, nde oya atooso mbari ntsa andzo ma avuonoŋo ndi Zezi Muana a Ndziami.

²¹ Baari ma yuhi nde aso akimi aya ma duha ndi: «Yu ka mvuuru asuesihi baari a Zerizaleme, na baari ma busihi nkuumi e Zezi ni? Nde aka aya kuuni okamba ma okura bo endi, ma obira bo mpili asi ma avuoŋi ma anini ni?»

²² Ŋa Sole aselehe owobo bla mpari eso. Nde olehi Azife a Damase ntsa lekimi, ma osuumbu a nde aduhi ndi Zezi aki ni Krisi.

²³ Etsuhu eyira Azife akuri tsuumu ma obuma Sole.

²⁴ Ŋa Sole oyuhi tsuumu e bo ma kuri o nde. Na mui na mpiibi, bo ma kiele enyua ma lepaangu le onguundu, ndi bo abuma nde.

²⁵ Lempiibi lemo aluoni a Sole alehi nde ntsa ngara, bo apiisi nde ngulu obaha lepaangu le onguundu.

Sole o Zerizaleme

²⁶ Sole na oto Zerizaleme, nde osahi obasaha aluoni ma amo, ŋa bo aso aki na vuoho o nde. Obila bo aka yalaha ndi nde se oluoni ni.

²⁷ Barnabase oyahi Sole obiri nde mpili antuma. Na bo ndi: «O ndzila Sole omoni Nkumu. Nkumu se owobi na nde. Sole otoosi kuumi e Zezi na lila leso o Damase.»

²⁸ Ma obaana ma antini maa, Sole oya bla bo, nde adze nde aya bla bo o Zerizaleme. Nde atooso nkuumi e Nkumu na lila leso.

²⁹ Nde awobihi na Azife ma wobiho ngreke. Ŋa bo asahi ni osuumbu ma obuma nde.

³⁰ Ŋa baana ma anguhu ayuha vua, bo abiri Sole mpili e Sezare ma otuma nde Tarse.

³¹ Okuha oya ntsa oduusu o Zide eso, na Ngalili bla Samari. Okuha aki na mpari, anyiima Nkumu, nde akula o mpari Oduduma Santi.

Asalihi Ene

³² Piere ayirihi ma ebiri eso. Nde osurihi na amono epeende ma eli o Lida.

³³ O ŋa nde obasihi balaha mo ma tsuoloho ma Ene, nde akihi oma kuma ntari esibi mfuomo (8) obila nde aki oleme.

³⁴ Piere na nde ndi: «Ene, Zezi Krisi omi salaha we. Temeŋe, yaha ntari e we.» O ŋiŋa nde se otemiŋi.

³⁵ Asi Lida aso bla asi tsehe e Sarone amono vua, bo ayalihi Nkumu.

Piere anyuusa Dorkase ntsa leku

³⁶ O Zope eki na okaasi omo aki oluoni a Zezi, nkuumi e nde Tabita, ma le ngreke otsuolo nde o «Dorkase». Ma oduha ndi «seri». Dzandza e nde eki lesa la leve na leyamaŋa le anga owuha.

³⁷ Ntsa etsuhu bia nde obieri ngaa, okui. Ayohi obiimi, atsuusi tso ntsa otini o ndzo o ŋa yulu.

³⁸ Aluoni ma ali o Zope ayuha ndi Piere oli o Lida, Lida eki la na Zope kali, bo atumi abalaha vuele na aduha ndi: «Kolo kolo e we Piere, dziaha asisari na e bisi.»

³⁹ Piere otemiŋi oyeni bla bo asisari. Nde oto, abiri nde ntsa otini o ndzo o ŋa yulu. Akuuli aso ayi na olila na e nde. Bo alahi nde angoyi bla amfa a Dorkase atuuŋi o ntini e nde aki okini bla bo.

⁴⁰ Piere otusihi baari aso o ndzi. Owuri avuo, oya avuono okalihi mpili obiimi na tso ndi: «Tabita temeŋe!» Nde se onaani miisi omoni Piere, nde osihi oya o ntsi.

⁴¹ Piere okuari nde o kuoho, osaari nde. Nde otsuoli epeende bla akuuli nde olahi bo ndi Tabita ayu, oli muo.

⁴² Asi Zope aso ayuhi dzaa dzia. Baari kuna ayalihi Nkumu.

⁴³ Piere obuhi o Zope. Nde akihi o ndzo e Simon, Simon akihi otuli.