Dzandza 8 - Obamba Kiwoyeti (mdt) NT Portions

¹ Ŋa Sole aki o ŋa, nde se oyalihi leku le Etiene. O tsuhu dzi dzia, aya ma baana osuesehe okuha a Zerizaleme, esuesihi dzo mini. Ayalihi a Zezi atsalihi ntsa Zide na Samari, ongula antuma atu ma siili.

Esuesihi e ntsomi ma okuha

² Baari ma nyimaŋa Ndziami adziihi Etiene. Bo alili nde kuna.

³ Ŋa Sole atsala Okuha. Nde ayira ma andzo aso na okuara akaasi bla abalaha, ma olehe bo ma ongeneŋe.

Filipe atooso Ntsia e Mve o Samari

⁴ Baari ma tsalihi baa, ayirihi na otooso Ntsia e Mve ntsa osi.

⁵ Filipe oto onguundu o Samari, oya atooso Krisi.

⁶ Lemvuuru leso leki dzaa mo, leyi na ayuha mbari e Filipe. Ma oma nde aki asa emaa, bo se ma mono.

⁷ Obila edidima ma ebi etsuuhi o baari kuna, ma ewula ankima. Ebuka bla eleme kuna ewuumi.

⁸ Onguundu kia oya o ntsa osuere ntso mini.

⁹ Ntsa onguundu kia eki na balaha mo, nkuumi e nde Simon. Nde aki oma pasa ati. Baari a Samari akimi, nde anku amoniŋi ndi nde mvuuru a luari.

¹⁰ Baari aso ma dzuusa nde, na enkere na akuuru. Bo ma duha ndi: «Balaha dzi mpari e Ndziami, ma tsuoloho mo “Mpari enini!”.»

¹¹ Baari adzuusihi nde obila nde aki oma biha na olehe bo ntsa lekimi, ma olaha bo epona bia.

¹² Ŋa bo ayalahi mbari e Filipe atoosi bo, Ntsia e Mve e ma Onkani o Ndziami, na o nkuumi e Zezi Krisi, na akaasi na abalaha ayahi ateeme.

¹³ Na Simon se oyalihi Ndziami, emana oyahi ateeme, aka ma nyila Filipe ni. Nde oya mono andiimi ma anini bla emaa e Filipe asihi.

¹⁴ Antuma ma aki o Zerizaleme ayuha ndi asi Samari ami yalaha mbari e Ndziami, bo atumi Piere bla Zan.

¹⁵ Ŋa Piere bla Zan ato Samari, bo avuoni mo bu ndi baari ma ama yalaha Ntsia e Mve abaha Oduduma Santi.

¹⁶ Obila bo aki akini obaha Oduduma Santi ni. Bo ayahi ni ateeme atu o nkuumi e Nkumu Zezi.

¹⁷ O ŋa Piere bla Zan alehi bo dziala o yula etsui, bo abahi Oduduma Santi.

¹⁸ Simon omono ndi antuma ma mpa baari ma ama yalaha Ntsia e Mve Oduduma Santi, o ntini antuma ma lehi dziala o yula etsui e bo, kia obila o nde se asahi ompa bo adoro.

¹⁹ Nde na bo ndi: «Lempa me onkumu vua se. Mo bu ndi baari a me elehe dziala o yula bo abaha Oduduma Santi.»

²⁰ Ŋa Piere na nde ndi: «Na we na adoro a we be lekua! We atsimiŋa mbri puha e Ndziami ma abuuna osuuma ma adoro!

²¹ We i buuna obaha lengulu bla biri o ŋa ni. Obila we otima ka tele o miisi a Ndziami ni.

²² We kaala eku e we ma ebi, we ovuono Nkumu, mo bu ndi nde oboloho we.

²³ Obila me emono mbri we na maami ma abi, we se asiaha mbiini!»

²⁴ Simon okaali na bo ndi: «Levuono Nkumu be anku o me, mo bu ndi maami a be leduhi maa i ya o me ni.»

²⁵ Piere bla Zan amana oduha maami a Ndziami asi o bo, na letooso le mbari e Nkumu, bo avurihi Zerizaleme. Bo ayeni na otooso Ntsia e Mve ntsa ampuhu a Samari kuna.

Filipe avuniŋa bla osi Etyopi

²⁶ Obaandzi a Nkumu owobi na Filipe ndi: «Dziehe na mbere o ndzila esuruha na Zerizaleme ma odze na mpili e Gadza. Ndzila dzia ndzila e kayi.»

²⁷ Filipe oyeni o ŋiŋa. Nde oto o ndzila, nde omoni balaha mo enike osi Etyopi. Mvuuru onini akielehe osolo a Kadase, nkani okaasi Etyopi. Balaha dzia eyi Zerizaleme na avuono Ndziami.

²⁸ Nde aki avuruha na mpuhu e nde. O ntsa saare. Nde aliira osaangumu owobi a mbari e Ndziami Ezayi.

²⁹ Oduduma Santi oduhi na Filipe ndi: «Ciina, we obasaha saare dzua.»

³⁰ Filipe oyeni ma antiini, oyuhi osi Etiopi aliira osaangumu owobi a mbari e Ndziami Ezayi. Opisi nde ndi: «We ŋa ayuha maami a we aliiraha ma?»

³¹ Nde okaali ndi: «Me obuuna oyuha mo buni, yuhu mvuuru abuuna oduha me mo yemihi kali?» Emana nde otsuoli Filipe ma oya na akuma, na aka o ntsi o paani e nde.

³² Obari Osaangumu o Ndziami o nde aliirihi ndi: «Abiri nde mva ondoombo ma adze na atsebe nkii, mva ondoombo eli i kaa ntini ma kuara tso ni. Tso se okaa pi.

³³ Bo abesi nde, nde aka baha opami ove ni. Adze owobo na ndzubu edze oya na? Obila lebihi le nde ama tsiese o yula ntsie.»

³⁴ Osi Etiopi opisi Filipe ndi: «Kolo kolo e we, owobi a mbari e Ndziami aduha maami ma o na? Nde awobo ŋa o nde anku si o mvuuru okima?»

³⁵ Ŋa Filipe oyahi mbari, obaani o biri obari osaangumu o Ndziami elirihi nde, ma otooso nde Ntsia e Mve e Zezi.

³⁶ Bo aluoni ndzila, bo ato o biri eli na okeri. O ŋa enike na Filipe ndi: «Mono okeri, eliha we ompa me ateeme oma?» [

³⁷ Filipe na nde ndi: «We oyalaha ntsa otima a we aso, we abuuna oyaha ateeme.» Balaha dzia ekaali ndi: «E me eyalaha mbri Zezi Krisi Muana a Ndziami.»]

³⁸ Nde otumi mvuuru abiriha saare ndi osura, bo aso a vuele asurihi, ayeni ntsa okeri. Filipe ompi nde ateeme.

³⁹ Bo atsuuha ntsa okeri, Oduduma a Nkumu obiri Filipe. Enike aka ma mono nde ni. Ŋa nde se oluoni ndzila e nde, ntsa osuere.

⁴⁰ Filipe owasihi Adzote, nde atoosihi Ntsia e Mve, ntsa enguundu e nde ayirihi o dzo eso, tii ngo e nde ato Sezare.