Dzandza 7 - Obamba Kiwoyeti (mdt) NT Portions

Mbari Etiene

¹ Osi avuoŋi onini opisi nde ndi: «Maami maduha o we ma sisiele?»

² Etiene okaali ndi: «Baana ma anguhu a me bla ataara a me, leyuha me. Ndziami lekuma amalaha nyuru e nde na Abraame a taara a saabe, ntini ekihi nde o Mosopotami. Nde aki okini odze na aka Saran ni.

³ Ndziami na nde ndi: “Tsiehe osi o we bla nkuono e we, we odze osi o me edze olaha we.”

⁴ Ŋa Abraame otsiehi osi asi Salde, oyeni na aka Sarane. Ŋa taara a nde omana okua, Ndziami oyi na nde ma osi o be leli o tso ki.

⁵ Nde aka nyila nde wanda ni. Nde aka mpa nde se obi biri o ntsie ma otsuusa ntaami ni. Ŋa Ndziami olehi nde ndahi ndi me edze ompa we osi ki, tso edze oka osi o we bla baana. Si ŋa Abraame aki baana kali.

⁶ Ndziami oduhi na nde ndi: “Andaala a we ma adze oka ntsa osi oli ka o bo ni. Bo ma adze oka ayiha, bo amono mpasi lemihi le enkama ma esibi ena 400.

⁷ Ŋa Ndziami ndi me anku mvuuru edze opama osi odze oyaha bo ma ayiha kia. Emana bo atsiehe ma osi kia, bo aya na vuono me o ŋa.”

⁸ Emana Ndziami olehi esibi e mo sasi o mpaniŋi e nde bla Abraame. Sasi dzia ndiimi e ma esibi e mpaniŋi e bo. O ŋa Abraame okuli Izaake, osi nde sasi o tsuhu omfuomo. Izaake se osi Zakobe sasi. Ŋa Zakobe osi baana a nde a kuumi na vuele se sasi. Ma ali ankaha a saabe.»

⁹ Ankaha a saabe amoni Zuzefe mfunuha muo. Atehi nde mva oyiha ŋa osi Ezipte. Ŋa Ndziami aki bla nde.

¹⁰ Nde otusihi nde ntsa ampasi a nde aso. Nde ompi nde mpolo bla ntsimi o mua Faraon, nkani Ezipte. Faraon ompi nde otomi. O yula Ezipte bla ndzo e nde eso.

¹¹ Ŋa Ezipte bla Kanan avi ndzala yo mini. Mpasi eki emivula, ŋa ataara a saabe aki aya biila kali.

¹² Zakobe oyuhi ndi biila eli ŋa Ezipte, nde otumi ataara a saabe o dzue le ntsomi.

¹³ Dzue le odzuele Zuzefe olahi nyuru na akulu a nde. Dzia biri e Faraon adziabi ombisa o Zuzefe.

¹⁴ Zuzefe otumi oyaha taara a nde Zakobe bla nkuono e nde eso. Bo aso aki ekuumi e baari ntsaami na baari ataani (75).

¹⁵ Ŋa Zakobe osurihi Ezipte mpili e nde akui, na ankaha a saabe aso se.

¹⁶ Abiri ebiimi e bo Siseme, adzihi bo o muuma Abraame aki amasuuma na baana ma Amore o Siseme.

¹⁷ Ŋa antini a Ndziami alehi Abraame ndahi aki aya ma tsiina. Baari a saabe aki amiselehe okuna ŋa Ezipte.

¹⁸ Tii ngo e nkani okima ayahi onkumu ŋa Ezipte, nkani dzua aki i yaa Zuzefe ni.

¹⁹ Nkani dzua okiisi baari a saabe, osuesihi ankaha a saabe. Nde otumi bo osuba baana ma kini ma okula kalihi, mo bu ndi bo akua.

²⁰ Dzia eki ntini ma kuli Moyize. Nde aki na owali o miisi a Ndziami. Akieli nde o ntsa ndzo e taara a nde angondo atari.

²¹ Amana osuba nde kalihi, muana Faraon okaasi oyahi muana, okuusi nde mva muana a nde anku.

²² Akuusi Moyize o ntsimi asi Ezipte eso. Nde okirihi mvuuru a baari ma anyimiŋi o mbari bla maami a nde asihi.

²³ Nde oto ekuumi ma esibi ena (40), nde otsimihi ndi nde adze na amono baana ma anguhu a nde, asi Isayele.

²⁴ Nde omoni osi Ezipte omo adzuana bla muana nguhu a nde, Moyize odzuani ma lengulu le mvuuru a nde ma suesihi. Obumi osi Ezipte.

²⁵ Nde atsimiŋi ndi nde abuuna osa ndi abuha a nde ayaa ndi Ndziami adze ovusaha bo mo kuoho o Moyize. Ŋa bo aka yuha ni.

²⁶ Eto na entsiere ma emo, Moyize omoni baari a Isayele vuele madzuana. Nde oyi na akuara bo, na bo ndi: “Abuha a me be mvuuru omo. Be ledzuana ŋa ma oma?”

²⁷ Ŋa mvuuru asi buha obi otsiniŋi Moyize, na nde ndi: “Ampi we onkumu na le pama le maami a bisi na?

²⁸ We asaha obuma me mva o we mbari abumi osi Ezipte?”

²⁹ Moyize oyuha vua odumi, oyeni na adzisiha osi o Madian. Ŋa ondzia kua, nde okuli baana vuele.

³⁰ Ekuumi ma esibi ena eyira (40), o ntsa kayi ma okuri o Sinayi. Obaandzi owasihi o ntsa okikini oti ekaamii mbaa.

³¹ Moyize oya kimimi mo maami a nde amoni. Nde otsiini na akeese, nde oyuhi dzuuyi le Nkumu ndi:

³² “Me Ndziami ataara a we, Ndziami Abraame, Ndziami a Izaake bla Zakobe.” Moyize aki atriha, i buuna okeese ni.

³³ Nkumu na nde ndi: “Tsiese akoroho a we o nyiili, obila biri eli we dzi, ntsie opeende.

³⁴ Me ema mono ampasi a baari a me ma ali ŋa Ezipte. Me ema yuha osue a bo. Me emi ya na avusuha bo. Ŋa dziehe me etuma we Ezipte.”

³⁵ Ŋa Moyize a bo ma aki ma ama bisa na leduha le ndi: “Ama mpa we onkumu na lepama le maami na?” Nde dzudzua a Ndziami atumi ma oka nkumu bla ovusihi a baari, o ngula obaandzi awasihi ntsa okikini oti.

³⁶ Moyize mvuuru asi epuna bla andiimi ma emaa ŋa osi Ezipte bla okeri onini a Ba, na o ntsa kayi lemihi le ekuumi ma esibi ena (40).

³⁷ Nde ni Moyize dzuzua aduhi na asi Isayele ndi: “Ndziami adze osuolo owobi a nde o mpaniŋi e be, adze oka mva me.”

³⁸ Ntini e baari ma kusihi abuha o ntsa kayi, Moyize mvuuru aki o mpaniŋi ataara a saabe bla obaandzi ŋa ewobihi na nde, o yula okuri o Sinayi. Nde mvuuru abasihi mbari lebihi ma oyisiha saabe.

³⁹ Ŋa ataara a saabe aka dia onyiima nde ni. Bo abisi nde, bo avurihi Ezipte ma etsimiŋi e bo.

⁴⁰ O ŋa bo na Arone ndi: “Tula bisi ndziami adze levusu le bisi. Obila Moyize atusihi bisi ntsa Ezipte yu, i ma yaa osuumbu eya nde ni.”

⁴¹ O ntsa etsuhu bia, bo atuli odima o muana ngoombo. Bo ampi odimi kia vuoŋi. Bo asi tsinda, bo asueri mo kiila o bo ma atuli mo dziala e bo.

⁴² Ŋa Ndziami oti bo enguo, onyili bo ma vuono anyari. Mva ma ama teende ntsa osaangumu awobi a mbari e Ndziami ndi: “Baari a Isayele, be lempi anyama bla avuoŋi lemihi le ekuumi ma esibi ena (40) ntsa kayi eki me?

⁴³ Kali, be lemabira olebe a Moloke bla nyari a ndziami a be Refane. Dzo edemi e be lema tula ma ovuono. Kia obila o me etuma be ngula Babilone.”

⁴⁴ Ataara a saabe o ntsa kayi, aki na olebe a bo makielihi osaangumu esibi. Moyize atui olebe dzua ma osuumbu a Ndziami aduhi nde, na a nde amoni se.

⁴⁵ Olebe dzua ampi na ndzubu eluoni ataara a saabe. Bo abiri olebe dzua bla bo o ntini e Zodzue aki nkumu a bo. Bo abuuni eta bla esi e Ndziami atsuuri o miisi a bo. Olebe dzua okaani tii ngo o ntini e Davide.

⁴⁶ Davide aki na mpolo o miisi a Ndziami. Ŋa nde opisi lengulu ma otua ndzo e Ndziami a Zakobe.

⁴⁷ Ŋa Salomon mvuuru atui ndzo e Ndziami.

⁴⁸ Ŋa Ndziami a Nkara Yulu aka kaha ma andzo a baari ma omuo ma tuuŋa o dziala e bo ni. Mva owobi a mbari e Ndziami aduhi ndi:

⁴⁹ “Yulu oma kaha mbara e me, ntsie kiila o ntsina nyiili e me. Nkumu ndi ndzo e be lebuuna otua me ma, dzia biri e me ebuuna oka ma?

⁵⁰ Ŋa biibi bi eso ka me ewaangi o dziala e me ni?”

⁵¹ «Be baari le eli na otsui onono, be lema biinda etima e be bla atsui a be. Be lema bisa Oduduma Santi mbumbu. Be leli ni mva ataara a be.

⁵² Owobi a mbari e Ndziami si omo ataara a be ma aka suesehe ni na? Bo ama buma awobi a mbari e Ndziami ma baani otooso edziihi e Mvuuru ali tele. Ŋa be lema tosoho nde, be se lema buma nde.

⁵³ Be lema yaa angri a Ndziami o ngula abaandzi, okoroho be leka nyiima mo ni!»

Leku le Etiene

⁵⁴ Ankumu ma okuha ayuha mbari dzia abie nkala, aya ma adza mii obila o mbari Etiene.

⁵⁵ Ŋa Oduduma Santi aki oma luula ma Etiene, nde okeese yulu, omoni lekuma le Ndziami bla Zezi se ma otele o kuoho olumi o Ndziami.

⁵⁶ Nde ndi: «Me emono yulu emi naaha, me se emono Muana mvuuru ma otele o kuoho olumi o Ndziami.»

⁵⁷ Bo aya ma wula ankima mo mini, bo abiindi atsui a bo. Bo aso ayi yula Etiene.

⁵⁸ Bo atsiniŋi nde ma otusuha nde ntsa onguundu kia, bo aya matuna nde akele. Baari ma baniŋi nde, atsuusi amfa a bo o ntsina nyiili ma ondzambu a balaha ma tsuoloho o Sole.

⁵⁹ Ntini e bo ma tiniŋi nde akele, Etiene ovuoni ndi: «Zezi Nkumu, yaha oduduma a me.»

⁶⁰ Emana nde oguri avuo, owuli nkima na ankala ndi: «E Nkumu boloho bo o mbiini dzi.» Nde omana owobo vua nde okui.