Dzandza 6 - Obamba Kiwoyeti (mdt) NT Portions

Asuoli baari ntsaami ma odzandza bla antuma

¹ Me etsuhu bia, aluoni aselihi okuna, baari ma wobiho dzuuhi le asi Ngreke aya ma sue mo baari ma wobiho Ebre. Obila asi Ebre aka mpaha akuili ma asi Ngreke biila yemiŋi etsuhu eso, o ntini e bo ma dzandzihi ma okabaha biila ni.

² Antuma a kuumi na vuele akusihi aluoni maamo aso, na bo ndi: «Bisi i buuna osa anyila otooso mbari e Ndziami ma osa dzandza le ma okabaha biila ni.

³ Ŋa lesuolo abalaha ntsaami o mpaniŋi e be baana ma anguhu, ma ali na eku me eve, ma amaluula ma Oduduma, bo se na ntsimi. Mo vua bisi lempa bo dzandza dzia.

⁴ Ŋa o bisi, bisi leselehe ovuono bla dzandza e ma otooso mbari e Ndziami.»

⁵ Okuha aso oyalihi, bo asuoli Etiene, balaha eki ema luula ma oyalihi na Oduduma Santi. Bo asuoli se Filipe, Prokore, Nikanore, Timon, Parmenase bla Nikola osi Antiose a Siri, mvuuru ali ka Ozife ni, ayalihi angri a Moyize.

⁶ Bo alahi abalaha a ntsaami baa na antuma, antuma alehi dziala o yula bo, avuoni o bo.

⁷ Mbari e Ndziami eyeni ntsa onguundu, na otali aluoni okuni o Zerizaleme. Asi ma avuoŋi kuna anyiimi, bo se ayalihi Zezi.

Akuari Etiene

⁸ Etiene omaluula o mpolo bla mpari e Ndziami, nde aki asa epuna ŋa andiimi a luari o mua baari.

⁹ Baari ake a ma andzo ma vuonoŋo ma Azife, ma tsuoloho o Ndzo e baari ma ama vuuha bla asi Sirene, na asi Aleksandri, na baari a Silisi ŋa ma Asi, aya mawobo bla Etiene.

¹⁰ Ŋa bo aki i buuna okemeŋe ntsimi bla ŋa Oduduma a nde ŋa wobihi bla nde ni.

¹¹ Ŋa bo aguri baari ndi baari baa aduha ndi: «Bisi lema yuha nde atuha Moyize bla Ndziami.»

¹² Bo atsiesi baari. Akuuru ma Azife bla ayisihi ma angri, ayi akuari Etiene ayeni na nde mua okuha ankumu ma Azife.

¹³ Bo ayi na baari ma obanaŋa Etiene ndi: «Mvuuru yu okaha ma owobo mbari e mbi o ndzo e Ndziami opeende dzi, na angri a Moyize.

¹⁴ Bisi lema yuha nde aduha ndi Zezi a Nazarete yu atsala ndzo e Ndziami, nde se akaala angri a Moyize anyili saabe.»

¹⁵ Ŋa baari aso ma aki ma okuha dzua, abirihi Etiene miisi. Bo amoni olia o nde oya mva obaandzi.