Dzandza 5 - Obamba Kiwoyeti (mdt) NT Portions

Ananiase bla Safira

¹ Balaha ma tsuoloho ma Ananiase bla okari a nde Safira, ayeesi osuumbu otehe nguunu. Ananiase otehi yo.

² Ma osuumbu a nde bla okari ma ayeesi, nde okieli obari adoro, obari emo nde otsuusi o ntsina nyiili ma antuma.

³ Ŋa Piere na nde ndi: «Ananiase we omimpa otima a we na Sata ma oma? We omikura Oduduma Santi, we omikiele o bari adoro o we atehi lepaangu.

⁴ We aki abuuna okiele lepaangu le we, si kali we aki abuuna otehe lo we okieli adoro ni? Ŋa we oma basaha bia etsimiŋi ntsa otima a we ma oma? We aka kura baari ma o muo ni, ŋa we akuri Ndziami.»

⁵ Ananiase oyuha mbari dzia, nde ovi nde se okui. Baari ma ayuhi dzaa dzia aso amoni vuoho bo mini.

⁶ Endzambu ma abalaha eyi, eyahi obiimi, eporihi ntsa mfa eyeni na adziiha.

⁷ Atari ayiri atari, okari Ananiase oyi nde aki okini oyuha dzaa eyiri ni.

⁸ Piere opisi nde ndi: «Duha me, dzi mvunu e be letehi lepaangu?» Okari okaali na nde ndi: «Ee o mvunu dzia.»

⁹ O ŋa Piere ŋa nde ndi: «We bla olumi a we lemakura tsuumu ma osoŋo Oduduma a Nkumu ma oma? Yuha ekiini e baari mayeni na dziiha oluma a we, bo ali ma onyua a ndzo. Bo se lobi mabira we.»

¹⁰ O ntsi na ntsi ŋa, okari ovi o ntsina nyiili e Piere, nde se okui. Endzambu ma abalaha enyuniŋi emoni obiimi. Bo abiri tso ŋa adziiha o paani olumi a nde.

¹¹ Okuha aso omoni vuoho bo mini, na baari ma ayuhi maami maa se amoni vuoho bo mini.

Antuma ma asa emaa e kuna

¹² Antuma asi andiimi bla epuna o mua baari. Ayalihi a mbari antuma aso akuhi etsui ma oleembe a ndzo e Salomon.

¹³ Ŋa mvuuru okima aka ma tsiina tuha na bo ni, okoroho baari awobihi maami ma ave o bo.

¹⁴ Lemvuuru lekuni, ŋa akaasi na abalaha ayalihi Nkumu.

¹⁵ Atusihi abieri me esyese me ewombo, atsuusi bo o yula ekala. Mo bu ndi Piere oyira ŋa, odziiŋi o nde otiila mvuuru na mvuuru o mpanihi e bo.

¹⁶ Lemvuuru le kuna lewi ntsa enguundu e tuha na Zerizaleme. Bo ayi na abieri na baari ma ali na edidima me ebi ma esosihi bo, bo aso awuumi.

Akuari antuma emana anyasihi bo

¹⁷ Ŋa osi avuoŋi onini bla baari ma aki bla nde ŋa Asadisi, amoni bo mfuniŋa muo, bo ayeesi osuumbu ma osa.

¹⁸ Bo akuari antuma, alehi bo ongeneŋe o miisi a baari aso.

¹⁹ Ŋa na mpiibi, obaandzi a Nkumu onaani enyua ma andzo ma ongeneŋe, otusihi bo, nde na bo ndi:

²⁰ «Ledziehe be leka ntsa ndzo e Ndziami, be letooso baari ntsia e mbari lebihi.»

²¹ Bo ayuha vua, bo ayeni ndzo e Ndziami nkara entsiere etsuhu, bo aya ma ayisiha. Osi avuoŋi onini bla abuha a nde awasihi. Bo akusihi okuha akuuru ma Azife, ma ovunuŋa ma okuha onini a Isayele. Bo atumi oyaha antuma ma ongeneŋe.

²² Ŋa aworo ato ongeneŋe, bo aka mono antuma ni. Bo avurihi na aduha antsia ndi:

²³ «Bisi leto kua ama biinda ndzo ongeneŋe yemihi. Aworo ali ma enyua ma andzo. Ŋa bisi lenaana edibihi, leka basaha mvuuru o ntsa kari ni.»

²⁴ Nkumu akielehe Ndzo e Ndziami bla asi ma avuoŋi ma anini ayuha vua, bo aki aya etsimiŋi otsa o yula antuma. Aya mapisa ndi li lema.

²⁵ Ŋa mvuuru oyi na aduha bo ndi: «Baari a be lelehi ma ongeneŋe ali ntsa ndzo e Ndziami, bo mayisaha baari.»

²⁶ Ŋa nkumu aworo oyeni bla aworo a nde ma odze na ayaha antuma. Bo ayi na avriha na bo yemihi. Obila bo aki na vuoho ndi baari ama tuna bo akele.

²⁷ Bo aya na antuma o mua okuha akuuru ma Azife, osi avuoŋi onini oya alehe bo eduhu.

²⁸ Nde na bo ndi: «Bisi mba leki lema liha be oyisiha o nkuumi e balaha dzia. Ŋa be lemi luusa Zerizaleme ma eyisihi e be. Ŋa be, be lesaha olehe leku le nde o yula bisi!»

²⁹ Ŋa Piere bla antuma maamo akaali ndi: «Ove anyiimi Ndziami, ŋa ka baari ma omuo ni.

³⁰ Ŋa Ndziami a taara a bisi omanyuusa Zezi o ntsa leku. Zezi a be lebumi ma okomo ma lembandzi.

³¹ Ndziami amakuusa nde, amatsuusa nde o kuoho o nde olumi. Zezi Nkumu, nde se ovusihi akaala eku e baari a Isayele, nde se oboloho ambiini a bo.

³² Bisi baari lesiisa enyua o maami maa. Na bisi, na Oduduma Santi a Ndziami ampi baari ma nyimaŋa nde.»

³³ Nkala esi bo o mbari dzia. Bo asahi osuumbu obuma antuma.

³⁴ Ŋa balaha mo etemiŋi o ntsa okuha akuuru ma Azife. Nde aki Ofarizi a nkuumi Ngamaliele, nde se oyisihi angri, baari aso aki ma nyiima nde. Nde otumi ndi asa tusaha antuma.

³⁵ Emana nde oduhi ndi: «Be baari a Isayele, lesa ayiba o dzaa e be lesa baari ba.

³⁶ Ma antini ma lembisa mayiri ma, balaha e nkuumi Tedase ewasihi, oduuhi ndi nde mvuuru ali na okiimi. Enkama e baari ena (400) eluoni nde. Abumi nde, ma aki bla nde aso atsalihi, mvuuru aka masiila si omo ni.

³⁷ Emana dzua, Zida osi Ngalili se owasihi, o ntini ma asihi onteende, nde odziimi baari kuna o ngula nde. Nde se okui. Baari a nde adziimi atsalihi.

³⁸ Ŋa me eduha be, leka ma triha maami a bo ni. Lenyila bo adze. Ma oma, yuhu maami a bo ma asa ma, a mvuuru o muo, mo ma adze owa mo anku.

³⁹ Ŋa yuhu mo ma awa na e Ndziami, be leka abuuna otsala mo ni. Lesa ayiba, tsaaki Ndziami omamono saabe mva abuha a nde ma ombangu!» Bo ayuhi mbari e Ngamaliele.

⁴⁰ Bo atsuoli antuma, abeeri bo ekatsi. Bo avurihi aduhi na bo ndi bo i ma vuriha otsuolo nkuumi e Zezi ni, emana bo anyasihi bo.

⁴¹ Antuma atsuuhi ntsa okuha akuuru ma Azife. Bo asueri ma osuumbu mabesi bo o nkuumi e Zezi.

⁴² Ŋa etsuhu eso o ntsa ndzo e Ndziami, na o ntsa ma andzo a bo, bo ma yisiha, ma atooso Ntsia e mve e Zezi Krisi, Osuoli a Ndziami.