Dzandza 4 - Obamba Kiwoyeti (mdt) NT Portions

Piere bla Zan o mua akuuru ma okuha Azife

¹ Piere bla Zan aki akini ma woɓo na lemvuuru, asi ma avuoŋi bla nkumu aworo a ndzo e Ndziami, ŋa Asadisi awasihi.

² Bo ama bira nkala yo mini, obila Piere bla Zan ma yisiha lemvuuru, bo se ma tooso ndi: o Zezi akui ma buuna onyusiha.

³ Bo akuari Piere bla Zan ma lempiibi lia, alehi bo ongeneŋe, tii ngo entsiere. Obila tsuhu eki eya edzila.

⁴ O ntsa baari ma ayuhi mbari e Ndziami o mpaniŋi e bo kuna ayalighi Ndziami, bo aki ma ato enkama e baari kuumi.

⁵ Bo ama to na entsiere, ankumu ma Azife, bla akuuru ma Azife na ayisihi ma angri, ma kihi o Zerizaleme.

⁶ Eki na Aane a nkumu asi ma avuoŋi onini, na Kayife, na Zan bla Alikisandre ŋa ankuono ma asi ma avuoŋi ma anini aso.

⁷ Bo atumi oyaha Piere bla Zan anyili o mua bo, apisi bo ndi: «Be lesalaghi oleme kia mo mpari bla nkuumi e na?»

⁸ Ŋa Piere omaluula ma Oduduma Santi na bo ndi:

⁹ «Be akuuru bla ankumu a ma ekuha malehe bisi eduhu ma leve le bisi lesi obuka, bo se mapisa bisi osuumbu a balaha dzia ewuumi.

¹⁰ Be aso, na asi Isayele aso se ndi: balaha eli mo tele o mua be dzi ewuumiŋa o nkuumi e Zezi Krisi a Nazarete. Zezi a be lekomi ma lembandzi emana Ndziami omanyuusa nde ompaniŋi akui.

¹¹ Zezi ma kaaha: “kele atsui matini vayi, emi kiriha kele evuli abuha maamo kaama.”

¹² Obila Ndziami aka mpa nkuumi nkima na baari ma o muo o yula ntsie e vusuha saabe ni.»

¹³ Ankumu ma okuha akimi osuumbu a Piere bla Zan mawobihi, ma odzisiha mbari. Bo amoniŋi ndi bo baari ma ali oyaa okiehe, bo ayiimbi ndi ba aluoni a Zezi.

¹⁴ Ŋa bo amono balaha eki ema wuuma o mpaani e Piere bla Zan, bo aka baha dzaa okaala ni.

¹⁵ Ankumu me ekugha atumi otusuha ntsa otini ma Akuuru ma Azife ma pamaŋa baari, aya ma wobo o mpaniŋi e bo

¹⁶ ndi: «Saabe lesa bo buni? Obila bo amasa omaa o mua asi Zerizaleme aso saabe leyaa, saabe i buuna okemeŋe bo ni.

¹⁷ Ntsaaki baari ama selehe odzuusa ntsia dzia. I ma buusa nkuumi e Zezi na mpini mvuuru ni.»

¹⁸ Bo atsuoli Piere bla Zan, alihi bo ndi: «Be i ma buusa na oyisiha nkuumi e Zezi ni.»

¹⁹ Ŋa Piere bla Zan akaali na bo ndi: «Eli yemighi o miisi a Ndziami oma? Lenyiima le be si lenyiima le Ndziami, lepama be anku.

²⁰ Ŋa bisi i buuna oka pi o maami a bisi lemoni na a bisi leyuhi ni.»

²¹ Ankumu me Azife avuririhi abie na bo emana anyasihi bo, obila bo aka basaha dzaa e bo maliisa bo o yo ni. Ma oma, baari aso aki ma kuusa Ndziami o maami mayiri.

²² Balaha ma asi omaa nde owuumi dzua, aki abuuna onyura ekuumi ma esibi ena.

Okuha avuono

²³ Amana onyasaha bo, Piere bla Zan ayeni mpili abuha a bo, adughi na abugha a bo maami ma nkumu ma asi ma avuoŋi ma anini, na ma akuuru ma Azife ma duhi bo.

²⁴ Baari ma ayuhi mbari antuma dzia, aso avuoni otima omo ndi: «E Nkumu, we mvuuru awaangi yulu bla ntsie, na okeri onini, na ma eli o yula ntsie eso.

²⁵ We mvuuru atumi Oduduma Santi ma owoɓo ma onyua a Davide a nkaha a bisi ali odzandzi a we mbri: “Esi ma enyuha ma oma? Etsimiŋi ma otsa o mpaniŋi e baari buni?

²⁶ Ankani a yula ntsie amitemeŋe, ankumu se amivunuŋa mvuuru omo mo mbele e Nkumu bla osuoli a nde.”

²⁷ Obila me edugha be asisiele, Erode bla Posi Pilaate amivunuŋa o ntsa onguundu ki, bla andzia na ankumu ma esi ekima, bla asi Isayele o mbele Zezi odzandzi a we opeende, a we aki ŋa suoli.

²⁸ Bo asi vua, ma olaha maami aso a we aki ama baana oyeese mo mpari na ediŋii e we.

²⁹ Ŋa o ŋa nkumu, mono osuumbu a bo maŋaana bisi. Mpa adzandzi a we lengulu ma otooso mbari e we na lila leso.

³⁰ Laba kuoho o we, mo bu mbri abieri awuuma amono andiimi ma emaa bla epuna o nkuumi e Zezi odzandzi a we opeende.»

³¹ Bo amana ovuono, biri e bo ma kihi eya enyuha, Oduduma Santi oluuli o bo aso. Bo aya ma tooso mbari e Ndziami na lila.

Ayalihi a mbari antuma ma kabaha biibi o mpaniŋi e bo

³² Baari kuna ma yalihi mbari aso aki aya otima omo, edidima se emo. Bo si mvuuru aka amaduha ndi: «Bi biibi e me otu ni.» Ŋa bo avusihi biibi me eki na bo eso biri mo.

³³ Bla mpari yo mini, antuma aya ma siisa enyua e ntsia e ma enyusihi e Zezi a Nkumu. Ŋa mpolo e Ndziami yo mini eki bla bo aso.

³⁴ Mpini mvuuru o mpanihi e bo aka kaama kiila ni. Obila baari ma aki na apaangu si kali andzo atehi, bo ayi na adoro a bo ma tehi biibi.

³⁵ Bo atsuusi o ntsina nyiili ma antuma, emana bo akabihi mvuuru na mvuuru obahi e nde buhu aki na kaama o yo.

³⁶ Ŋa Zuzefe, antuma ma aluhi nkuumi e Barnabase ma oduha ndi: «Mvuuru akoosoho abuha», osi Levi ma akuli o Sipre.

³⁷ Nde aki na lepaangu. Nde otehi lepaangu le nde, oyi na atsuusa adoro o ntsina nyiili ma antuma.