Dzandza 3 - Obamba Kiwoyeti (mdt) NT Portions

Piere bla Zan ma salaha obuka

¹ Tsuhu mo Piere bla Zan aki ma adze na vuono o ndzo e Ndziami, atari aki amiyira atari ŋa ngula ndzanga.

² Ŋa tuha na odibihi onyua a ndzo e Ndziami, ma tsuoloho «Ma odibihi o wali», eki na balaha mo eki obuka ma asi kuluha nde. Etsuhu eso adzihi na nde na tsuusa o ŋa. Nde aki dzandza mpahi.

³ Nde omono Piere bla Zan, ma nyuniha ntsa ndzo e Ndziami, nde ovurihi osi mpahi dzi dzia.

⁴ Ŋa Piere bla Zan akeesi nde yemiŋi. Piere na nde ndi: «Keese bisi!»

⁵ Balaha dzia ekeesi bo yemiŋi, nde aki ndi bo ma ampa nde kiila.

⁶ Ŋa Piere na nde ndi: «Me adoro bla akele a mvunu kali, ŋa me empa we me eli na me. O nkuumi e Zezi Krisi a Nazarete: temeŋe we olaana!»

⁷ Ŋa Piere okuari nde mo kuoho olumi, osaari nde. O ŋiŋa nde nyiili bla esisa eyami.

⁸ Nde otimi, oya ma otele olaani. Nde onyuniŋi bla bo ntsa ndzo e Ndziami. Nde alaana, nde atimia, nde akuusa Ndziami.

⁹ Baari aso amoni nde alaana, akuusa Ndziami.

¹⁰ Bo ayiimbi ndi yu mvuuru akihi o ntsi mo onyua a ndzo ma tsuoloho mo odibihi e wali o ndzo e Ndziami mo mpahi. O ŋa baari aso amoni vuoho aya ntsa lekimi, ma osuumbu a maami ma ayiri o nde.

Piere ayisiha o ntsa ndzo e Ndziami

¹¹ Ŋa balaha dzia eka ma nyila Piere bla Zan ni, baari aso aya o ntsa lekimi, baari aya ma aya mpili e bo. Bo aya ma oleembe, ma tsuoloho ma «Oleembe a Salomon.»

¹² Ŋa Piere omono vua nde na bo ndi: «Be baari a Isayele, be lekima o maami ma ayiri ma ma oma? Be lekesehe bisi vua ma oma? Be letsimiŋa mbri saa Zan baari lesi mvuuru dzua olaana o mpari e bisi anku, si kali ma osuumbu a bisi lenyimaŋa angri a Ndziami?

¹³ Ndziami Abraame bla Izaake na Zakobe, Ndziami ankaaha a saabe, omakuusa lekuma lo odzandzi a nde Zezi. Ŋa be, be lema mpa, lema bisa nde o miisi a Pilaate. Ŋa mo Pilaate, nde aki amaduha ndi anyasaha nde.

¹⁴ Be lemabisa mvuuru ali opeende, nde se oli tele. Ŋa be lemapisa mbri asa obumi baari mpolo, anyasaha nde.

¹⁵ Be lemabuma nkumu lebihi, ŋa Ndziami omanyuusa nde o mpaniŋi akui, bisi baari lesiisa enyua e mo nde.

¹⁶ Ŋa ma oyalihi o ma nkuumi e Zezi, nkuumi dzia esalihi balaha e be lemono o mua be dzi. Be se leyaa nde. Oyalihi o ma Zezi, oma salaha balaha dzi o mua be aso.

¹⁷ Ŋa baana ma anguhu a me, me yaa mbri be bla ankumu a be lesi vua, obila be leki i yaa ni.

¹⁸ Ŋa Ndziami aki oma baana otooso, me enyua ma awobi a mbari e Ndziami aso ndi: Krisi a nde, adze omono ambaba. Ndziami se osi vua.

¹⁹ Lekaala eku e be, be leyalaha Ndziami, ŋa Ndziami odiisa ambiini a be.

²⁰ O ŋa Nkumu osa be lewuuma, ma antini a nde adze otuma be osuoli Zezi, a Krisi.

²¹ Ŋa ma antini ma, ove nde osa ka o yulu, tii ngo o ntini ma kaala maami aso, mva o nde atoosi ma enyua ma awobi a mbari e Ndziami a kala ma ali epeende.

²² Moyize oduhi ndi: “Ndziami a Nkumu asuolo o mpaniŋi e be owobi a mbari e Ndziami a mva me, be le edze oyuha nde mo maami a nde aduha be aso.

²³ Ŋa baari aso ma bisa oyuha owobi a mbari e Ndziami dzua, ma buma bo, bo anyuoŋo o mpanihi abuha.

²⁴ Ma obaana o ntini e Samiele, awobi a mbari e Ndziami aso amabaana otooso, mvuuru na mvuuru maami leya lemono ntsa etsuhu bi.

²⁵ Be baari leli baana ma awobi a mbari e Ndziami, be se baana ma esibi. Esibi e Ndziami alabi o mpaniŋi e nde bla ankaaha a be, o ntini e nde aduhi na Abraame ndi: ankuono a yula ntsie aso ma baha andosoho o ngula baana a nde.”

²⁶ Ndziami atumi odzandzi a nde levusu eki o be, ma ompa be andosoho, mo bu mvuuru na mvuuru okaala eku e nde.»