Dzandza 28 - Obamba Kiwoyeti (mdt) NT Portions

Pole o ndubu e Malte

¹ Bisi levuuha, bisi leyuhi ndi ndubu dzia nkuumi Malte.

² Baari a ma mpuhu dzia ayambi bisi yemiŋi. Bo anaasi mbaa enini, bo ayambi bisi ma osiese a mbaa enini dzia. Obila mvula aki aya anoho, mpebe se eki esa.

³ Pole otoniŋi eti ma ekaa kaa, otuni o mbaa. Ŋa mono mpili atsuuha o ntsa nkuyi obila o mbaa, okaari Pole o kuoho.

⁴ Baari ma aki o ndubu dzia amoni mpili oma kaara o kuoho o Pole, bo aya ma wobo o mpaniŋi e bo ndi: «Balaha dzi ŋa obumi baari. Nde aka akua ntsa okeri onini ni, ŋa opami a Ndziami aka nyila nde oka muo ni.»

⁵ Pole onyusuhi kuoho, ntaari ovi o mbaa, nde aka yuha ngaa se mvabu ni.

⁶ Abuha amoniŋi ndi nde nyuru ebiima, si kali nde ava, okua o ntsi na ntsi ŋa. Bo adili kuna ŋa Pole aka yuha ngaa ni. Bo akaali etsimiŋi, o ŋa bo ndi nde «ndziami!»

⁷ O paani e biri dzia eki na ndzo e nkumu a ndubu. Nkuumi e nde Pibliyise. Nde oyambi bisi o ndzo e nde mva andihi a nde, le mihi le etsuhu e tari.

⁸ Taara a Pibliyise aki o tolo, na obaa bla mbula. Pole oyeni na amono nde. Pole ovuoni, olehi dziala o yula o tsui a nde. Nde owuuni.

⁹ O ŋa abieri akimaa ma ndubu dzia se ayi na e Pole. Nde se osalihi bo.

¹⁰ Baari aki ma kuusa bisi kuna. Ntini e bisi le kumiŋi o mbuungu, bo ampi bisi biibi le eki na kaama o dzo ma opiinga.

Pole oto Rome

¹¹ Angondo atari ayira, bisi lekumi o mbuungu ŋa Aleksandri edilihi ntini e mpebe e kuna o sabi e ndubu. Mbuungu dzia ekihi na ndiimi «Adioskire».

¹² Bisi leto Sirakise, lesi etsuhu etari o ŋa.

¹³ O ŋa, lepori osiese okeri, leto Redzio. Eto na entsiere, piebi eki eya ewa na mbere. Etsuhu dziele eyira bisi leto Pudzole.

¹⁴ O ntsa onguundu kia lebasihi baana ma anguhu. Bo atsuoli bisi ma osa etsuhu ntsaami bla bo. Dzua osuumbu a bisi leyeni Rome.

¹⁵ Baana ma anguhu a Rome ayuha ndi bisi le eya, bo ayi na aviniŋa na bisi tii o Dzandu le Apise bla maamo ma ayi o biri ma tusoloho ma andzo ma andzia ma atari. Pole omono bo, ompi Ndziami leve. Nde oyaasi nyuru.

¹⁶ Bisi leto Rome, alehi Pole ma e nde ndzo. Bla ŋa oworo akielihi nde.

Pole atooso Ntsia e Mve o Rome

¹⁷ Etsuhu etari eyira, Pole otsuoli ankumu ma Azife a Rome o ndzo e nde. Ntini e bo ma kusihi abuha, nde oduhi ndi: «Baana ma anguhu a me, me eka asa dzaa e mbi o baari a saabe, si kali ma lewaanga le ankaha a saabe ni. Okoroho bo akuari me o Zerizaleme, ampi na asi Rome.

¹⁸ Bo amana olehe me eduhu. Bo asahi onyasaha me. Obila bo aka mono dzaa ma buuna obuma me o yo ni.

¹⁹ Ŋa Azife aka yalaha ni. Kia obila o me etsuoli Sezaare. Ma oma, me eki ndzala obanaŋa baari a me kali.

²⁰ Kia obila o me esahi omono be, me ewobo bla be. Be leyaa lila le baari a Isayele. Me ama kura ankoso ŋa o lo.»

²¹ Ankumu ma Azife akaali ndi: «Bisi leka basaha osaangumu o we ewa ŋa Zide ni. Muana nguhu a bisi se omo aka aya na duha bisi antsia ma abi o we ni.

²² Ŋa bisi lesaha mbri we anku we oduha a we ŋa tsimiŋa. Ma oma, bisi leyaa mbri baari ma aduha maami ma abi ma okuha dzua.»

²³ Bo asuoli tsuhu ma ovuniŋa bla Pole. Tsuhu dzia bo ayi akuna kuna na amono Pole o ndzo e nde. Ma obaana entsiere tii eki kolo, Pole owobo na bo, atooso bo Onkani o Ndziami. Nde awobo bo o Zezi, nde se asa ndi bo ayalaha nde. Nde aliira angri a Moyize bla esaangumu ma awobi a mbari e Ndziami.

²⁴ Ake ayalahi a nde aduhi, maamo abisi oyalaha.

²⁵ Ntini e bo mavurihi, bo aka yuha abuha o mpaniŋi e bo ni. Pole oduhi bo dzaa mo ntu ndi: «Oduduma Santi aki na mpieme, e nde aduhi na ankaha a be ma onyua owobi a mbari e Ndziami Ezayi.

²⁶ Nde oduhi ndi: “Dziehe na amono baari ba, we oduha bo mbri Be leedze ota tsui, okoroho be leka adze oyuha ni. Be leedze okeese yemiŋi, okoroho be leka adze omono ni.

²⁷ Obila baari ba ndzala oyuha kali. Bo ama diba atsui a bo, bo se ama diba miisi a bo. Bo aki ndzala omono o miisi a bo anku kali. Bo se aki dzala oyuha ma atsui a bo anku kali, bo ndzala oyuha bla otima a bo kali. Bo aki ndzala okalaha na e me kali. Kia obila o me eka buuna osalaha bo ni.”»

²⁸ Pole oluusi ndi: «Ove be ledziabi dzaa mo ntu. Ndziami atumi Ntsia e Mve ovusihi, mo baari ma ali ka Azife ni. Bo ma adze oyuha nde!» [

²⁹ ]

³⁰ Pole oki esibi dziele ma etsiina, o ndzo e nde awurihi. Nde se ayamba baari aso ma aya na amono nde.

³¹ Nde atooso Onkani o Ndziami, nde se ayisiha maami a mo Zezi Krisi a Nkumu nyengele bla lila le eso.