Dzandza 27 - Obamba Kiwoyeti (mdt) NT Portions

Ma tuma Pole Rome

¹ Ntini ma kuri ndi bisi ledze Itali, ampi Pole bla engeneŋe eke na nkumu aworo a Rome a nkumu onkama 100 aworo ma tsuolihi o Zilise. Nde oli ma odzu aworo ma «dzandziha mo Sezaare».

² Bisi lekumi o ntsa mbuungu ma onguundu ŋa Adramite, ma odze sabi e ngaala Asi. Emana bisi leyeni. Aristake aki bla bisi, nde aki osi Maseduane a Tesalonike.

³ Eto na entsiere, bisi leto Sidon. Zilise akielihi Pole ma osuumbu ove. Nde onyili Pole oyeni ŋa amono andihi a nde, mo bu ndi bo ayamaŋa nde.

⁴ Emana levirihi, leyiri ma le andubu a Sipre, obila piebi eki ema vula kuna.

⁵ Levuuli okeri onini osiese a Silisi bla Pamfili, leto Mire o Lisi.

⁶ O ŋa oworo osi Rome obasihi mbuungu Aleksandri, eyeniŋi ŋa Itali. Nde olehi bisi o ntsa mbuungu dzia.

⁷ Etsughu kuna eyiri, mbuungu enini odziehe ŋa ni oke oke. Eki na mpasi yo mini ma oto onguundu o Kinide. Piebi eki eliha bisi ma odze ma otsui kia. Ŋa bisi leyiri ma obari andubu a Krete, ma okia ma le Salemone.

⁸ Bisi leluoniŋi sabi ŋa na siami eso, leto biri ma atsuoloho mo Bopore o paani onguundu o Lase.

⁹ Ŋa bisi lebuhi o ndzila, leka ma buuna owunuŋa na opiinga ni. Obila tsuhu Ongerehe eki emi yira. Ŋa Pole aki asaha owobo na bo ndi:

¹⁰ «Adihi a me, me emono mbri saabe opiinga yu ove kali. Mbuungu bla biibi ma ebiiya. Na saabe se lebuuna okua.»

¹¹ Ŋa nkumu aworo a Rome olehi lila ma oduhi mbuungu bla onga mbuungu, nde obengili mbari e Pole. Nde olehi tari o nkumu aworo bla onga mbuungu.

¹² Ongula ŋa, dzia eki ntini e mpebe e nkala, baari kuna aki ndzala oka o sabi dzia kali. Baari a ntsa mbuungu kuna ayalihi otsiehe ŋa. Bo aki na ndzala oto Fenikse sabi e Krete. Sabi dzia ema sunaha na mbere mpili e kuoho o mboho, bla ntaana mpili e kuoho o mboho. Bo ma saha oka kua o ntini e mpebe e nkala.

Okru o mua okeri onini

¹³ Opipiebi oki ewa na mbere. Baari a ntsa mbuungu atsimiŋi ndi bo ma buuna osa maami a bo ma kuri. Bo ayeni, aya ma saha oporo osiese a Krete.

¹⁴ Antini ayira ntseeri, okru ma tsuoloho ma erakilon oyi oyula bo.

¹⁵ Okru obiri mbuungu, mbuungu eki eya i ma buuna odze ni, mo mpari okru. Bisi lenyili piebi eyeni na bisi, ŋa bisi lesahi obunuŋa.

¹⁶ Bisi leyiri osiese a ndubu enkiehe, ma tsuolihi o Koda. O ŋa, bisi lebuuni oduha mbuungu e nkiehe na siami eso.

¹⁷ Bisi lekuusi mbuungu enkiehe o ntsa mbuungu enini. Emana adzandzi a ntsa mbuungu akuri endi ma ekuara mbuungu enini. Bo amoni vuoho ma odze na ava ma ondzeyi a sabi e Sirte. Bo apiisi nkoso ekuriha mbuungu, aya ma selehe obunuŋa.

¹⁸ Eto na entsiere okru oselehe onyisiha bisi na mpari eso. Kia obila o bo ma tuniŋi biibi ntsa okeri onini.

¹⁹ Tsuhu o tari, adzandzi a ntsa mbuungu apiisi biibi e mbuungu mo dziala e bo anku.

²⁰ Etsuhu kuna eyiri, aka mono mui bla anyari ni. Okru okini na mpari. Bisi leka ma yaa mbri levuuha ni.

²¹ Bo aki ami biha na ndzala, kiila ma odza kali. Ŋa Pole otemiŋi ma otele o mua baari aso, na bo ndi: «Adihi a me, be kaa leyuhi a me, be se kaa leka tsiehe o Krete ni. Kaa biibi eka biiya ni, kaa dzo se eka nyuoŋo ni.

²² O ŋa, me eduha be ma oyaasa anyuru a be. Obila saabe mvuuru se omo aka dze okua ni, ongula mbuungu edze obiiya.

²³ Me mvuuru a Ndziami, me se odzandzi a nde. Lempiibi le lobi li, obaandzi a nde oma aya na e me.

²⁴ Obaandzi na me ndi: “Pole we oka monoŋo vuoho ni! Ma adze opama we o mua Sezaare. Obila o we, Ndziami oma nyila baari ma ali bla we ma opiinga muo.”

²⁵ Andihi a me, leyaasa anyuru! Me ŋa tari o Ndziami. Maami ma yira ma osuumbu a Ndziami aduhi me.

²⁶ Saabe le edze na va o sabi e ndubu mo.»

²⁷ Eki ma lempiibi le okuumi na ona 14, le okru ebirihi bisi ma okeri onini ma tsuoloho ma Adriatike. Ŋa otima lempiibi, adzandzi a ntsa mbuungu atsimiŋi ndi saabo leya letsiina tuha na ntsie.

²⁸ Bo akuri nkoso ma ondi, atuni ma andza. Bo amoni ndi ametre akini ola ekuumi etari na ametre ntsaami 37 e dzina. Bo atsiina na vusu bo avirihi atuni nkoso dzia ma andza, bo amoni ndi ametre ami kubuha, aya ekuumi dziele na ametre mfuomo 28.

²⁹ Bo aki na vuoho ndi mbuungu ema tiila ma akele. Kia obila o bo ma tuni ankoso ana na lembisa, bo aya ma dila etsihi e tsuhu asisari.

³⁰ Adzandzi a ntsa mbuungu ayahi mbuungu e nkiehe alehi ma okeri onini ma osaha oduma. Bo aya ma duha ndi: «Bisi leedze na atuna ankoso na levusu le mbuungu.»

³¹ Pole oduhi na nkumu aworo bla aworo ndi: «Baari ba obisa oka ntsa mbuungu, be leka vuuha ni.»

³² O ŋa aworo atsebi endi e mbuungu enkiehe, anyili yo eyeni mua okeri onini.

³³ Tsuhu eki kini otsa ni, Pole otsuoli baari aso na adza. Nde oduhi bo ndi: «Lobi etsuhu eya kuumi na ena 14 e be lediliha. Be se lema aka kiila ma odza kali.

³⁴ Me etsuolo be ma oyaha biila, be na kaama o dzo ma ovuuha. Ma oma, mvuuru se omo o mpaniŋi e be aka yele si lemfu le mo le mo otsui a nde ni.»

³⁵ Pole omana owobo vua, oyahi lepeembe, ompi Ndziami leve o miisi a baari aso. Emana okabihi nde se oya adza.

³⁶ Bo aso ayaasi anyuru, aya ma adza se.

³⁷ Bisi leki enkama e baari dziele na ekuumi baari ntsaami na baari asiami (276), o ntsa mbuungu.

³⁸ Bo amana odza, adzurihi, bo atuni ble ma okeri onini, mo bu ndi mbuungu eyebehe.

Mbuungu ebuniŋa

³⁹ Tsuhu etsa, adzandzi a ntsa mbuungu aka yiimba ntsie ni. Bo ataali sabi mo eki na ondzeyi. Bo ayeesi ma obira mbuungu kua yuhu bo aki ma buuna.

⁴⁰ Kia obila o bo ma naani ankoso, anyili ntsa okeri onini. Bo se atsebi endi ma oti atsiisi mbuungu. Bo alehi mfa levusu le mbuungu. Pyebi se etsiisi bo tii sabi.

⁴¹ Ŋa bo atiili na ondzeyi, mbuungu eyarihi, lemvusu le mbuungu lenyuniŋi ntsa ondzeyi. Mbuungu eki eya i buuna ofuba ni. Epuhi e nkala etsali lembisa le mbuungu.

⁴² Aworo asahi obuma engeneŋe, ma oduma bo ama duma ma oyoho.

⁴³ Ŋa nkumu aworo a Rome, aki na ndzala ovusiha Pole. Nde olihi aworo ma osa dzaa e bo ma ayeesi dzia. Nde otumi baari ma adziabi oyoho ova ma andza levusu, ma odze tii ntsie.

⁴⁴ Abuha maamo aluono bo o yula epaandza bla ebari e mbuungu. Mo bu ndi baari aso avuuha, bo se ato ntsie yemiŋi.