Dzandza 26 - Obamba Kiwoyeti (mdt) NT Portions

Pole awobo ma lengulu le nde anku o mua Agripa

¹ Agripa na Pole ndi: «We abuuna owobo ma lengulu le we anku.» Ŋa Pole se osaari kuoho oya awobo. Oduhi ndi:

² «Me emi mono ove lobi nkani Agripa, o me ewobo o mua we mo maami a baana ma anguhu a me ma Azife ma baniŋi me.

³ Obila we odziabi maami ma lewaanga le Azife bla ewobihi e bo. Mo vua, me episa we kolo kolo ma oyuha me yemiŋi.

⁴ Azife aso adziabi lebihi le me, esi wa me obusi. Bo ayaa osuumbu a me ekuli bla baari a me o Zerizaleme.

⁵ Me eki ntsa okuha Afarizi avuli maami a Ndziami onono. Bo adia bo ma buuna osiisa enyua. Ma oma, bo ama biha na oyaa me ntsa okuha.

⁶ Ŋa bo ma pama me lobi ŋa, obila me ŋa lila o ndahi e Ndziami alehi a taara a bisi.

⁷ Ankaka a kuumi na muele a baari a bisi se, na lila o ndahi dzia, bo ma dzandza ŋa mui ŋa mpiibi o Ndziami. Nkani Agripa, kia obila Azife ma banaŋa me.

⁸ Be ma Azife, be ndzala oyalaha mbri Ndziami anyuusaha akui kali ma oma?

⁹ Me anku etsimiŋi mbri me ebuuna osa ombangu ma angulu aso, o nkuumi e Zezi a Nazarete.

¹⁰ Maa a me esi o Zerizaleme. Me elehi baari ma ali epeende kuna ongeneŋe. Ankumu ma asi ma avuoŋi, baari ma tumi me osa vua. Ntini ma duuhi ndi abuma bo me yalihi.

¹¹ Me eyirihi ntsa andzo ma vuonoŋo aso. Me esuesihi bo. Me empi bo okura ma otuha Zezi a Nkumu. Me eki ema bie nkala yo mini na bo. Me etsuuri bo tii ntsa enguundu ma andzia.»

Pole aduha osuumbu a nde ayalihi Zezi

¹² «Kia obila o me eyeni Damase tsuhu mo. Ankumu ma asi ma avuoŋi atumi me kua bla ŋa onkumu oso.

¹³ Nkani Agripa me eki o ndzila, tari eki eya o mua ndzanga, me emoni oyalala owa ŋa yulu. Ekiemiŋi e tso evuli ekiemiŋi ma oyalala o tari. Oyalala kia ekieme odzeniŋi saa na abuha a me ma opiinga.

¹⁴ Bisi aso levi o ntsie, me eyuhi dzuuyi le wobo na me o dzuuyi la Azife ndi: “E Sole, Sole, we asuesehe me bu ma oma? We i buuna odzia empara o yula antsiene ni!”

¹⁵ Me pisi mbri: “E Nkumu we na?” Nkumu okaali me ndi: “Me, Zezi a we ŋa suesehe.

¹⁶ Ŋa temeŋe! Mono obila o me elahi nyuru na we. Me ema suolo we mo bu mbri we oka odzandzi a me. We mvuuru adze osiisa enyua, ma otooso osuumbu a we amoni me lobi. We se adze otooso a me edze ovuriha olaha we.

¹⁷ Me edze ovusiha we, me se ekiele we o mua Azife na baari ma ali ka Azife ni.

¹⁸ Ŋa we onaana bo miisi, bo atsuuha ntsa lempiibi bo aya na avuriha ma oyalala. Bo ma aka ma ka o ntsina onkumu o Sata ni. Ŋa bo ma aya na vuriha na e Ndziami mo bu ndi aboloho ambiini a bo. Bo se abaha o bo obari o wanda bla baari ma ali epeende o bila ma oyalihi o bo o ma me.”»

Pole awobo mo dzandza le nde

¹⁹ «O ŋa nkani Agripa, me eka bisa maami a me emoni ma wi yulu ni.

²⁰ Ŋa me ebaani otooso na asi Damase, bla Zerizaleme na asi Zide bla baari ma ali ka Azife ni mbri: “Lekaala eku e be, be leyalaha Ndziami. Lesa maami ma ave ma olaha mbri be lemi kaala eku.”

²¹ Kia obila Azife ma akuari me o ntsa ndzo e Ndziami, bo asahi omana na me.

²² Ŋa tii o lobi, Ndziami ama yamaŋa me. Me eselehe osiisa enyua o maami a nde o mua baari aso, na enkere na akuuru. Awobi a mbari e Ndziami bla Moyize aki ama wobo o maami ma adze oya. Ŋa me eka ma duha dzaa nkima ni.

²³ Me eduha eso ni mbri: Krisi omoni ambaba, nde mvuuru anyusihi ntsomi ntsa leku. Ove nde otoosi oyalala na Azife bla ŋa baari ma ali ka Azife ni.»

Pole atuma Agripa oyalaha Zezi

²⁴ Pole aki okini awobo vua, Festise owuli nkima ndi: «Pole we na lari! We oma sa lekoole kuna, lo lemi mpa we lari!»

²⁵ Pole okaali nde ndi: «Me ka lari ni nkani Festise. Me eduha ŋa mbari e ntsimi bla asisiele.

²⁶ Nkani Agripa oyaa maami ma aso, kia obila o me ewobo bla lila o mua nde. Me etsimiŋa mbri nde i buuna olimaŋa dzaa se mo ni. Obila mo aka yira ma adzisihi ni.

²⁷ E nkani Agripa, we ayalaha mbari awobi a mbari e Ndziami? Ee me eyaa mbri we ayalaha.»

²⁸ Agripa okaali Pole ndi: «We atsimiŋa mbri we abuuna osa me okiriha okritie paraabu ŋa!»

²⁹ Pole okaali nde ndi: «Yuhu Ndziami ayamaŋa, se lobi se osuuha, me esaha ŋa vua. Na we, na be aso leyuha me lobi. Me esaha mbri be leka mva me, ŋa ka bla ankoso ma ni!»

³⁰ Na nkani, na lepatima, na Berenise, bla baari ma aki bla bo atemiŋi.

³¹ Bo atsuuhi o ndzi, aya ma wobo o mpaniŋi e bo ndi: «Balaha dzi eka sa dzaa ma buuna obuma nde oyo si kali ma lehe nde ongeneŋe ni.»

³² Agripa na Festise ndi: «Leki lebuuna otusuha nde, ŋa nde ama tsuolo Sezaare.»