Dzandza 25 - Obamba Kiwoyeti (mdt) NT Portions

Pole o mua Festise atuma otsuolo Sezaare

¹ Etsuhu etari ma eyi Festise o ntsa ngaala dzia, nde owi Sezare okumi Zerizaleme.

² O ŋa ankumu ma asi ma avuoŋi bla akuuru ma Azife ayi o mua nde, bo asi nkomoŋo ma ososo Pole ŋa e nde.

³ Bo apisi Festise kolo kolo ma otuma Pole oya na avuriha Zerizaleme. Ŋa dzua aki oyere a bo ma kuri ndi bo abuma Pole o ndzila.

⁴ Ŋa Festise okaali bo ndi: «Pole oli ongeneŋe o Sezare, na me anku eya tuha na ovuriha.

⁵ Ŋa baari ake o mpaniŋi e be ma ali na onkumu aya bla me. Yuhu balaha dzia ema sa dzaa e mbi ma abanaŋa nde o yo.»

⁶ Festise asi etsuhu mfuomo si kali kuumi etu bla bo. Emana nde ovurihi Sezare. Eto na entsiere, nde oya o ntsi o ndzo ma pamaŋa maami. Emana nde otumi Pole oya.

⁷ Pole na oya, ankumu ma Azife ma awi Zerizaleme adzeniŋi nde. Bo aya ma banaŋa nde o maami ma abi kuna, okoroho bo i buuna oduha dzaa e tsi tsi e nde ama asa ni.

⁸ Pole ma lengulu le nde oduhi ndi: «Me eka sa dzaa e mbi ma angri ma Azife si kali o ndzo e Ndziami, na o Sezaare ni.»

⁹ Ŋa Festise aki asaha osa Azife ove, nde okaali Pole ndi: «We asaha odze Zerizaleme, o kua ma adze opama we o dzaa dzi, o miisi a me?»

¹⁰ Ŋa Pole okaali ndi: «Me eli ŋa o ndzo e Sezaare ma pamaŋa maami. Dzia biri ma pama me. Me eka asa Azife obi ni, we anku we oyaa yemiŋi.

¹¹ Yuhu me ema asa obi, me se ema asa dzaa ma abuuna obuma me o yo, me eka bisa leku ni. Ŋa yuhu dzaa e sisiele e bo ma buuna obanaŋa me o yo kali, o ŋa mvuuru se omo i ma buuna ompa me na bo ni. Me etsuolo nkani Sezaare!»

¹² Festise omana owobo na ankumu a nde, oduhi na Pole ndi: «We atsuolo nkani Sezaare ŋa, we adze okiriha o miisi a nde.»

Abiri Pole o mua Agripa bla Berenise

¹³ Etsuhu eke eyira, nkani ma atsuoloho ma Agripa bla nkeri a nde Berenise, ayi o Sezare ma owooso Festise.

¹⁴ Bo atsi etsuhu kuna o ŋa. Ŋa Festise oduhi nkani enyua e ma dzaa e Pole. Na nde ndi: «Felikse ama nyila balaha mo ma ongeneŋe kuuni.

¹⁵ Ntini e me eyeni Zerizaleme, ankumu ma asi ma avuoŋi bla akuuru ma Azife, ayi na soso nde. Bo atumi me ndi me lehe nde ongeneŋe.

¹⁶ Me ekaali na bo mbri: “Asi Rome ma aka nyiliha mvuuru vua ni. Ove nde osa vuniŋa bla baari ma abanaŋa nde. Ove nde se oduhi e nde enyua.”

¹⁷ O ŋa bo ama aya bla me kuuni asisari. Na entsiere, me eya o ntsi o ndzo ma pamaŋa maami, me etumi balaha dzi oyaha.

¹⁸ Baari ma abaniŋi nde ayi, me etsimiŋi mbri nde oma asa maami ma abi a nkala, ndzaa bu kali.

¹⁹ Bo otohi aki eso ni mo Ndziami a bo anku, ŋa na mvuuru a nkuumi Zezi. Mvuuru dzua oma kua, ŋa Pole ndi nde okini muo.

²⁰ Me eki i yaa dzaa oduha o dzaa lia ni. Ŋa me episi Pole yuhu nde aki na ndzala odze Zerizaleme, ama pama nde o dzaa dzia o kua.

²¹ Ŋa Pole obisi. Ma oma, nde asahi ndi nkani Sezaare mvuuru apama nde. Me duhi mbri asa kiele nde ntsa ongeneŋe. Omana me etuma nde mpili e nkani Sezaare.»

²² Agripa na Festise ndi: «Me se na ndzala oyuha maami abalaha dzia.» Festise okaali nde ndi: «Osuuha we ayuha mo.»

²³ Eto na entsiere, Agripa bla Berenise awasihi bla baari o ngula bo. Bo anyuniŋi ntsa ndzo ma apamaŋa maami bla ankumu ma aworo, na ankumu ma onguundu. Festise otumi oyaha Pole, ayi na nde se.

²⁴ Ŋa Festise ndi: «We nkani Agripa, na be leli ŋa aso bla bisi, lekeese balaha dzi. Azife aso ama aya na abasaha me o Zerizaleme kuuni mo balaha dzi. Ma wula ankima ndi i buuna onyila nde oki muo ni.

²⁵ Ŋa me emono mbri nde aka asa dzaa ma abuma nde o yo ni. Ŋa nde atsuolo nkani Sezaare, kia obila o me etumi nde na e Sezaare.

²⁶ Me eki dzaa esisiele e me ebuuna oteende nkani Sezaare o nde kali. Kia obila o me eyi na nde o mua be, kru kru o mua we nkani Agripa. Lehe nde eduhu, ŋa omana me ebaha dzaa e me eteende.

²⁷ Ma oma, i buuna otuma mvuuru ongeneŋe Rome ni, yuhu akini oyaa dzaa e tsi tsi e nde ama sa ni.»