Dzandza 24 - Obamba Kiwoyeti (mdt) NT PortionsAzife ma banaŋa Pole 1 Etsuhu etaani eyira, osi avuoŋi onini Ananiase osurihi Sezare bla akuru ma okuha ake, na Tertilise awoboho ma lengulu le bo. Bo ma aya na soso Pole na e Felikse lepatima. 2 Bo ayi na Pole. Tertilise oya abaana obanaŋa nde. Oduhi na Felikse ndi: «E nkani, bisi leli o ntsa oduusu ŋa, obila ma osuumbu a we ama kaala maami ma ave ntsa osi o bisi. 3 Bisi lebaha eve bia, nkani Felikse antini aso ma ebiri eso, bisi lempa we leve lo mini. 4 Ŋa me eka aya na awobo kuna ni, kia obila o me esaha mbri we ta tsui yemiŋi. We oma yuha bisi. 5 Bisi lema mono mbri balaha dzi obi o mvuuru. Nde alehe okrukusu o mpaniŋi Azife ma esi eso. Nde nkumu okuha a Nazareye. 6 Nde oma saha obondzolo ndzo e Ndziami, bisi se lema kuara nde. [ 7 ] 8 We abuuna olehe nde eduhu we anku, we omono mbri maami ma duha o nde ma aso asisiele.» 9 Azife bla Tertilise aki dzaa mo, bo ayalihi ndi: «Ee sisiele!» Pole aduha e nde enyua o mua Felikse 10 Lepatima lekuyi Pole ndi nde owobo. Pole oyahi mbari ndi: «Me eyaa mbri esibi emi yira kuna e we ali opami a ma osi o bisi. Me ewobo o mua we ŋa na lila leso. 11 We abuuna opisa bo we anku, etsuhu eya kuumi na dziele (12) e me ekumi Zerizaleme, ma ovuono Ndziami. 12 Ŋa aka basaha me o ntsa ndzo e Ndziami, me ewobo, me etsiese lemvuuru ni, se o ntsa andzo ma vuonoŋo si kali ntsa onguundu ni. 13 Baari ba se i buuna olaha maami a bo ma banaŋa me o mo maa lobi ni. 14 Ŋa me ebuuna oduha o miisi a we mbri: me edzandza o Ndziami ankaha a saabe, na eluoniŋi e ndzila e Nkumu. Mo bo, ndzila dzia ndzila e mbi. Ŋa me eyalaha ma ama teende eso ntsa esaangumu ma angri bla ma awobi a mbari e Ndziami. 15 Ŋa me na lila o Ndziami, na baari ma banaŋa me na lila lia. Ndziami adze onyuusa akui, na a tele na ma ali ka tele ni. 16 Kia obila o me esa mpari ma okiele lebihi le me yemiŋi, o miisi a Ndziami na a baari. 17 Esibi kuna ema yira, me eyi na avuriha o Zerizaleme na ampa baari a ma osi o me adoro, ma oyamaŋa bo. Me se empa ndamini e Ndziami. 18 Dzia biri e bo ma basihi me o ntsa ndzo e Ndziami. Me eki esa tsinda ma tsukaha nyuru. Lemvuuru leka aka bla me ni, okrukusu se aki onyaŋa. 19 Ŋa Azife ake a mo ngaala Asi aki ŋa. Bo kaa baari ma ayi o mua we ŋa na abanaŋa me, yuhu bo aki na dzaa na me. 20 Si kali ntini e bo ma biri me, na apama me o mua okuha akuuru, yuhu baari a kuuni ma amono ndi me ntsoso mbi, ŋa bo aduha. 21 O mua okuha akuuru, me ewobi na ankala ma otele mbri: “Me na lila mbri Ndziami anyuusa akui. Ma pama me o mua be ŋa ma obila o me eduhi vua?”» 22 Felikse aki oma yaa maami a ndzila e Nkumu yemiŋi. Nde ovuuri opami mo tsuhu le kima, oduhi ndi: «Me opama dza e be, ntini e nkumu aworo Lisiase adze oya.» 23 Nde oduhi na nkumu aworo ma okiele nde ma ongeneŋe, okoroho bo i kura nde endi ni. Bo se i kanaŋa andihi a nde ma oya ŋa ayamaŋa nde ni. Pole o mua Felikse bla Drizile 24 Etsuhu eke eyira, Felikse oyi bla okari a nde Drizile aki Ozife. Nde otumi oya na Pole. Nde oyuhi Pole awobo ma oyalihi o ma Zezi Krisi. 25 Pole oya awobo na nde ma leka le tele o miisi a Ndziami, na opami ove. Nde oduhi ndi Ndziami adze opama baari aso. O ŋa Felikse omoni vuoho, na Pole ndi: «Lesa siele ŋa lobi, sa vuriha me dila otsuolo we ntini nkima.» 26 Felikse se aki ndi Pole ampa nde adoro. Kia obila o nde atsuolihi Pole antini aso ma owobo bla nde. 27 Esibi dziele eyira, atsiesi Felikse o mbara, alehi Porsise Festise. Ŋa ma osa Azife ove, nde okieli Pole ma ongeneŋe. |
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
The Seed Company