Dzandza 23 - Obamba Kiwoyeti (mdt) NT Portions

¹ Pole okui apami ma okuha ompaa, oduhi ndi: «Baana ma anguhu, me edzandzi o Ndziami na otima ove, tii ngo o tsuhu e lobi.»

² Ŋa osi avuoŋi onini a nkuumi Ananiase, oduhi na baari ma aki o paani e Pole ndi: «Lebeere nde ma onyua.»

³ Pole oduhi na nde ndi: «A Ndziami abeere we, ki oma mva obaha o kubuhu! We oli o ntsi ŋa ma opama me ma osuumbu angri ma duha. Ŋa we i nyiima angri ni, we atuma mbri abeere me?»

⁴ Baari ma aki tuha ŋa Pole aduhi na nde ndi: «We atuha ŋa osi avuoŋi onini a Ndziami!»

⁵ Pole okaali ndi: «Baana ma anguhu, me eka yaa mbri nde osi avuoŋi onini ni. Ma oma ama teende ntsa Osaangumu o Ndziami ndi: “We i duha dzaa e mbi o nkumu a baari a we ni!”»

⁶ Pole aki oyaa ndi ntsa okuha akuuru apami ake aki Asadisi, maamo Afarizi. Kia obila o nde aduhi o miisi a bo na ankala ndi: «Baana ma anguhu, me Ofarizi me se muana Ofarizi. Me na lila mva bo mbri akui ma adze onyusiha. Kia obila ma pama me o tso.»

⁷ Nde okini ma omana owobo vua, Afarizi bla Asadisi abayi abuha ntsa okuha. Aya ma toho.

⁸ Ŋa Asadisi ndi akui ma aka adze onyusiha ni. Abaandzi bla edidima onyaŋa. Ŋa Afarizi ma yalaha ndi dzo eli.

⁹ Baari aso aya ma wula ankima. Ayisihi ma angri ake a ma otsui Afarizi, atemiŋi aduhi na mpari eso ndi: «Bisi lemono mbri mvuuru yu aka sa dzaa e mbi ni. Odidima leke mvuuru awobi na nde, si kali obaandzi?»

¹⁰ Bo aki ma selehe otoho. Nkumu aworo onini aki na vuoho, ntsaki bo ama tsebehe Pole ma etini. Ŋa nde na aworo ndi: «Lesuraha! Letusuha Pole o ndzo opami, be levuura nde ntsa ndzo aworo!»

¹¹ Lempiibi lo odzuele, Nkumu olahi nyuru na Pole na nde ndi: «Yaasa nyuru! We oma siisa enyua o maami a me o Zerizaleme kuuni, ove we oma siisa enyua se o Rome.»

Akuri tsuumu o ma Pole

¹² Eto na entsiere, Azife ake avuniŋi ma adzisihi. Bo alabi okesi o miisi a Ndziami ndi: «Saabe i dza kiila, i nyua se kiila ni, yuhu saabe lekini sa buma Pole ni!»

¹³ Baari ma labi okesi dzua aki ma nyura ekuumi e baari ena (40).

¹⁴ Bo ayeni na amono ankumu ma asi ma avuoŋi, bla akuuru ma okuha. Na bo ndi lemono okesi a bisi lelabi na Ndziami: «Bisi leka sa adza biila ni, yuhu bisi lekini obuma Pole ni.

¹⁵ Ŋa be o tsuumu o be bla akuuru ma okuha, be lepisa na nkumu aworo ma oya na Pole. Be leduha mbri be lesaha oya dzaa e tsi tsi e nde ama sa. Ma lengulu le bisi, bisi le ba ledila nde o ndzila ma obuma nde o biri e nde akini oto kuuni ni.»

¹⁶ Ŋa muana nkeri a Pole omo oyuhi tsuumu e bo ma kuri o nde. Nde oyeni ndzo aworo, nde onyuniŋi odziesi Pole.

¹⁷ Ŋa Pole otsuoli nkumu aworo omo, na nde ndi: «Bira ondzambu a balaha yu mpili e nkumu aworo onini, nde ŋa dzaa ma oduha nde.»

¹⁸ Nkumu aworo obiri nde mpili e nkumu aworo onini, oduhi ndi: «Ongeneŋe ma tsuoloho o Pole oma tsuolo me, nde oma tuma me ndi me eya na we ondzambu a balaha yu. Nde na dzaa ma oduha we.»

¹⁹ Nkumu aworo onini okuari ondzambu a balaha o kuoho. Obiri nde o paani, opisi nde ndi: «A we asaha oduha me a ma?»

²⁰ Ondzambu a balaha okaali na nde ndi: «Azife ake ama kura tsuumu ndi bo ma aya na pisa we ndi we oya na Pole osuuha o mua okuha akuuru a bo. Bo ma adze oduha ndi bo ma asaha oyaa dzaa e tsi tsi e nde ama sa.

²¹ Ŋa we oka yalaha maami a bo ni. Obila ekuumi e baari ma evula ena, ma edze olehe nde oyere. Bo ama laba okesi o miisi a Ndziami ndi bo ma aka sa dza anyua, yuhu bo akini osa buma Pole ni. Bo aya ma ama diliha kua ekalihi e we.»

²² Nkumu aworo onini na ondzambu a balaha ndi: «We oka duha maami a we aduhi me ma na mvuuru ni.» Emana nde onyili nde oyeni.

Ayeni na Pole mpili e Felikse lepatima

²³ Nkumu aworo onini otsuoli ankumu ma aworo vuele, na bo ndi: «Lekusuha enkama ma aworo dziele (200), aworo ma dzuanaŋa o yula anyama ekuumi ntsaami 70, bla enkama ma abalaha dziele 200 ma eli na adzuo. Bo ayeese biibi, ma odze Sezare atari wa 9 a mpiibi.

²⁴ Be leyeesi anyama ma obira Pole yemiŋi mpili e Felikse lepatima.»

²⁵ Emana nkumu aworo onini oteendi osaangumu ndi:

²⁶ «Me Klode Lisiase, ewooso we nkumu Felikse lepatima.

²⁷ Azife aki ama kuara balaha e me etuma we dzi. Bo aki ama saha obuma nde. Ŋa me ema aya bla aworo a me, lemi vusuha nde. Ma oma me ema yuha ndi nde osi Rome.

²⁸ Me eki esaha oyaa dzaa Azife ma baniŋi nde oyo. Me se ebiri nde mua okuha akuuru a bo.

²⁹ Me emoni bo ma banaŋa Pole obila ma angri a bo. Ŋa dzaa ma abuma nde, si kali ma alehe nde ongeneŋe oyo onyaŋa.

³⁰ Ama peese me ndi baari baa ma asaha olehe nde oyere. Kia obila o me etuma we nde asisari. Ŋa me duhi na baari ma banaŋa nde baa ma oya na soso nde na e we.»

³¹ Aworo asi mva o nkumu a bo atumi bo osa. Bo abiri Pole na mpiibi, tii mpili onguundu Antipatrise.

³² Eto na entsiere, aworo avurihi ndzo aworo, bo anyili aworo ma ali o yula anyama awunuŋi opiinga bla Pole.

³³ Bo ato ongunndu o Sezare, ampi osaangumu na lepatima. Bo se alahi nde Pole.

³⁴ Lepatima leliiri osaangumu, opisi Pole ndi: «We osi dzini ngaala?» Pole okaali nde ndi: «Me osi Silisi.»

³⁵ Lepatima leduhi na nde ndi: «Me olehe we eduhu o ntini e baari ma baniŋi we ma adze oka ŋa.» Nde otumi okiele Pole ntsa ndzo Erode Okuuru.