Dzandza 22 - Obamba Kiwoyeti (mdt) NT Portions

¹ «Baana ma anguhu a me na ataara a me, leyuha a me eduha be paraabu ŋa ma lengulu le me.»

² Bo ayuha nde oya awobo mo dzuuyi la asi Ebre, bo alomi. Pole oselihi owobo ndi:

³ «Me Ozife ma akuli o Tarse e Silisi. Ŋa akuusi me ŋa onguundu O Zerizaleme. Ngamaliele aki mvuuru ayisihi me angri ma ankaha a saabe yemiŋi. Me eki odzandzi a Ndziami onini mva eli be aso se o tsuhu e lobi.

⁴ Me suesihi baari tii leku, baari ma luoniŋi ndzila e Nkumu. Me tumi okuara akaasi bla abalaha ma olehe bo ma ongeneŋe.

⁵ Osi avuoŋi onini bla okuha akuuru aso, ma buuna osiisa enyua. Ma oma, bo baari ma ampihi me esaangumu ma etumiŋi me okuara baana ma anguhu ma ama yalaha Zezi, o ntini e me eyeni Damase. Ŋa me se eyeni na okuara baari ma ama yalaha Nkumu ma aki kua, ma oya na bo o Zerizaleme ma oliisa bo.»

Pole aduha osuumbu a nde ayalihi Zezi

⁶ «Me eki o ndzila, me eya etsiina tuha na Damase. Tari eki o mua ndzanga, oyalala enini ekieme owi yulu, odzeniŋi me.

⁷ Me evi o ntsie, me yuhi dzuuyi leduha na me ndi: “E Sole, Sole, we asuesehe me ma oma?”

⁸ Me pisi mbri: “We na Nkumu?” Dzuuyi lekaali me ndi: “Me, Zezi a Nazarete a we asuesehe.”

⁹ Baari ma aki bla me amoni oyalala kia, okoroho bo aka ayuha dzuuyi lewobihi ni.

¹⁰ Me episi mbri: “E Nkumu me osa buni?” Nkumu okaali na me ndi: “Temeŋe we odze Damase. We oto kua, aduha we osuumbu a we asa.”

¹¹ Ŋa oyalala kia oki oma pooro me miisi, baari ma aki bla me akuari me o kuoho, abiri me Damase.

¹² O ŋa eki na balaha ma tsuoloho ma Ananiase. Nde anyiima Ndziami bla angri a Moyize. Azife a Damase aso ma dzuusa nde.

¹³ Ananiase odzi ŋa basaha me, oduhi na me ndi: “Muana nguhu a me Sole, vuriha omono!” O ŋa me miisi anaahi me vurihi emoni, me emoni Ananiase.

¹⁴ Nde se oduhi na me ndi: “Ndziami ankaha a saabe oma baana osuolo we. Mo bu ndi we oyaa ediŋi e nde. Nde oma suolo we ndi we amono mvuuru a Tele, we se oyuha dzuuyi le nde anku.

¹⁵ Obila, ove we oki mvuuru asiisa enyua o mua baari o maami a nde maa aso, we otooso a we amoni, na a we ayuhi.

¹⁶ Ŋa we oma ama diliha? Dziaha ampa we ateeme atsuka ambiini a we se, o ntini a we atsuolo nkuumi e nde.”

Atumi pole mpili e baari akema

¹⁷ Emana me evurihi Zerizaleme. Tsuhu mo me eki evuono ntsa ndzo e Ndziami, Oduduma obiri me.

¹⁸ Me emoni Nkumu, nde oduhi me ndi: “Sa asisari ma otsuuha ntsa Zerizaleme woowo. Obila bo ma aka adze oyalaha enyua e we asiisa o me ni.”

¹⁹ Me ekaali mbri: “E Nkumu, bo adziabi yemiŋi ndi me mvuuru eyirihi ma andzo ma avuonoŋo na okuara baari ma ama yalaha we. Ma lebeere le bo, na lelehe le bo ma ongeneŋe.

²⁰ Ŋa na o ntini ma bumi Etiene mvuuru asiisihi enyua e ma maami a we, me se eki o ŋa. Me ekihi dzaa mo bla baari ma bumiŋi nde, me se ekielehi amfa a bo.”

²¹ Ŋa Nkumu na me ndi: “Dziehe me etuma we lala, mpili baari ma ali ka Azife ni!”»

Pole bla nkumu aworo a Rome

²² Baari ayuhi Pole tii ngo o nde amani. Bo aso awuli ankima ndi: «Lebuma balaha dzi, nde i buuna oka muo ni!»

²³ Bo aya ma selehe owula ankima, atini amfa a bo o yulu. Bo asaari owuru na yulu.

²⁴ Nkumu aworo a Rome oduhi ndi: «Lenyuniŋa na Pole ntsa ndzo aworo, be lebeere nde ekatsi, ma otuma nde owobo! Me esaha odziaba o bila o bo ma yukula nde o tso.»

²⁵ Ŋa akura Pole endi ma obeere nde, nde na nkumu aworo aki ŋa ndi: «Be lesaha obeere osi Rome a be lekini opama se opama ni? Be lebuuna osa vua?»

²⁶ Nkumu aworo dzua oyuha vua, oyeni amono nkumu avuli nde ndi: «We oma asaha osa? Balaha dzi osi Rome!»

²⁷ Ŋa nkumu aworo onini oyi ŋa abasaha Pole, opisi nde ndi: «Ma duha me, we ŋa dzaa dzaa osi Rome?» Pole okaali ndi: «Ee.»

²⁸ Nkumu aworo onini ovurihi oyahi mbari, na nde ndi: «Me ema tsina adoro a kuna ma okiriha osi Rome.» Pole na nde ndi: «Me osi Rome ma asi kuluha me.»

²⁹ O ntsi na ntsi ŋa, baari ma sahi obeere Pole ma otuma nde owobo, anyili nde. Nkumu aworo onini nde anku omoni vuoho, ma osuumbu a nde adziabi ndi Pole osi Rome, nde se aki oma tuma okura nde ma ankoso.

Pole o mua okuha akuuru ma Azife

³⁰ Eto na entsiere, nkumu aworo onini osahi oyaa o bila o simi simi ankumu ma Azife ma baniŋi Pole. Nde otumi otsiese nde ankoso ma kuri nde o mo. Nde oduhi na ankumu ma asi ma vuoŋi bla ankumu ma okuha Azife, ma ovunuŋa. Ayi na Pole atsuusi o mua bo.