Dzandza 21 - Obamba Kiwoyeti (mdt) NT Portions

Pole adze Zerizaleme

¹ Bisi lenyili akuuru ma okuha Efeze. Leyahi mbuungu leyeni Kose tele tele. Eto na entsiere leto Rode emana lekii Patara.

² Bisi le basihi mbuungu eyeniŋi na Finisi. Bisi se leyahi yo, leyeni.

³ Bisi leki leya letaala Sipre, lesurihi ma lembere le Siri, leto Tiire. Dzia biri anga mbuungu dzia ma aki ma tusaha biibi e bo ntsa yo.

⁴ Bisi lemoni aluoni o Tiire, lesi etsuhu ntsaami bla bo. Oduduma Santi aki oma luula o bo, na Pole ndi: «Kaa dziehe Zerizaleme ni!»

⁵ Etsuhu ntsaami eyira, bisi letemiŋi ma odze na opiinga. Bo aso ayi na nyila bisi, letsuuhi ntsa onguundu, eki na akaasi na baana. Saabo aso lewuri avuo o paani okeri onini, leya levuono.

⁶ Emana lelaasi abuha, bisi lekumi ntsa mbuungu. Aluoni se avurihi andzo a bo.

⁷ Bisi lemani opiinga a bisi o Tiire, bisi leto Tolomayise. O ŋa bisi lewoosi baana ma anguhu, letsi tsuhu mo bla bo.

⁸ Eto na entsiere bisi leto Sezare. Leyeni o ndzo e Filipe, mvuuru atoosoho Ntsia e mve. Bisi leki o ndzo e nde. Nde aki balaha ma asuoli o ntsa abalaha antsaami o Zerizaleme.

⁹ Nde aki ŋa baana ma akaasi ana ma aki enkiina, ma wobihi ma lengulu le Ndziami.

¹⁰ Bisi letsi etsuhu kuna o ŋa. Owobi a mbari e Ndziami, ma tsuolihi ma Angabise owi Zide.

¹¹ Nde oyi na mono bisi. Nde oyahi kuaamba e Pole okuri dziala bla nyiili e nde anku. Nde oduhi ndi: «Leyuha maami ma Oduduma Santi atooso: O Zerizaleme, ankumu ma Azife ma adze okura nga kuaamba dzi. Bo ma adze ompa nde na baari ma ali ka Azife ni.»

¹² Bisi leyuha vua, bisi bla baana ma anguhu a Sezare, lekaniŋi Pole na mpari eso, ma obisa odze Zerizaleme.

¹³ Ŋa Pole okaali ndi: «Be lelila, be lesuesehe me otima ma oma? Me, mo nkuumi e Zezi a Nkumu, ebuuna oyalaha akuri me endi, abumi me o Zerizaleme.»

¹⁴ Ma osuumbu a bisi leka buuna okanaŋa nde ni, bisi se leka ma sa nkomoŋo ni. Bisi leduhi mbri: «Nkumu osa ma osuumbu a nde adii!»

¹⁵ Etsi tsuhu eke eyira, lekarihi biibi, leyeni Zerizaleme.

¹⁶ Aluoni a ma onguundu o Sezare ayeni na anyila bisi. Ayeni na bisi mpili e Menason osi Sipre. Nde aki ama biha na oka oluoni, bisi letsi o ndzo e nde.

Pole adze ŋa akie Zaake

¹⁷ Bisi leto Zerizaleme, baana ma anguhu ayambi bisi na osuere oso.

¹⁸ Tsuhu etsa, Pole oyeni bla bisi mpili e Zaake. O ŋa akuuru ma okuha aso ama kusuha abuha.

¹⁹ Pole owoosi bo, oduhi bo maami a Ndziami asi o ngula nde aso, mpili e baari ma ali ka Azife ni.

²⁰ Akuuru ma okuha ayuha vua, bo akuusi lekuma le Ndziami, bo na Pole ndi: «Muana nguhu a bisi, we amono Azife a kuna ami baha oyalihi, bo aso se ma nyiima angri.

²¹ Yuha maami a bo ma yuhi o we: ndi we ayisiha Azife aso ma kaha bla baari ma ali i yaa Ndziami ni, ma onyila angri a Moyize. We aduha mbri bo i sa baana sasi ni. Bo se i nyiima maami ma Azife ni.

²² Saabe osa buni? Ma oma bo ŋa ma yuha ndi we oli kuuni.

²³ Sa maami a bisi leduha we. Bisi na abalaha ana kuuni ma ama kuara tsanga.

²⁴ Ya ŋa bo, sa tsinda ma tsukaha nyuru bla bo, we wura adoro o biri e bo. O ŋa aya ma buuna owuna bo etsui. Ŋa baari aso ayaa ndi maami ma duhi o we maa ekiini. Ŋa bo amono ndi we se anyiima angri.

²⁵ Bisi lema teende baari ma ali ka Azife ni osaangumu, ma ama yalaha Nkumu. Bisi lema duha bo maami a bisi leyeesi: be i buuna odza anyama ma ama mpa andziami ma otsa otsa avuoŋi ni. Leka dziaha anyama ma kini na tohi ni, lekaa siaha obla.»

²⁶ Ŋa Pole obiri abalaha ma ana baa. Eto na entsiere, Pole obaani tsinda ma tsukaha anyuru bla bo. Emana nde oyeni ntsa ndzo e Ndziami. O ŋa nde oduhi bo tsuhu e mvuuru na mvuuru adza ompa e nde vuoŋi, o ntini e ntsinda ewa.

Akuari Pole o ntsa ndzo e Ndziami

²⁷ Etsuhu e ntsaami e tsinda ma tsukaha nyuru eki eya ma ewa. Azife a ngaala Asi amoni Pole o ntsa ndzo e Ndziami. Bo atsieesi lemvuuru leso, bo akuari Pole.

²⁸ Bo awuli ankima ndi: «Be baari a Isayele, leya na ayamaŋa bisi. Lemono balaha eyisiha baari aso mbari e mbi ma ebiri eso. Ndi bo abele angri a Moyize, bo se abele ndzo e Ndziami. Nde oma aya na angreke ama onyuniŋa kuuni. Nde omi sobo biri opeende dzi!»

²⁹ Ma oma Azife aki ama mono Trofime osi Efeze bla Pole ntsa Zerizaleme. Bo atsimiŋi ndi Pole aki oma nyuniŋa bla nde ntsa ndzo e Ndziami.

³⁰ Okrukusu ovi ntsa onguundu oso. Baari akuhi na kuna. Bo akuari Pole, atusihi nde o ntsa ndzo e Ndziami. O ntsi na ntsi ŋa bo abiindi edubihi.

³¹ Baari aki ma saha obuma Pole. Ŋa nkumu aworo a Rome oyuhi ndi okrukusu dzua omi kunwa onguundu o Zerizaleme oso.

³² O ntsi na ntsi ŋa nde oyahi aworo bla ankumu ma aworo, odumi ma antsiini mpili lemvuuru. Baari amono aworo bla ankumu ma aworo, bo anyili oma beere Pole.

³³ Nkumu aworo otsiini, nde otumi okura Pole ma endi ma ankoso dziele. Emana nde opisi ndi: «Balaha dzi na? Nde oma asa?»

³⁴ Ŋa o ntsa lemvuuru, ba ma duha dzi dzaa, maamo ma duha nkima. Ŋa nkumu aworo aka yuha dzaa e tsitsi ni, obila ma lesuhu. Nde otumi ayeni na Pole ntsa ndzo aworo.

³⁵ Pole oto ma okuma ngumu onyua a ndzo, aworo asaari nde obila o mpari lemvuuru.

³⁶ Ma oma baari aso aki ma luono nde na owula ankima ndi: «Lebuma nde!»

Pole awobo ma lengulu le nde anku

³⁷ Ntini ma sahi olehe Pole ntsa ndzo aworo dzia, nde na nkumu aworo ndi: «Me ebuuna oduha dzaa mo?» Nkumu aworo okaali nde ndi: «We oyaa owobo le ngreke?

³⁸ Ŋa we ka osi Ezipte ayi na okrukusu ntsa etsuhu e mbisa bi ni! Omana obiri ekuumi me enkama e baari ena (4,000) ma eli na adzasi ntsa kayi ni?»

³⁹ Pole okaali ndi: «Me Ozife osi onguundu o Tarse e Silisi. Me osi onguundu enini, kolo kolo e we mpa me lengulu ma owobo na baari ba.»

⁴⁰ Nkumu aworo ompi nde lengulu. Pole otemiŋi o ngumu onyua a ndzo. Nde osaari kuoho, bo se aya pi. Pole owobi na bo o dzuuyi le Ebre ndi: