Dzandza 20 - Obamba Kiwoyeti (mdt) NT Portions

Pole aya na avuriha Maseduane bla Ngrese

¹ Okrukusu owa, Pole okusihi aluoni nde oyaasi bo. Emana nde olaasi bo, oyeni o ndzila Maseduane.

² Nde otini angaala maa, nde se oyaasi baana ma anguhu ma ama yalaha Nkumu kuna. Emana nde oto Ngrese.

³ Pole osi angondo atari o ŋa. Ntini e nde ayahi mbuungu ma odze Siri, nde oyuhi ndi Azife ma saha oyusuha nde ngaa. O ŋa nde osuoli ma ovuriha ma le Maseduane.

⁴ Baari ma yeni bla nde eki: Sopatere, a muana Pirise osi Bere, na Aritate bla Sekudise asi Tesalonike. Ngayise osi Derbe, ŋa Timote bla Tisike na Trofime, baa aki asi ngaala Asi.

⁵ Baa ma ayeni levusu, adili bisi o Troase.

⁶ Emana tsinda e mpembe leviire kali, bisi leyahi mbuungu o sabi e Filipe. Etsuhu etaani eyira, bisi leyeni na abasaha bo o Troase. Saabo lesi etsuhu ntsaami o ŋa.

Pole o Troase

⁷ Tsuhu e ntsomi o ntsa etsuhu e ntsaami, bisi levuniŋi ma odza lempembe. Pole aki adze na entsiere, oyahi mbari o mua baana ma anguhu, owobi tii ngo otima lempiibi.

⁸ Bisi lekusihi abuha ma otini o ndzo eli na yulu, mpili ma aki ma ama naasa abaami a mbaa kuna.

⁹ Onkere abalaha omo ma tsuolihi ma Etike oli o ntsi ma onyua a ndzo okiehe. Mbari e Pole evula ola, Etike otsi tolo lo mini. Tolo levula, nde owi yulu o ngumu otari ovi. Ama saha osaara nde, nde aki ama mana okua.

¹⁰ Ŋa Pole osurihi okumiŋi o yula nde, oyahi nde o ntsa dziala e nde oduhi ndi: «Lekaa monoŋo onguo ni, nde oli muo!»

¹¹ Emana Pole ovurihi okumi o ngumu e yulu, nde otsebi lempembe, okabihi bo adzi. Pole oselihi owobo tii ngo e tsuhu etsi, emana nde oyeni.

¹² Ayi na vuriha na onkere a balaha muo. Baari aso amoni ove.

Pole atemeŋe Troase ma odze Mile

¹³ Bisi leyahi mbuungu letsuomi levusu ma odze Asose. Oto kua bisi ledila Pole ma oyaha nde. Obila nde aduhi ndi nde ayira mo ndzila e mo ntsie.

¹⁴ Pole obasihi bisi ŋa Asose, saabo leyahi mbuungu leyeni Mitilene.

¹⁵ Levurihi leyahi mbuungu leto o mua Kio na entsiere. Tsuhu emo leto Samose, emana leto Mile.

¹⁶ Pole oyiri Efeze otele aka sura ni. Nde aki ndzala obiha o ngaala Asi kali. Nde ayiri asisari, ma oma nde aki na ndzala oto Zerizaleme o tsuhu e Pantekote

Pole awobo na akuuru ma okuha Efeze

¹⁷ Pole aki okini o Mile, otumi otsuolo akuuru ma okuha Efeze.

¹⁸ Bo ato na e nde, Pole na bo ndi: «Be leyaa osuumbu a me ekihi bla be, ma obaana o tsuhu e ntsomi e me ewasihi ntsa ngaala Asi.

¹⁹ Me eka sa ombira nyuru o dzandza le Nkumu ni. Me eki emono ampasi, me se elila. Obila Azife akihi ma kura atsuumu o me.

²⁰ Be leyaa mbri me eka dzisiha be dzaa e be leki na kaama ma oyuha ni. Okoroho o mua baari na o ntsa andzo a be, me ema tooso be mbari e Ndziami, me se ema yisiha be yo.

²¹ Me emi tsuolo Azife bla baari ma ali ka Azife ni, ma oyalaha Ndziami, na ma oyalaha Zezi a Nkumu.

²² Ŋa me eya edze na Zerizaleme. Oduduma Santi omi mpa me okura ma odze kua. Me i yaa maami ma aya me levusu kua ni.

²³ Okoroho ntsa enguundu eso, Oduduma Santi abaana odziese me ndi me edze omono mpasi me se edze ongeneŋe.

²⁴ O me, lebihi le me anku mvunu kali. Me esaha osa dzandza e me tii ngo ntsuo. Me esa maami a Zezi a Nkumu aduhi me ma osa aso: letooso le Ntsia e mve e mpolo e Ndziami.

²⁵ Me yirihi o mpaniŋi e be aso, na otooso Onkani o Ndziami. Me eyaa mbri na ema ka be, be leka ma vuriha omono olia o me ni.

²⁶ Kia obila o me esiisa enyua lobi mbri: me opeende ma leku le be aso.

²⁷ Ma oma me emi tooso be maami aso a ndziami aki ama yeese. Me eka dzisiha dzaa se mo ni.

²⁸ Lesa ayiba o be anku, na na ma endoombo e Ndziami, ma Oduduma Santi ampi be ma okiele. Lekiele okuha a Ndziami yemiŋi. Okuha a nde abasihi mo tohi le nde anku.

²⁹ Me yaa mbri omana eyeniŋi e me, baari a mva ambulu ma adze oya o mpaniŋi e be, bo se ayusuha endoombo e Ndziami angaa.

³⁰ Ŋa o mpaniŋi e be anku se, baari ake ma adze oduha maami a ndii, bo se abira aluoni o ngula bo.

³¹ Lesa ayiba, be se leyibaha mbri: lemihi le esibi etari, na mpiibi na mui o ntsa olili, me eka kolo ma ompa be mvuuru na mvuuru anduo ni.

³² Ŋa me ema mpa be ŋa na Ndziami bla mpolo e mbari e nde. Mbari e nde eli na onkumu ma ompa oyalihi o be mpari. O ngula yo se, Ndziami ampa baari a nde ma ali epeende wanda.

³³ Me eka dia adoro bla akele a mvunu na amfa a mvuuru ni.

³⁴ Be leyaa mbri me edzandzi o dziala e me anku ma omana kaama e me, bla e baari ma yiriha bla me.

³⁵ Me ema laha be dzo eso. Ove be ledzandzi ma osuumbu dzua ma oyamaŋa anga owuha. Ove be leyibihi mbari e Zezi a Nkumu aduhi nde anku ndi: “Ove oka ni na mvuuru ampaha, ŋa ka na mvuuru abaha ni!”»

³⁶ Ntini e Pole amani owobo vua, nde bla baari aso awuri avuo, aya ma vuono.

³⁷ Baari aso anyuniŋi ma elili dzo mini, ayeni na ava o Pole, ampi nde amfemfe.

³⁸ Bo amoni obi obila nde aduhi ndi: «Be leka ma dze omono olia o me ni.» Emana bo ayeni na nyila nde tii ngo o mbuungu.