Dzandza 2 - Obamba Kiwoyeti (mdt) NT Portions

Edziihi ma Oduduma Santi

¹ Tsuhu e tsinda e Patikote eto, bo aki ama kusuha abuha o biri mo ntu.

² O ŋiŋa lesuhu lewi yulu mva okru, ndzo e bo ma akihi o yo eso eya lesuhu.

³ O ŋa adzuuyi awi yulu mva akaami a mbaa, abaahi ma ebari, avi o yula bo mvuuru na mvuuru.

⁴ Oduduma Santi oluuli o bo aso, bo aya ma wobo adzuuyi akema. Ma osuumbu Oduduma Santi atumi bo ma owobo.

⁵ O ŋa eki na Azife ma nyimaŋa Ndziami, ma awi esi eso ma oya Zerizaleme.

⁶ Bo ayuha lesuhu lia, lemvuuru lekusihi abuha. Bo aso aya o ntsa lekimi, obila mvuuru na mvuuru ayuhi aluoni ma awobo ma adzuuyi a bo anku.

⁷ Bo aso aki ntsa lekimi na osuere. Bo mapisa abuha ndi: «Baari ba ka asi Ngalili ni?

⁸ Saabe leyuha bo ma wobo ma adzuuyi a saabe ŋa buni?

⁹ Saabe na asi Parte, na asi Mede na asi Elame. Ake asi Mosopotami na Zide, na Kapadose, na Po bla Asi.

¹⁰ Maamo asi Frizi na Pamfili, na Ezipte, na Sirene ali ntsa Libi. Maamo asi Rome.

¹¹ Na asi Krete bla asi Arabi. Na Azife bla baari ma ali ka Azife ni, ma amayalaha angri a Moyize. Okoroho saabe leyuha bo mawobo ma adzuuyi a saabe, eve e Ndziami asi!»

¹² Bo aso aki o ntsa lekemi, bo i yaa osuumbu osa ni. Bo mapisa o mpanihi e bo ndi: «Bu ma oduha ndi nki?»

¹³ Ŋa maamo masebe ndi: «Bo amakolo mali.»

Mbari e Piere

¹⁴ Ŋa Piere otemiŋi ma otele bla antuma a kuumi na omo, oyahi mbari o miisi a bo ndi: «Be Azife na baari ma ali o Zerizaleme aso, leta atsui be leyuha mbari e me.

¹⁵ Baari ba akini okolo mali mva o be letsimiŋa ni. Tsuhu ekini entsiere.

¹⁶ Ŋa dzi dzaa Owobi a mbari e Ndziami Zoele aduhi. Eyi lemimono yo:

¹⁷ “Ndziami aduha ndi ntsa etsuhu ma lembisa: Me empa Oduduma a me na baari ma o muo aso. Baana a be ma abalaha na ma akaasi, ma adze oka awobi a mbari e Ndziami. Endzambu e be ma edze omono maami. Ekubu e be ma edze omono aluoro.

¹⁸ Ee ma etsuhu bia, me edze ompa Oduduma Santi a me na adzandzi a me ma abalaha bla ma akaasi. Ŋa bo ma adze oka awobi a mbari e Ndziami.

¹⁹ Me edze osa epuna o yulu, bla andiimi ma emaa o yula ntsie: amono tohi bla mbaa, yuhi yo mini.

²⁰ Mwi akalaha okiriha lempiibi, ngondo okiriha tohi. Maa aso ma aya levusu le tsuhu e Nkumu. Tsuhu dzia tsuhu enini, yo se edze oka tsuhu e luari.

²¹ Ŋa mpini mvuuru adze otsuolo nkuumi e Nkumu, adze ovuuha.”

²² Be baaari a Isayele, leyuha mbari e me eduha be. Zezi a Nazarete mvuuru a Ndziami ama laha osuumbu ali nde. O ngula Zezi nde osi emaa, na epuna, bla andiimi, o mpaniŋi e be. Mva o be ledziabi.

²³ Balaha ma ampi o dziala e be dzua, eki osuumbu a Ndziami aki ama yeese nde anku. Be letumi baari ma ali i yaa Ndziami ni, okomo nde ma lembandzi nde okui.

²⁴ Ŋa Ndziami onyuusi nde o ntsa nkala leku. Obila leku leki mpari ma okiele nde kali.

²⁵ “Ŋa Davide owobi o nde ndi: me emonihi Nkumu antini aso o miisi a me. Ma oma nde yuhu oli mo kuoho o me olumi, me i triiha ni.

²⁶ Kia obila o me etsaba ntsa otima me, me eyima na osuere oso. O ngula ŋa, nyuru e me edze owuuma na lila eso,

²⁷ obila we aka adze osuba me kalihi mpili akui ni. We se aka adze onyila opeende a we oboli ntsa muuma ni.

²⁸ We ama laha me andzila ma lebihi. Ekihi e we o me, me edze ompa me osuere.”

²⁹ Baana ma anguhu a me, me eduha be asisiele o yula nkaha saabe a balaha Davide mbri: nde oma kua, ama dziiha, muuma a nde tii ngo lobi okini mpili e saabe.

³⁰ Ŋa nde aki owobi a mbari e Ndziami, nde aki ama yaa ndi Ndziami aki ama laba okesi ndi nde adze olehe muana ama okula o nde omo o yula mbara.

³¹ Davide aki ama baana omono ndi Krisi a Ndziami asuoli, adze onyusuha o ntsa leku. Kia obila o nde aduhi ndi: “Ma aka adze osuba nde kalihi mpili akui ni. Nyuru e nde se eka bolo o muuma ni.”

³² Zezi yu, Ndziami ama nyuusa nde o ntsa leku. Saabe aso baari lesiisa enyua.

³³ Ndziami ama kuusa nde, ama tsuusa nde okuoho o nde olumi. Taara se oma mpa nde Oduduma Santi a nde alehi nde ndahi. Nde se ama mpa saabe Oduduma Santi dzua. Mva o be leya lemono na leyuha.

³⁴ Ŋa Davide aka adze yulu ni, okoroho nde aduhi ndi: “Nkumu aduha na Nkumu a me ndi: ka o ntsi o kuoho o me olumi.

³⁵ Tii ngo e me elehe abuha a we ma ombangu mva kiila o ntsina nyiili e we.”

³⁶ Ove baari a Isayele aso adziabi sisiele ndi: Ndziami ama mpa nde Onkumu, nde se Krisi. Zezi a be lekomi ma lembandzi!»

Baari antsomi ma yalihi Ndziami

³⁷ Bo amana oyuha mbari e nde etima esi bo obi. Ŋa bo apisi Piere bla antuma ndi: baana ma anguhu a bisi, bisi osa buni?

³⁸ Piere okaali na bo ndi: «Lekaala eku, ŋa be mvuuru na mvuuru oyaha ateeme, o nkuumi e Zezi Krisi. Mo bu ndi aboloho ambiini a nde, ŋa be se lebaha puha Oduduma Santi.

³⁹ Obila ndahi e Ndziami dzi e be bla baana a be, na baari aso ma ali la la. Na a Ndziami a Nkumu a saabe adze otsuolo.»

⁴⁰ Piere oselihi odziese bo kuna, nde osiisi enyua, ompi bo mpari. Na bo ndi: «Leyalaha Ndziami be lelabaha na ndzubu e lobi e mbi dzi!»

⁴¹ Baari ma yalihi mbari e Piere ayahi ateeme. Bo aki ma buuna oto enkama e baari esiami, ma ayi na basaha baari ma abaani oyalaha Ndziami.

Okuha antsomi

⁴² Bo aso asi nkomoŋo o mbari antuma ma ayisihi bo, bo akihi biri mo mva baana ma anguhu. Bo akabihi lempeembe biri mo. Bo se avuoniŋi biri mo.

⁴³ Bo aso amoni onguo, ma epuna kuna bla emaa ma eki andiimi a luari ma antuma ma asihi.

⁴⁴ Baari ma ama yalaha Ndziami aso akihi dzaa mo. Bo biibi se eki emo.

⁴⁵ Bo atehi apaangu na biibi ekima ma eki na bo, emana bo akabihi adoro o mpanihi e bo, lemihi na kaama e mvuuru na mvuuru.

⁴⁶ Etsuhu eso bo ma vunuŋa o Ndzo e Ndziami otima omo. Bo ma adza lempeembe le Ndziami ma antsa ma andzo, bo se ma adza biila ntsa osuere na etima e nyengele.

⁴⁷ Bo ma kuusa Ndziami, baari aso se aki na ndzala bo. Nkumu se aluusa baari a nde avusihi etsuhu eso ntsa okuha a bo.