Dzandza 19 - Obamba Kiwoyeti (mdt) NT Portions

Pole ŋa Efeze

¹ Ntini Apolose akihi o Korete, Pole ovuuli ngaala okuri Asi, oto Efeze. O ŋa nde obasihi aluoni ake.

² Nde opisi bo ndi: «Ntini e be leyalihi Nkumu, be lebahi Oduduma Santi?» Bo akaali ndi: «Bisi lekini oyuha se ma wobo ma Oduduma Santi ni.»

³ Pole opisi bo ndi: «Ateeme a be leyahi mani?» Bo akaali ndi: «Ateeme a Zan.»

⁴ Pole ovurihi okaali na bo ndi: «Zan ampi bo ateeme ama lekaala le eku. Nde se aduhi na baari ma oyalaha mvuuru adze oya ngula nde. Mvuuru dzua oma kaha Zezi.»

⁵ Bo amana oyuha mbari e Pole, bo ayahi ateeme o nkuumi e Zezi a Nkumu.

⁶ Pole olehi dziala o yula etsui e bo, bo se abahi Oduduma Santi. O ŋa bo aya ma wobo adzuuyi akema. Bo se ma wobo ma lengulu le Nkumu.

⁷ Abalaha baa aki kuumi na vuele.

⁸ Pole oyeni ndzo ma avuonoŋo. O ŋa nde oki lemihi le angondo atari, nde se aki awobo bla lila. Nde atooso Onkani o Ndziami, nde se osi mpari ma osa ndi bo ayuha.

⁹ Ŋa ake aki ndzala oyuha kali, bo se aki ndzala oyalaha kali. Bo ma sebe mbari e Pole ntsa okuha. Ŋa Pole onyili bo, nde obiri aluoni bla nde. Ŋa etsuhu eso nde aki awobo bla bo ntsa lekoole le Tiranose.

¹⁰ Dzaa dzia ebihi esibi dziele. Mo bu ndi baari aso ma ali o ngaala Asi na Azife bla Angreke, ayuha mbari e Nkumu.

Baana a Seva

¹¹ Ndziami osi emaa e luari o ngula Pole.

¹² Ma osuumbu dzua, alehi amfa bla esuare ma eki me emi tiila o nyuru e Pole o yula abieri. Abieri awuumi, na edidima ma ebi ma eki o bo se etsuuhi.

¹³ Azife ake ma tsuurihi edidima ma ebi, ayeni ma ebiri eso. Bo ma miha otsuura se edidima ma ebi ma eki ma abieri, o nkuumi e Zezi a Nkumu. Bo ma aduha ndi: «Me eduha na be, o nkuumi e Zezi a Pole atoosoho, letsuuha!»

¹⁴ Baana ma abalaha a ntsaami ma osi avuoŋi onini ma tsuoloho o Seva, amihi osa se vua.

¹⁵ Ŋa odidima obi okaali na bo ndi: «Me yaa Zezi, me se eyaa Pole. Ŋa be ba na?»

¹⁶ Ŋa balaha eki na edidima ma ebi, odzuani bla baana a Seva. Nde aki ovuli bo mpari, oyusihi bo ngaa yo mini. Bo atsuuhi o ndzo e nde otaba na ampura.

¹⁷ Asi Efeze aso, na Azife bla Angreke, ayuhi dzaa dzia. Bo aso amoni vuoho. Bo ayalahi onkani o Ndziami, bla onini o nkuumi e Zezi a Nkumu.

¹⁸ Baari kuna ma yalihi Nkumu, ayi na asa komboso nkara yulu, o maami ma a bi a bo ma aki ma ama sa.

¹⁹ O ntsa baari ma aki ma ama pasa ati, kuna ayi na esaangumu e bo, na atsuha o mbaa o mua baari aso. Mvunu esaangumu bia eki eto ekuumi ma mile etaani 50,000 ma adoro a nkoso.

²⁰ Ma osuumbu dzua, ŋa o mpari e Nkumu, mbari e Ndziami eselehe odze na vusu, yo se eselehi olaha mpari.

Okrukusu ŋa Efeze

²¹ Emana maami maa, Pole oyeesi bla Oduduma Santi ma ovuula Maseduane bla Akayi, ma odze na Zerizaleme. Nde oduhi ndi: «Me omana kua, ove me se yeni Rome.»

²² Nde otumi Timote bla Eraste Maseduane, bo vuele ayamiŋi nde. Ŋa nde anku osi atsa etsuhu ntsa ngaala Asi.

²³ O ntini dzia okrukusu nde mini ovi ŋa Efeze, obila o Ndzila e Nkumu.

²⁴ Ma oma, otuli ankuere omo ma tsuolohi o Demetrise, aki atula edzi ndzo mo kele adoro, mo ndziami okaasi ma tsuoloho ma Atemise. Nde bla atuli maamo abahi adoro a kuna o dzandza dzia.

²⁵ Ŋa Demetrise okusihi atuli, bla baari ma sihi dzandza dzia se aso. Nde na bo ndi: «Andihi a me, be leyaa mbri saabe lema kiriha baari ma anini ŋa o dzandza dzi.

²⁶ Ŋa be lema mono, be se lema yuha ma wobo o dzaa dzia. Pole yu aduha ndi: andziami a baari ma tuluha ka andziami ni. Nde oma sa baari kuna oyalaha Nkumu. Ka ŋa Efeze kuuni ntu ni, ŋa na o ntsa ngaala Asi eso.

²⁷ Ebiiya ka dzandza e saabe ntu ni, ŋa na ndzo e ndziami okaasi Atemise se abele yo. Ma aka ma duha ndi Atemise ndziami onini ni. Ni bu baari a mo ngaala Asi na a mo yula ntsie aso ovuonoŋo nde!»

²⁸ Baari ayuha vua abie nkala, awuli ankima ndi: «Atemise ndziami onini ŋa Efeze!»

²⁹ Ŋa okrukusu ovi ma onguundu oso. Baari aso ayeni mua lebuhu le tsinda. Abiri Ngayise bla Aritake se, asi Maseduane vuele ma yeniŋi opiinga bla Pole.

³⁰ Pole osahi odze mua lemvuuru, ŋa aluoni akaniŋi nde.

³¹ Baari ma anini ake a mo ngaala Asi, aki andihi a Pole. Bo atumi baari ma odziese nde ndi: «Ka dziaha o mua lebuhu le tsinda ni!»

³² O ntini dzia, okrukusu ovi o mpaniŋi e baari ntsa okuha. Ba ma duha ndi bu, ba ku se ma kaala akema. Ŋa baari kuna aki i ma yaa obila o bo ma ama kusaha abuha o tso ni.

³³ Baari ake o ntsa lemvuuru aduhi na Alikisandre dzaa leyiri. Nde mvuuru Azife ma lehi levusu. Nde osaari kuoho, ma owobo na lemvuuru.

³⁴ Ŋa baari adziaba ndi nde Ozife, bo awuli ankima lemihi le atari muele ndi: «Atemise oma kaha ndziami onini ŋa Efeze!»

³⁵ Oteendi esaangumu ama onguundu obuuni okuoso lemvuuru, nde oduhi ndi: «Asi Efeze, baari aso ayaa ndi onguundu Efeze ekiele ndzo e ndziami okaasi onini ma tsuoloho ma Atemise, bla odimi o nde ewu yulu.

³⁶ Mvuuru i buuna osa ekemi ni. Ove be lesa tsuusa etima, omana be letsimiŋi dzaa e be lebuuna osa.

³⁷ Be lema aya na baari ba kuuni, ni bu bo aka sa dzaa e mbi o ndzo e ndziami ni. Bo se aka tuha ndziami a saabe okaasi ni.

³⁸ Yuhu Dimitrise bla atuli a nde ma saha mvuuru a bo ma banaŋa, saabe na apami. Andzo ma pamaŋa maami bla apami ali. Ledziehe mpili bo!

³⁹ Yuhu be na dzaa nkima ma opisa, saabe lema mono okuha ankani.

⁴⁰ Ndziila kali bo abaniŋi saabe ndi saabe baari le eyi na okrukusu, obila mo maami ma ayiri lobi. Saabe i buuna oduha obila lema kusuha abuha ni. Nde omana owobo vua bo atsalihi.»