Dzandza 18 - Obamba Kiwoyeti (mdt) NT Portions

Pole o Korete

¹ Emana Pole otsiehi Ateene, oyeni Korete.

² Nde omoni Ozife ma tsuolihi ma Akilase, ma kuli o ngaala e Pon. Nde aki okini ma owa osi o Itali, bla okari a nde Prisile. Ŋa nkumu esi ma tsuolihi o Klode, aki omi tuma otsuura Azife aso o Rome. Kia obila o Pole ayeni mpili Akilase bla Prisile.

³ Bo aso asihi dzandza mo, letua le elebe. Pole oyeni na aka mpili e bo, oya adzandza bla bo.

⁴ Etsuhu ma awuumaŋa eso, Pole ayaha mbari ntsa ndzo ma avuonoŋo. Nde asa Azife bla Angreke oyuha.

⁵ Ŋa ntini e Silase bla Timote ma awi Maseduane, Pole akihi ni ma otooso mbari e Ndziami. Nde aduha na Azife ndi Zezi oma kaha Krisi.

⁶ Ŋa bo abeli Pole aya ma tuha nde. Ŋa Pole okubihi amfa a nde oduhi ndi: «Be okua kua, dzaa ekeese be anku. Ka mberi e me ni. Ma obaana o tsuhu e lobi me ema dze ŋa mpili e baari ma ali ka Azife ni.»

⁷ Pole otsuuhi o ndzo ma avuonoŋo. Nde oyeni mpili Titise Zistise, balaha evuonoŋo Ndziami. Ndzo e nde ekihi o paani e ndzo ma avuonoŋo.

⁸ Ŋa Krispise a nkumu a ndzo ma avuonoŋo, oyalihi Nkumu bla nkuono e nde eso. Asi Korete kuna ayalihi Nkumu, ayuhi mbari e Pole bo se ayahi ateeme.

⁹ Lempiibi lemo, Nkumu owobi na Pole o ntsa luoro ndi: «Ka monoŋo vuoho ni, selehe owobo. Ka kaha pi ni,

¹⁰ me eli bla we. Mvuuru abuuna okuara we ma oyusuha we ngaa kali. Obila ntsa onguundu ki, baari a me ali na kuna.»

¹¹ Pole oki o Korete osibi etsiina na otini. Nde ayisiha baari mbari e Ndziami.

Pole o mua Ngalion

¹² Ntini e Ngalion akihi lepatima le Rome ma Akayi, Azife aso abeli Pole. Bo ayeni na nde o ndzo ma pamaŋa maami.

¹³ Bo ndi: «Balaha dzi etuma baari ovuono Ndziami ma osuumbu okima, ŋa ka ma osuumbu angri ma aduha ni.»

¹⁴ Pole aki asaha okaala, ŋa Ngalion na Azife ndi: «Lo leki ma oka leku le mvuuru, si kali dzaa e mbi mpini yo, kaa me yuhi be ma Azife.

¹⁵ Ŋa be ledzuana ŋa o mbari ntu. Na ma ankuumi, na ma angri a be anku. Ŋa dzia dzaa e be, me ka mvuuru epama maami maa ni!»

¹⁶ Ngalion otsuuri bo o ntsa ndzo ma pamaŋa maami.

¹⁷ Ŋa bo aso ayahi Sosotene nkumu a ndzo ma avuonoŋo. Bo aya ma buma nde luuba, ma onyua a ndzo ma pamaŋa maami. Ngalion aka tiha dzaa dzia ni.

Pole ovurihi Antiose a Siri

¹⁸ Pole ovurihi obihi o Korete. Emana nde onyili baana ma anguhu. Oyahi mbuungu oyeni Siri, bla Prisile na Akilase. Nde osa baana owuna otsui o Sakre, obila ma okesi a nde alabi.

¹⁹ Bo ato Efeze mpili e Pole anyili Prisile bla Akilase. Nde oyeni ndzo ma avuonoŋo, oya awobo bla Azife.

²⁰ Bo aduhi nde ma osa tsa etsuhu bla bo. Ŋa Pole obisi.

²¹ Nde onyili bo, nde na bo ndi: «Me edze oya na avuriha na e be, Ndziami odia.» Emana nde otsiehi Efeze okumi o mbuungu oyeni.

²² Pole oto Sezaare, Nde osa kuma na awooso Okuha. Emana nde osurihi Antiose.

²³ Nde osa ka etsuhu eke ntsa onguundu kia, emana nde ovurihi. Nde osa tina osi o Ngalasi emana nde otini osi o Frizi. Nde se ompi aluoni aso mpari.

Apolose ayisiha ŋa Efeze bla Korete

²⁴ Ozife omo a nkuumi Apolose ma kuli ŋa Aleksandri oyi Efeze. Nde awobihi yemiŋi, nde se aki oyahi Esaangumu e Ndziami.

²⁵ Ayisihi nde osuumbu ma oluono ndzila e Nkumu. Nde atosihi na mpari eso, nde se ayisihi maami a Zezi yemiŋi. Ŋa nde aki oyaa eso ni ateeme a Zan.

²⁶ Nde oya awobo na lila leso o ntsa ndzo ma avuonoŋo. Prisile bla Akilase ayuha nde awobo, abiri nde ndzo e bo, aselihi oyisiha nde ndzila e Ndziami.

²⁷ Apolose asaha odze Akayi. Baana ma anguhu ayaasi nde ma odze. Bo ateendi aluoni ma ali kua osaangumu. Ma oduha ndi bo ayamba Apolose yemiŋi. Nde oto kua, nde oyamiŋi baari ma ama yalaha Nkumu mo mpolo e Ndziami.

²⁸ O mua baari aso, ampura a mbari e nde aki avuli ma Azife. O ntini e nde alahii ntsa Esaangumu e Ndziami ndi Zezi oma kaha Krisi.