Dzandza 17 - Obamba Kiwoyeti (mdt) NT Portions

Pole bla Silase o Tesalonike

¹ Pole bla Silase ayiri ma le Afipolise na Apolini, awasihi Tesalonike. O ŋa eki na ndzo Azife ma avuonoŋo.

² Pole oyeni ma otiiri a nde amono Azife. Lemihi le etsuhu ma awuumaŋa etari, nde aki awobo bla bo o mbari e Ndziami eli ntsa Esaangumu.

³ Nde aduha bo, nde se alaha ndi: «Krisi aki ove omoni ambaba, omana nde onyusihi ntsa leku. Ŋa Zezi a me etooso be yu oma kaha Krisi.»

⁴ Baari ake o mpaniŋi e bo ayalihi, bo se ayeni bla Pole na Silase. Ŋa na asi Ngrese kuna ma avuoniŋi Ndziami ayeni bla bo, bla ŋa akaasi kuna ma ali na etomi ma enini.

⁵ Ŋa Azife amoni mfunwamuo. Bo ayahi elibi e baari e bo mamoni ma ewoombo. Bo atsiesi lemvuuru, okrukusu ovi ntsa onguundu. Bo ayeni ndzo e Zason na ayaha Pole bla Silase. Ma oma bo asahi obira bo o mua baari.

⁶ Ŋa bo aka mono bo ni. Bo ayeni na Zason bla ŋa baana ma anguhu ake ma ama yalaha Nkumu, mua ankumu a ma onguundu kia. Aya ma wula ankima ndi: «Baari ba ama sa lesuhu ma esi eso, ŋa bo ami to kuuni.

⁷ Zason oma yamba bo o ndzo e nde. Baari baa aso ama bele angri a Sezaare a nkani. Bo ndi nkani okima oli, nkuumi e nde Zezi.»

⁸ Mbari e bo dzia etiila lemvuuru bla ankumu a ma onguundu.

⁹ Ŋa Zason bla abuha maamo, aki ove awuri adoro a kuna, ŋa apami anyasihi bo.

Pole bla Silase o Bere

¹⁰ Lempiibi leya, baana ma anguhu atumi Pole bla Silase Bere. Bo aso awasihi ma onguundu kia, ayeni ntsa ndzo Azife ma vuonoŋo.

¹¹ Azife a Bere avuli Azife a Tesalonike etsimiŋi ove. Bo ayambi mbari e Ndziami bla ove oso. Etsuhu eso bo ma liira mbari e Ndziami eli ntsa Esaangumu, ma omono yuhu maami a Pole aduuhi ali asisiele.

¹² Kuna o mpaniŋi e bo ayalihi Zezi. Na asi Ngrese, na akaasi ma ali na etomi ma enini. Abalaha kuna se ayalihi.

¹³ Ŋa Azife a Tesalonike ayuhi ndi Pole atooso mbari e Ndziami o Bere, bo ayi ntsa onguundu kia na alehe ondzangavuya na letsiese le baari.

¹⁴ O ŋa baana ma anguhu atumi Pole mpili okeri onini. Ŋa Silase bla Timote asiili o Bere.

¹⁵ Baari ma ayeni na Pole abiri nde tii ngo Ateene. Emana bo avurihi Bere na aduha na Silase bla Timote ndi Pole aduha ndi ledze na basaha nde asisari.

Pole awobo ŋa onguundu Ateene

¹⁶ Pole adila Silase bla Timote ŋa Ateene. Nde omoni ndi ntsa onguundu kia, ma vuono andziami ma otsa otsa kuna. Kia obila otima asi nde obi.

¹⁷ Ntsa ndzo ma vuonoŋo, nde awobo bla Azife ŋa na baari akimama avuonoŋo Ndziami. Ŋa o mua lebuhu nde se awobo bla ayiri a ndzila etsuhu eso.

¹⁸ Anga ntsimi aki baari angula Epikire bla ŋa setoyisye ma ayi se na awobo bla nde. Ake ndi: «Yu nga lesuhu, nde ema aduha ŋa?» Maamo ndi: «Nde mva mvuuru atoosiho andziami ma andzia.» Ni bu Pole atooso ŋa Ntsia e mve e Zezi. Nde se atoosi ndi akui ma adze onyusiha.

¹⁹ Bo abiri Pole bla bo, ayeni na nde mpili ankumu ŋa Aropaze. Bo na nde ndi: «Bisi lebuuna oyuha eyisihi enyarihi e we awobiho bi?

²⁰ We awobo na bisi maami a bisi le eli i yaa ni. Ŋa bisi lesaha oyaa osuumbu a kari eduha.»

²¹ Ma oma asi Ateene bla andzia ma ali ŋa Ateene aso, okaha ma owobo bla leyuha le maami ma anyarihi.

²² Ŋa Pole otemiŋi ŋa Aropadze, nde oyahi mbari ndi: «Asi Ateene, me emono mbri be baari lelaha mbri be levuli ovuono.

²³ Ntini e me eyirihi ma ewoombo e be, me emoniŋi edima e be levuoniŋi. Me emoni na nkobe eli ama teende ndi: “O Ndziami ma ali i yaa ni”. Ŋa me eya na atooso be ndziami a be leli i yaa ni dzua.

²⁴ Ndziami awaangi ntsie bla biibi ma eli o yula ntsie eso, nde Nkumu a yulu bla ntsie, nde aka kaha ma andzo ma tuuŋa mo dziala e baari ni.

²⁵ Dziala e baari ma omuo ma eka dzandzaha o nde ni, nde se kaama o kiila o mvuuru kali. Obila nde mvuuru ampaha baari aso lebihi bla owulu, na ma emo eso.

²⁶ O ngula mvuuru o muo omo otu, nde owaangi baari aso, mo bu ndi bo aka o yula ntsie eso. Nde ayeesi antini ma esibi, bla antini ma ebari e ntsie e bo ma aka o dzo bia mo bo.

²⁷ Ndziami asi vua mo bu ndi baari asaha nde. Si na bo ma mono siami ma osaha nde, bo leke ma adze omono nde. Asisiele nde la na saabe kali.

²⁸ Obila: “Saabe lebihi ŋa o nde, Saabe ledzieŋe ŋa o nde, saabe se leli muo ŋa o nde.” Ati ma eyuumba a be, aki ama duha dzaa dzia ndi: “Ee saabe baana a nde.”

²⁹ O vua saabe baana a Ndziami. Saabe i buuna otsimiŋa mbri Ndziami mva edima ma ama tula o kele e mvunu, bla kele adoro, si kali o kele e baari ma asi, awaangi ma etsimiŋi e bo anku ni.

³⁰ Ŋa ndziami aya i keese antini a baari ma aki i yaa maami maa ni. Ŋa nde aduha na baari ama esi eso, akaala eku e bo.

³¹ Ndziami oma yeese tsuuhu mo, e nde adze opama baari a ma yula ntsie aso, bla opami a tele. Nde aki oma suolo mvuuru omo otu o maami maa. Nde oma laha ndiimi oyalihi e nde anyuusi nde o ntsa leku!»

³² Asi Ngrese ayuha ndi Ndziami abuuna onyuusa mvuuru ntsa leku, maamo aya ma sebe Pole. Akima aya ma duha ndi: «Bisi le edze oya dzue lekima na ayuha we awobo maami ma.»

³³ Ŋa Pole onyili bo.

³⁴ Okoroho ake ayeni bla nde, bo se ayalihi Nkumu. O ntsa bo eki na Deni nkani o ntsa okuha ŋa Aropaze. Bla okaasi omo ma tsuolihi o Damarise, ŋa na maamo.