Dzandza 16 - Obamba Kiwoyeti (mdt) NT Portions

Timote adze bla Pole na Silase

¹ Pole oto Derbe bla Liste. O ŋa eki na oluoni omo ma tsuoloho o Timote. Nguhu a nde Ozife ama yalaha Zezi, taara aki o ngreke.

² Baana ma anguhu ma kihi o Liste bla Ekoniome aduhi maami ma ave o nde.

³ Pole aki na ndzala odze bla nde. Nde osi nde sasi obila ma Azife ma aki ma enkese bia. Ma oma, bo aso aki ama dziaba ndi taara a Timote aki ka Ozife ni.

⁴ Pole bla Silase ayiri ma enguundu eso. Bo atoosi baari ma ama yalaha Ndziami maami ma antuma bla akuuru ma okuha a Zerizaleme ma duhi bo, ndi bo se anyiima maami maa.

⁵ Ekuha se eselihi obaha mpari ma oyalihi. Otali a baari ma yalahi oselehi okuna.

Atsuoli Pole ŋa Maseduane

⁶ Oduduma Santi okaniŋi Pole bla Silase ma otooso mbari e Ndziami ntsa Asi. Ŋa bo avuuli Frizi bla Ngalasi.

⁷ Bo ato tuha na Mizi, asahi odze Bitini. Ŋa Oduduma a Zezi okaniŋi bo ma odze kua.

⁸ Kia obila o bo ma vuuli Midzi, ma osuriha na Troase.

⁹ Lempiibi lemo Pole omoni balaha mo eki osi Maseduane, ma otele ntsa luoro. Nde opisi Pole kolo kolo ndi: «Yira na Maseduane, we oya na ayamaŋa bisi!»

¹⁰ O ŋiŋa emana luoro e Pole, bisi lesahi odze Maseduane. Bisi leyaa mbri Ndziami atsuolo bisi ma atooso Ntsia e Mve kua.

Lidi ayalaha Nkumu ma onguundu o nkuumi Filipe

¹¹ Bisi leyahi mbuungu o Troase, leyeni tele tele ndubu e Samotrase. Eto na etsiere bisi leyeni Neapolise.

¹² Letsiehe ŋa leyeni onguundu o nkuumi Filipe, tso se oki onguundu enini ntsa ngaala e Maseduane. Asi Rome aki ankumu a bo. Bisi letsi etsuhu ŋa.

¹³ Tsuhu ma awuumaŋa, bisi letsuuhi ntsa onguundu ma odze paani okeri. Letsimiŋi mbri lebasaha biri ma ovuono. Bisi lekihi o ntsi, emana lewobi bla akaasi ma aki ma ama kusuha abuha o ŋa.

¹⁴ Omo otu o ntsa bo aki nkuumi Lidi osi onguundu o Tiatire. Nde aki otehi amfa ma wali a ba, nde se avuono Ndziami. Okaasi dzua aki ayuha bisi. Nkumu onaani otima a nde mo bu ndi nde oyuha mbari e Pole yemiŋi.

¹⁵ Nde bla nkuono e nde eso ayahi ateeme. Nde otsuoli bisi ndi: «Yuhu be letsimiŋa mbri me ema yalaha Nkumu dzaa dzaa, leya na aka mpili e me.» Ŋa nde ompi bisi okura ma oyalaha.

Alehi Pole bla Silase ongeneŋe o Filipe

¹⁶ Tsuhu mo bisi leki ledze na biri ma vuonoŋo, odzandzi omo okaasi, odzi ŋa vunuŋa bla bisi. Nde aki na odidima o mbomo emonoŋo maami. Nde aduuhi baari maami ma adze oya o bo. Ma osuumbu dzua, ankumu a nde abaahi adoro kuna.

¹⁷ Nde oya aluono bisi bla Pole. Na owula ankima ndi: «Abalaha ba adzandzi a Ndziami a Nkara Yulu. Bo ma laha be ndzila e be levuuha!»

¹⁸ Nde osi vua etsuhu ekuna kuna. Lo le vula vua, Pole obie nkala okalihi na odidima ndi: «O nkuumi e Zezi krisi, tsuuha ma okaasi yu!» Odidima se otsuuhi ŋiŋa.

¹⁹ Ankumu ma okaasi dzua amoni ndi bo aya i buuna obaha adoro o ngula nde ni, o ŋa bo akuari Pole bla Silase, abiri bo o mua lebuhu mpili apami.

²⁰ Bo ayeni na bo mpili apami ma asi Rome ndi: «Abalaha ba ami ya na lesuhu o ntsa onguundu o saabe. Bo se Azife.

²¹ Ba aya ma yisiha ekihi ekima, me eli ka e saabe ni. Ŋa saabe ma asi Rome, saabe i buuna oyalaha maami a bo, leluoni bo ni.»

²² Lemvuuru lebie nkala na Pole bla Silase. Apami ma asi Rome, apuli bo aso vuele amfa. Atumi ndi abeere bo ekatsi.

²³ Amana obeere bo yemiŋi, alehi bo ma ongeneŋe. Atumi oworo ma okiele bo yemiŋi.

²⁴ Amana oduha na oworo vua, nde olehi bo ntsa osuhu ongeneŋe. Akuri bo o tahi.

²⁵ O mua otima lempiibi, Pole bla Silase aya ma vuono, bo se ma yima anduumu a Ndziami. Engeneŋe ma emo ma eyuha bo.

²⁶ O ntsi na ntsi ŋa, ntsie etirihi. Ebaha ma ongeneŋe eya ma enyuha. Edubihi eso enaahi. Endi ma aki ma ama kura bo o dzo etsuuhi.

²⁷ Okieli engeneŋe onyusihi, omoni edibihi ma ongeneŋe ema naaha. Nde oyahi baha ampele muele ndi nde obuma nyuru. Ma oma nde atsimiŋi ndi engeneŋe emi dima.

²⁸ Ŋa Pole owuli nkima nkara yulu ndi: «Ka bumaŋa nyuru ni. Bisi aso le ba!»

²⁹ Okieli engeneŋe opisi ndi aya na nde mbaa. Oyeni asisari ntsa ongeneŋe. Nde aki atririha na vuoho, ovi o ntsina nyiili e Pole bla Silase.

³⁰ Emana nde otusihi bo, opisi bo ndi: «E ba taara, me ma ovuuha me osa buni?»

³¹ Bo akaali na nde ndi: «Yalaha Zezi a Nkumu, ŋa na we na nkuono e we, be levuuha.»

³² Bo atoosi nde bla baari a ndzo e nde mbari e Nkumu.

³³ O ntini dzi dzia, na mpiibi, okieli engeneŋe obiri pole bla Silase, osalihi bo ampura. Nde se oyahi ateeme bla nkuono e nde eso.

³⁴ Nde okumi na Pole bla Silase ndzo e nde, ompi bo biila. Nde bla nkuono e nde aya ntsa osuere, obila nde omi yalaha Ndziami.

³⁵ Tsuhu etsa, Apami ma asi Rome, atumi aworo na aduha na okieli engeneŋe ndi: «Nyasaha baari ba.»

³⁶ Okieli engeneŋe oyi na aduha na Pole ndi: «Apami ami tuma me onyasaha be. Be lebuuna otsuuha, be ledze ntsa oduusu.»

³⁷ Ŋa Pole na okieli engeneŋe ndi: «Bo aka pama bisi ni. Okoroho bo atumi obeere bisi ekatsi o miisi a baari aso. Ni bu bisi asi Rome. Emana bo alehi bisi ongeneŋe. Ŋa bo aya ma saha otusuha bisi ma adzisihi? Bisi lemi bisa bo anku aya atusaha bisi!»

³⁸ Aworo ayeni na aduha maami maa aso na apami a ma onguundu. Apami amoni vuoho, ntini e bo ma yuhi ndi Pole bla Silase se asi Rome.

³⁹ Bo ayi na pisa bo kolo kolo, emana atusihi bo ma ongeneŋe, aduhi bo ma otsyhe ntsa onguundu.

⁴⁰ Pole bla Silase atsuuha ma ongeneŋe, ayeni mpili e Lidi. Bo amoni baana ma anguhu a bo. Bo ayaasi bo, emana ayeni.