Dzandza 15 - Obamba Kiwoyeti (mdt) NT Portions

Otohi a mo sasi ŋa Antiose a Siri

¹ Abalaha ake awi Zide ma osuriha Antiose a Siri, bo ayisihi baana ma anguhu ndi: «Ove asi be sasi mva angri a moyidze ma duha. Vwa kali, be leka buuna ovuuha ni.»

² Ekemi evi o mpaniŋi e bo bla Pole ŋa Barnabase. Ŋa otohi onini ovi o mpaniŋi baari baa. Aduhi ndi Pole bla Barnabase na ebi baari eke adze Zerizaleme. Bo atiha dzaa dzia na antuma bla akuuru ma okuha.

³ Ŋa okuha Antiose ompi bo biibi e bo ma aki na kaama o dzo, ma odze na dzo opiinga. Bo avuuli Finisi bla Samari. Bo aya ma aduha osuumbu a baari ma ali ka Azife ni ma yalihi Nkumu. Ŋa baana ma anguhu aso aya o ntsa osuere bo mini.

⁴ Bo awasihi Zerizaleme, okuha bla antuma na akuuru ayambi bo. Bo aduhi bo maami a Ndziami asi o mpaniŋi e bo.

⁵ Ŋa Afarizi ake ma ama yalaha Nkumu aya ma duha ndi: «Ove asi baari ma ama yalaha Nkumu, ma ali ka Azife ni sasi, aduhi bo ma onyiima angri a Moyize.»

⁶ Antuma bla Akuuru a ma okuha avuniŋi ma otuba antsuo o dzaa dzia.

⁷ Bo amana owobo kuna, Piere oyahi mbari ndi: «Baana ma anguhu, be leyaa mbri Ndziami ama biha na osuolo me o mpaniŋi e be. Mo bu ndi baari ma ali ka Azife ni ayuha Ntsia e Mve, ayalaha Nkumu.

⁸ Ndziami oyaa etima e baari. Nde oma duha ndi nde ayamba baari ma ali ka Azife ni. Nde se ompa bo Oduduma Santi mva saabe.

⁹ Ndziami aka mpamaŋa reeŋe mpaniŋi e bo bla saabe ni. Nde oma tsuka etima e bo, obila bo ama yalaha.

¹⁰ Ŋa be lesoŋo Ndziami ma oma? Be lesaha olehe olemi o yula aluoni ma eli, ŋa a taara a saabe ŋa saabe anku, leka buuna osaara ni?

¹¹ Okoroho saabe lema yalaha mbri, saabe lema vuuha mva bo ŋa mo mpolo e Zezi a Nkumu.»

¹² Okuha aso oya pi. Emana bo aya ma yuha Barnabase bla Pole mawobo, ma duha andiimi bla epuna e Ndziami asi o ngula bo, mpili e baari ma ali ka Azife ni.

¹³ Bo amana owobo, Zaake oyahi mbari ndi: «Baana ma anguhu leyuha me!

¹⁴ Simion okini ma oyubiha saabe osuumbu a Ndziami asi baana osuolo baari a nde o mpaniŋi e baari ma ali ka Azife ni.

¹⁵ Maami ma awobi a mbari e Ndziami ma duhi maa, ami vunuŋa bla maami ma. Kia obila ma ama teende ndi:

¹⁶ “Amana maa aso, me edze oya na avuriha. Ma ovuriha otsua ndzo e Davide eki ema tsalaha, me vuriha esiila yo, me vuura yo ma otele.

¹⁷ O ŋa baari a yula ntsie maamo aso ma adze osaha Nkumu. Ee baari aso a me etsuoli ma aka a me. Mono maami a Nkumu aduha,

¹⁸ nde oma sa maami a baari ma aki ma ama yaa na kala.”»

¹⁹ Zaake ovurihi oduhi ndi: «Leyuha etsimiŋi e me. Leka suesehe baari ma ali ka Azife, ma ama kalaha mpili e Ndziami ni.

²⁰ Leteende bo osaangumu mbri: “Leka dziaha anyama ma sobo baari, ma ama mpa a ndziami ma otsa otsa vuoŋi ni, lekaa siaha maami ma abi ni. Leka dziaha anyama ma kini otsebe nkii, na ma kini na tohi ni.”

²¹ Ma asi baana kala, baari aki ama biha na otooso angri a Moyize ntsa enguundu, obila ma liiraha mo ntsa andzo ma vuonoŋo ma etsuhu ma awuumaŋa.»

Antuma bla akuuru ma okuha atumi osaangumu Antiose a Siri

²² Ŋa antuma bla akuuru ma okuha na Okuha aso, asuoli antuma o mpaniŋi e bo. Ma odze Antiose bla Pole na barnabase. Bo asuoli Zude ma atsuoloho o Barasabase na Silase, baari ma ali na onkumu o mpaniŋi e baana ma anguhu.

²³ Ampi bo osaangumu kia ndi: «Antuma bla akuuru ma okuha ma awooso baana ma anguhu ma ali ka Azife ni, ma kaha ma Antiose a Siri na Silisi.

²⁴ Bisi lema yuha ndi baari a bisi ama ya na ampa be okrukusu, ama sa be onguo o mbari e bo. Ŋa bisi leka tuma bo ni.

²⁵ Kia obila o bisi aso lesuoli baari ma otuma na e be. Bo ma aya bla andihi a saabe, Barnabase bla Pole.

²⁶ Bo ama mpa lebihi le bo o dzandza e Zezi Krisi a Nkumu a saabe.

²⁷ Ŋa bisi letuma be Zude bla Silase, ma oduha be bo anku maami a bisi leteendi ntsa osaangumu.

²⁸ Ma oma, na Oduduma Santi na bisi i ma luusa be olemi okima ni. Ŋa ove be lenyiimi angri ma ama duha ndi ove anyiimi.

²⁹ Leka dziaha anyama ma ama mpa vuoŋi andziami ma otsa otsa ni. Lekaa dziaha anyama ma kini na tohi na ma nkini o tsebe nkii ni. Be lekaa siaha ompala ni. Be onyiima maami maa, be lesi yemiŋi. Ŋa leya vua!»

³⁰ Pole bla Barnabase, na Zude bla Silase ayeni Antiose a Siri bo ato. Bo se akusihi baari ma ama yalaha Nkumu, bo ampi bo osaangumu.

³¹ Aliiri osaangumu, bo aya o ntsa osuere obila tso oyaasi bo.

³² Zida bla Silase bo anku aki awobi a mbari e Ndziami, ma wobo na baana ma anguhu kuna, ma oyaasa bo, mo bu ndi oyalihi o bo oyama.

³³ Bo atsi etsuhu o biri dzia. Emana baana ma anguhu na bo ndi ledziehe ntsa oduusu. Zude bla Silase avurihi mpili e baari ma tumi bo. [

³⁴ Ŋa Silase okuri ndi nde asiila ŋa.]

³⁵ Pole bla Barnabase asiili ma Antiose bla abuha akimakuna. Bo ma yisiha, bo se ma tooso mbari e Nkumu.

Pole bla Barnabase akabi andzila

³⁶ Etsuhu eyira, Pole na Barnabase ndi: «Tsue levuriha na okie baana ma anguhu, ntsa enguundu eso leyiri na otooso mbari e Nkumu, lemono osuumbu eli bo.»

³⁷ Barnabase asaha obira Zan ma tsuoloho o Marke.

³⁸ Ŋa Pole atsimiŋa ndi i ma buuna obira mvuuru ama biha na onyila bo ni. Obila nde aki oma biha na otsiehe bla bo nkara Pamfili, nde se aka ma dziehe na odzandza bla bo ni.

³⁹ Pole bla Barnabase aka yuha abuha ni, bo se akabi andzila. Barnabase oyahi Marke, bo akumi o mbuungu ma odze na Sipre.

⁴⁰ Pole osuoli Silase. Baana ma anguhu avuoni o nde, ma olehe nde o mpolo e Nkumu. Nde se oyeni.

⁴¹ Pole otini Siri bla Silisi, ma odze na ompa ekuha mpari.