Dzandza 13 - Obamba Kiwoyeti (mdt) NT Portions

Ma tuma Sole bla Barnabase

¹ Ntsa okuha Antiose, eki na awobi a mbari e Ndziami bla abalaha ma ayisiha mbari e Ndziami. Eki na Barnabase, na Simion ma atsuolihi mo pi, na Lisise osi Sirene bla Manaye akuli bla Erode Titrake ŋa na Sole.

² Tsuhu mo bo ama kusaha abuha ma ovuono na leka le ongerehe, ŋa Oduduma Santi oduhi na bo ndi: «Lenyila Barnabase bla Sole o paani ma osa dzandza e me esuoli bo o yo.»

³ Bo amana oka ongerehe bla levuono, alehi se dziala o yula bo, bo anyili bo ayeni.

Barnabase bla Pole o Sipre

⁴ O ŋa Oduduma Santi otumi Barnabase bla Sole, bo asurihi Selisi. O ŋa bo ayahi mbuungu ma odze na Sipre.

⁵ Bo ato Salamine, atoosi mbari e Ndziami ntsa andzo ma Azife ma vuonoŋo. Zan aki bla bo ma oyamaŋa bo.

⁶ Bo avuuli mpuhu dzia, bo ato Pafose. Bo amoni Ozife omo a nga ati ma tsuolihi o Bare-Zezi. Aduuhi ndi nde owobi a mbari e Ndziami.

⁷ Nde akihi o ndzo lepatima Serdzise Paulise. Nde leki balaha oyeri. Nde otsuoli Barnabase bla Sole, obila nde aki na ndzala oyuha mbari e Ndziami.

⁸ Ŋa Elimase anga ati dzi nkuumi e nde mo dzuuyi le ngreke ndzala Barnabase bla Sole kali. Nde se ndzala ndi lepatima oyalaha Ndziami kali.

⁹ O ŋa Oduduma Santi oki oma luula o Sole ma tsuolihi se o Pole, nde okui Elimase ompaha.

¹⁰ Na nde ndi: «We na ndii, we akiisa baari aso, we muana Dzabri. We ndzala maami ma ave kali! Ediiŋi e Nkumu eli tele, ŋa we aka nyila okaala dzo?

¹¹ O ŋa kuoho o Nkumu oli o yula we ma oliisa we. We aka ama mono ni. Ma antini ma, we aka ma asa mono ebalihi e mui ni.» O ntsi na tsi ŋa, miisi ma Elimase apiini, nde oya o ntsa lempiibi. Nde oya asaha ndzila bla mvuuru akuara nde o kuoho, ma olaha nde ndzila.

¹² Ntini lepatima omono maami ma ayiri, oyalihi Zezi. Ŋa Mbari e Nkumu etiili nde ma otima.

Pole bla Barnabase ŋa Antiose a Pisidi

¹³ Pole bla abuha a nde akumi o mbuungu o Pafose, ayeni Perze eli o Pamfili. Ŋa Zan onyili bo ovurihi na Zerizaleme.

¹⁴ Emana Bo atsiehi Perze, aluoni ndzila bo ato Antiose a Pisidi. O tsuhu ma awuumaŋa bo anyuniŋi ntsa ndzo ma vuonoŋo, aya o ntsi.

¹⁵ Amana oliira osaangumu angri bla awobi a mbari e Ndziami, ankumu a ndzo ma vuonoŋo aduhi ndi: «E baana ma nguhu, yuhu be na mbari eyaasa baari, be lebuuna owobo.»

¹⁶ Pole otemiŋi, osaari kuho na bo ndi: «Asi Isayele, be baari lenyiimaŋa Ndziami, lema yuha me!

¹⁷ Ndziami a baari a Isayele ama suolo ankaha a saabe. Nde ama kuusa baari ba ntini e bo ma kihi ma odzia ŋa Ezipte. Emana Ndziami otusihi bo ma osi kia mo mpari e nde.

¹⁸ Nde okieli bo lemihi le ekuumi ma esibi ena (40) o ntsa kayi.

¹⁹ Nde otsali ankaka ntsaami o Kanaan, emana nde ompi osi o bo kia na baari a saabe mva wanda.

²⁰ Maami maa abihi lemihi le enkama ma esibi ena na ekuumi etaani 450. Emana nde ompi bo apami, tii ngo o ntini owobi a mbari e Ndziami Samiele.

²¹ Emana ankaha a saabe apisi nkani. Ndziami ompi bo Saule a muana Kise, ombisa o Bedzame. Saule oki nkani lemihi le ekuumi ma esibi ena (40).»

²² «Emana Ndziami otsiesi Saule ma olehe Davide, ma oka nkani ankaha a saabe. Ndziami aduha o Davide ndi: “Me emi baha Davide a muana Zese. Nde asa me ove ma otima, nde se adze osa maami a me edia aso.”

²³ Ntsa ombisa o Davide, Ndziami oma tusuha ovusihi a Isayele, mva o nde alehi bo ndahi. Nkuumi e nde Zezi.

²⁴ Zezi oki kini oya ni, Zan Batise oti obamaŋa mo bu ndi asi Isayele aso ayaha ateeme ma olaha ndi bo na ndzala okaali eku e bo.

²⁵ Zan-Batise aki oya tuha na omana dzandza e nde, nde oduhi ndi: “O be me na? Me ka mvuuru a be lediliha ni. Ŋa nde aya ngula me. Me ka tele ma otsiese akoroho a mo nyiili e nde ni.”

²⁶ «Be baana ma anguhu a me, si be lema aka ombisa ŋa Abraame, si kali baari ma nyiimaŋa Ndziami o mpaniŋi e be, Ndziami oma tuma mbari evusiha dzi o saabe.

²⁷ Asi Zerizaleme bla ankumu a bo aka yiimba Zezi ni. Ntini e bo ma baniŋi Zezi, bo asi maami ma awobi a mbari e Ndziami a saabe leliiraha ma etsuhu ma awuumaŋa.

²⁸ Bo aka basaha dzaa e bo ma obuma nde oyo ni, okoroho bo apisi Pilaate ma obuma nde.

²⁹ Bo amana osa maami ma teendi ntsa esaangumu o yula Zezi, bo atsiesi nde ma lembandzi alehi o ntsa muuma.

³⁰ Ŋa Ndziami onyuusi nde o mpaniŋi akui.

³¹ Ntsa etsuhu kuna, Zezi osa laha nyuru na aluoni ma wi bla nde Ngalili tii ngo Zerizaleme. Bo aya baari ma siisa enyua o nde na baari a Isayele.

³² Ŋa bisi se letooso be Ntsia e Mve dzia, e ndziami alehi ankaha a saabe ndahi.

³³ Nde asi vua mo saabe leli baana a bo, o ntini e nde anyuusi Zezi ntsa leku. Mva ma ama teende ntsa osaangumu o Pisome o dzuele ndi: “We Muana a me a balaha, lobi me emi kula we.”

³⁴ Ndziami oma nyuusa Zezi ntsa leku. Nyuru e nde eka ma bolo o muuma ni. Ndziami aki ama baana oduha ndi: “Me edze ompa be andosoho ma opeende a dzaa dzaa a me elehi Davide ndayi.”

³⁵ Kia obila o nde avuriha oduha o biri nkima ndi: “We aka nyila opeende a we obolo ni.”

³⁶ Davide omana odzandza ma a nde antini ma osuumbu a Ndziami adii, nde okui. Asiihi nde bla ankaha a nde, emana nde oboli.

³⁷ Ŋa a Ndziami ama nyuusa o ntsa leku aka bolo ni.

³⁸ Baana ma anguhu, ove be ledziabi mbri: o Zezi, ama tooso be leboloho le ambiini a be. Angri a Moyize aki i buuna osa ndi be leki tele ni.

³⁹ Ŋa ongula nde, mpini mvuuru ayalaha ma asa nde oka tele.

⁴⁰ Lesa ayiba ma oduma maami ma awobi a mbari e Ndziami ma teendi ama ya o be:

⁴¹ “Be baari leli na ombira nyuru, lekeese! Be leka o ntsa lekimi, emana be lenyuoŋo. Obila ntsa lebihi le be, me esa maami mo mini a luari, ma ali aduha be ma oduha be leka yalaha ni!”»

⁴² Ntini e Pole bla Barnabase ma atsuhi ntsa ndzo ma vuonoŋo, apisi bo ma oya na vraa tsuhu ma awuumaŋa e vusu, ma ovuriha owobo o maami mimaa.

⁴³ Bo amana okuha dzua, Azife kuna bla baari ma ali ka Azife ni, ma nyiimiŋa angri a Moyize, aluoni pole bla Barnabase. Pole bla Barnabase awobi bla bo, ayaasi bo ma oka yemiŋi o mpolo e Ndziami.

⁴⁴ Tsuhu ma awuumaŋa eto, baari a ntsa onguundu aso akusihi abuha ma oyuha mbari e Nkumu.

⁴⁵ Azife amono lemvuuru lia, mfuniŋa muo esi bo. Bo akimaŋi maami a Pole aduhi, aya ma tuha nde.

⁴⁶ Pole bla Barnabase aya ma wobo bla lila leso ndi: «Eki obaana otooso mbari e Ndziami ŋa na be ma Azife. Ŋa be lemi kemeŋe yo. Be se lema bisa lebihi le mbumbu. Kia obila eli bisi lema adze ŋa mpili e baari ma ali ka Azife ni.

⁴⁷ Kia obila o Nkumu ama duha na saabe ndi: “Me ema tsuusa we, we oyalala o baari, mo vua we adze otooso ovusihi tii mpili esyelehe ntsie!”»

⁴⁸ Ŋa baari ma ali ka Azife ni ayuha vua asueri. Bo akuusi lekuma le mbari e Nkumu. Baari ma aki ma ama suolo aso ma lebihi le mbumbu, akirihi ayalihi.

⁴⁹ Mbari e Nkumu eselihi odze ntsa ngaala dzia eso.

⁵⁰ Ŋa Azife atsiesi akaasi ma aki na etomi ma enini ma vuoniŋi Ndziami, na ankumu a ma onguundu. Bo asaari otohi ma osuesehe Pole bla Barnabase, bo atsuuri bo o ngaala e bo.

⁵¹ Abalaha a vuele ayeni na okubuha owuru a mo ntaami e bo, o mbele maami maa. Bo ayeni Ekonyome.

⁵² Ŋa ma aluoni ma Antiose aso bo asili ntsa osuere, na Oduduma Santi se ama luula o bo.