Dzandza 12 - Obamba Kiwoyeti (mdt) NT Portions

Leku le Zaake bla ongeneŋe a Piere

¹ O ntini dzia, Nkani Erode osuesihi baari ake ma Okuha.

² Nde obumi Zaake a muana nguhu a Zan mo baha ampele muele.

³ Nde omoni ndi dzaa dzia esa Azife ove, nde se otumi okuara Piere. Eki o ntini e tsinda lempeembe leli leviire kali.

⁴ Erode otumi okuara Piere alehi ongeneŋe, nde otumi edzu ena ma aworo ana ma okiele nde. Nde asaha opama nde o mua baari o ntini ma mana tsinda e Paake.

⁵ Ŋa aworo akieli Piere ntsa ongeneŋe. Okuha aki avuono Ndziami antini aso mo nde.

Obaandzi otusihi Piere ntsa ongeneŋe

⁶ Erode asahi obira nde na apama nde o miisi ma ankani. Ŋa lempiibi lia Piere aki atsa tolo o mpaniŋi aworo vuele, ama kura nde ma ankoso muele. Ŋa aworo akimaaki ma kiele onyua a ndzo ongeneŋe.

⁷ O ŋiŋa, obaandzi a Nkumu owasihi, oyalala ekieme ntsa otini o ndzo ongeneŋe. Obaandzi onyuusi Piere obeeri nde ma lebaayi, oduhi ndi: «Temeŋe asisari!» Ankoso se ma akuri nde o dziala anahi.

⁸ Obaandzi na nde ndi: «Kura kuamba, we kura endi ma akoroho a we.» Piere onyiimi. Obaandzi oduhi nde ndi: «Laasa mfa e we e yulu, we oluono me.»

⁹ Piere otsuuhi, oluoni nde. Nde aka tsimiŋa ndi maami ma obaandzi asihi aki dzaa dzaa ni. Nde amoniŋi mo mva luoro.

¹⁰ Bo ayiri mua odzu aworo antsomi, bla odzuele se. Bo awasihi mua odibihi ankoso ma otsuuha ntsa onguundu, tso onaahi tso ankulu o miisi a bo, bo atsuuhi. Bo ato ntsuo e ndzila, o ŋiŋa obaandzi onyili Piere.

¹¹ Piere oyi na avuriha o nde anku oduhi ndi: «Ŋa me eya emono mbri dzaa dzaa, Nkumu omi tuma obaandzi a nde ma ovusuha me o mpari Erode. Nde se omi kiele me, ma obi ma Azife ma sahi osa me.»

¹² Ntini e Piere abahi ntsimi o maami maa, oyeni ndzo e Mariya a nguhu a Zan ma tsuoloho o Marke. O ŋa baari kuna ama kusaha abuha, aki ma vuono.

¹³ Piere okuruhi onyua a ndzo, odzandzi omo okaasi ma tsuoloho o Rode oyi na keese.

¹⁴ Nde oyiimbi dzuuyi le Piere. Nde oya ntsa osuere bo mini. Nde aka sa tsimiŋa onaana ndzo ni. Nde oyeni ma antsiini na aduha abuha ndi: «Piere ayu ma onyua a ndzo!»

¹⁵ Bo na nde ndi: «We na lari!» Nde oselehe odzisiha ndi: «Nde ayu dzaa dzaa!» Bo na nde ndi: «Obaandzi a nde.»

¹⁶ Ŋa Piere oselehi okuruha ndzo. O ŋa bo anaani ndzo amoni Piere, bo aso aya ntsa lekemi lo mini.

¹⁷ Nde osaari kuoho, ma oduha na bo ndi bo aka pi. Nde se oduhi bo osuumbu a Nkumu atusihi nde ma ongeneŋe. Nde ovurihi oduhi bo ndi: «Leduha Zaake bla baana ma anguhu ma amo.» Emana nde otsuhi oyeni otsui okima.

¹⁸ Tsuhu etsa, lesuhu levi o mpaniŋi aworo. Bo aya ma pisa mpili ema adze Piere.

¹⁹ Erode otumi osaha nde ma ebiri eso, ŋa aka mono nde ni. O ŋa nde opisi na aworo ma kielihi Piere, emana nde otumi oya na bo. Erode otsieyi Zide ma odze Sezare, otsi etsuhu kua.

Leku le Erode

²⁰ Erode aki ama bira nkala bla asi Tiire na Sidon. Bo akuri tsuumu ma odze na amono nde. Bo aguri Blastise akielehe otini etsiaha Erode. Bo apisi Erode ma osa oduusu o mpaniŋi e bo. Obila biila e Tiire bla Sidon ewuhi mpili osi ŋa Erode.

²¹ Ŋa o tsuhu dzia Erode olaasi amfa a nde ma onkani, otsuuhi mua lebuhu, oya awobo na baari.

²² Baari awuli ankima ndi: «Awobiho yu ndziami ka mvuuru o muo ni!»

²³ O ŋiŋa se, obaandzi a Nkumu obeeri nde. Ebiha edzi nde, nde okui, obila nde ayahi lekuma obiri e Ndziami.

²⁴ Ŋa Mbari e Ndziami eselehi odze ma ebiri eso.

²⁵ Ntini e Barnabase bla Sole ma amani dzandza e bo o baari a Zerizaleme, bo avurihi, abiri Zan ma tsuoloho o Marke bla bo.