Dzandza 11 - Obamba Kiwoyeti (mdt) NT Portions

Piere o Zerizaleme, aduha antsia ma ayiri na bo o Sezare

¹ Antuma bla baana ma anguhu ma aki o Zide, ayuhi ndi baari ma aki ka Azife ni, ama yalaha mbari e Ndziami.

² Ntini e Piere ayi na avriha Zerizaleme, Azife ma yalihi Zezi ampi nde mberi

³ ndi: «We oma nyuniŋa ntsa andzo a baari ma akini osa sasi ni. We se oma dza bla bo!»

⁴ Ŋa Piere oduhi maami ma ayiri aso ma ebaniŋi, na bo ndi:

⁵ «Me eki ntsa onguundu o Zope me evuono. Me emoni maami a ndzimi. Me emoni kiila ewa na yulu, mva mfa enini, ama kuara ma antsuo ma ana. Owi yulu, oyi mpili e me.

⁶ Me ekeesi yo yemiŋi, me emoni anyama ma embono ena bla anyama a swaha ŋa anyama madzieŋe o bali na anyui.

⁷ Me yuhi dzuuyi leduha na me ndi: “Piere temeŋe, buma we odza!”

⁸ Ŋa me kaali mbri: “Kali Nkumu biibi ma ama lehe ngri bla biila ma ebi ekini onyuniŋa ma onyua me ni.”

⁹ O dzue le odzuele me vurihi eyuhi dzuuyi lia lewa na yulu, lo leduha ndi: “Biibi e Ndziami ama duha ndi eve, we i buuna oduha mbri dzo ebi ni!”

¹⁰ Maami maa ayiri amihi atari, emana avrihi na yulu.

¹¹ O ntsi na ntsi ŋa abalaha atari ayi o ndzo e bisi lekihi o yo. Atumi bo nkara Sezare mo me.

¹² Oduduma Santi oduhi me ma odze bla bo asisari. Baana ma anguhu ma asiami a me eyi bla bo, ayeni bla me, ŋa bisi le nyuniŋi ntsa ndzo e balaha dzia.

¹³ Ŋa nde oduhi bisi osuumbu a nde amoni obaandzi ma otele o ntsa ndzo e nde, oduhi na nde ndi: “Tuma abalaha Zope na ayaha Piere, ma tsuoloho se o Simon.

¹⁴ Nde oduha we maami ma vusuha we bla ndzo e we eso.”

¹⁵ Me eki kini ebaana owobo, Oduduma Santi osurihi o yula bo, mva osuumbu a nde asurihi o yula saabe o ntini lebaani.

¹⁶ Me yubihi mbari e Nkumu aduhi ndi: “Zan ampi baari ateeme ma andza, ŋa ma adze ompa be ateeme ma Oduduma Santi.”

¹⁷ Ndziami oma mpa bo puha dzi dzia, mva o nde ampi saabe o ntini leyalihi Zezi Krisi a Nkumu. Me na, ma oliha Ndziami osa maami a nde?»

¹⁸ Bo ayuha mbari dzia, aya pi. Bo na nde ndi: «Lekuma leka na Ndziami! Ee dzaa dzaa, baari ma ali ka Azife ni ma buuna okaala lebihi le bo. Bo se ma anyuniŋa ntsa lebihi. Ndziami mvuuru ampa bo lengulu lia.»

Okuha Antiose

¹⁹ Baari ma tsalihi o otsa otsa o ntini ma suesihi baari, o ngula leku le Etiene, ayeni tii ngo Finisi bla Sipre na Antiose. Ŋa bo atoosihi mbari e Ndziami eso ni na Azife.

²⁰ Okoroho maamo o mpaniŋi e bo asi Sipre bla Sirene ma aya Antiose. Bo se atoosi Ntsia e mve e Zezi a Nkumu na Angreke se.

²¹ Mpari e Nkumu eki bla bo, kia obila o baari kuna ma yalihi, bo se akalihi mpili e Nkumu.

²² Baari ma okuha a Zerizaleme ayuhi dzaa dzia. O ŋa bo atumi Barnabase Antiose.

²³ Barnabase oto, omoni mpolo e Ndziami ama asa, nde osueri. Nde oyaasi bo aso ma oka tele bla Nkumu ntsa etima e bo.

²⁴ Barnabase aki mvuuru ove, Oduduma Santi oma luula o nde, nde se aki na oyalihi. Baari kuna se ayalihi Nkumu.

²⁵ Emana barnabase oyeni onguundu o Tarse na asaha Sole.

²⁶ Nde omoni nde kua, oyi na nde Antiose. Bo aso avuele asi osibi etiina o ntsa okuha dzua. Bo ayisihi baari kuna. Dzua odzua antsomi ma baani otsuolo aluoni a Zezi ma akritie, ŋa Antiose.

²⁷ Ma etsuhu bia, awobi a mbari e Ndziami asurihi Zerizaleme ma odze Antiose.

²⁸ Omo o ntsa bo nkuumi Angabise. Oduduma Santi aki oma luula o nde, nde otoosi ndi ndzala enini eva o yula ntsie eso. Ndzala enini dzia eyi o ntini e Klode aki nkani.

²⁹ Aluoni ayeesi ndi mvuuru na mvuuru ompa e nde abuuna obaha. Bo atuma, ma oyamaŋa baari ma ama baana ma anguhu o Zide.

³⁰ Aluoni asi vua, bo atumi a bo apuha na Barnabase bla Sole, mpili akuuru a ma okuha a Zide.