Dzandza 10 - Obamba Kiwoyeti (mdt) NT Portions

Piere bla Korneye o Sezare

¹ O Sezare eki na balaha mo nkuumi e nde Korneye. Nde aki nkumu onkama aworo ma tsuoloho ma «Odzu a Itali.»

² Nde aki avuono na lenyiima le Ndziami bla nkuono e nde eso. Nde se aki ayamaŋa anga owuha kuna ma kihi Azife. Nde se avuoniŋi Ndziami antini aso.

³ Tsuhu mo na ngula ndzanga atari aki ami yira atari, Korneye omoni, nde omoni obaandzi a Ndziami yemiŋi onyuniŋa tsa ndzo e nde. Obaandzi na nde ndi: «E Korneye!»

⁴ Korneye okeesi obaandzi na vuoho oso, na nde ndi: «Tso oma Nkumu?» Obaandzi okaali nde ndi: «Ndziami ama yalaha evuoniŋi e we bla apuha a we ampaha anga owuha. Ndziami aka limaŋa we ni.

⁵ O ŋa tuma abalaha Zope bo aya na Simon balaha ma tsuoloho o Piere.

⁶ Nde oli o ndzo e Simon otuli, nga ndzo eli o paani okeri onini.»

⁷ Ŋa obaandzi awobihi bla Korneye na odze, Korneye otsuoli adzandzi a nde vuele bla oworo omo, anyiimaŋa Ndziami. Bo aki ama biha bla nde.

⁸ Nde omana oduha bo maami ma yiri aso, nde otumi bo Zope.

Piere o Zope

⁹ Eto na entsiere, bo aki akini o ndzila tuha na onguundu o Zope, ŋa mua ndzanga, Piere okumi yula oleembe a ndzo na avuono.

¹⁰ Ndzala esi nde, nde osahi odza. Aki akini ma laama nde biila, nde omoni maami a ndzimi.

¹¹ Nde omoni yulu eki ema naaha. Nde omoni kiila ewa na yulu mva mfa ama kuara ma antsuo ma ana. Tso osuruha na ava o ntsie.

¹² Ntsa mfa dzia eki na anyama aso na ma ali na embono ena, na ma dzieŋe o bali bla ankaka ma anyui aso.

¹³ Dzuuyi lewobi ndi: «Piere temeŋe, buma we odza!»

¹⁴ Piere ndi: «Kali Nkumu! Ma oma, me kini odza biila engri bla ma ebi ni.»

¹⁵ Dzuuyi levri lewobi na nde ndi: «Biibi e Ndziami ama duha ndi eli yemiŋi, we i buuna oduha mbri dzo ebi ni.»

¹⁶ Nde omoni maami maa amihi atari, o ŋiŋa mfa dzia avurihi na yo yulu.

¹⁷ Piere aki apisa nde anku ndi: «Maami a me emoni maa ayiri buni?» Dzia biri abalaha a Korneye atumi na asaha Simon baa, ma ato ma onyua a ndzo.

¹⁸ Bo atsuoli, apisi ndi: «Simon ma tsuoloho o Piere, akaha o ndzo dzi?»

¹⁹ Piere oki okini atsimiŋa maami a nde amoni, ŋa Oduduma na nde ndi: «Abalaha atari a ba ma saha we.

²⁰ Suruha paraabu, we odze bla bo we oka ama siaha antsintsiha ni. Obila me mvuuru etumi bo.»

²¹ Piere osurihi na abasaha abalaha baa, na bo ndi: «Me eyu, me mvuuru a be lesaha, ŋa be lesaha me ma oma?»

²² Bo akaali ndi: «Korneye mvuuru atumi bisi. Nde nkumu onkama aworo, nde mvuuru a tele nde se anyiima Ndziami. Ŋa Azife aso ma nyiima nde. Obaandzi opeende omo oma wobo na Korneye ndi tsuolo Piere oya ndzo e we, nde oyuha maami a we aduha nde.»

²³ Piere oyambi abalaha ma atari, nde olahi bo biri e tolo. Eto na entsiere nde otemiŋi oyeni bla bo. Ŋa na baana ma anguhu a Zope se ayeni bla bo.

²⁴ Eto na entsiere ma emo bo ato Sezare, Korneye aki adila bo, nde se aki ama tsuolo nkuono e nde bla andihi a nde ma otima.

²⁵ Ntini e Piere anyuniŋi, Korneye oyi na yamba nde, nde owuri avuo o ntsina nyiili e nde ma owooso nde bla onyiimi.

²⁶ Piere osaari nde oduhi ndi: «Temeŋe, me se ŋa mvuuru omuo!»

²⁷ Bo ma adze na owobo, anyuniŋi ntsa ndzo. O ŋa Piere omoni baari kuna ama kusaha abuha.

²⁸ Nde na bo ndi: «Be leyaa mbri Ozife na ngri ma oka bla mvuuru ali ndzia. Si ma onyuniŋa ntsa ndzo e nde, nde i buuna ni. Ŋa Ndziami omi sa me oyuha ndi me i buuna oma bese mvuuru omuo, me se i ma buuna olabaha na mvuuru mbri nde na nkri ni.

²⁹ Kia obila o me eyi, me eka bisa o ntini e we atsuoli me ni. Ŋa me episa we dzaa e we atumi me oyaha o yo.»

³⁰ Korneye okaali ndi: «Etsuhu eya ŋa etari, atari se atari a ngula ndzanga mima, me eki evuono o ntsa ndzo e me. O ŋiŋa balaha mo eki na amfa ma kiemeŋe oyi o miisi a me.

³¹ Nde na me ndi: “Korneye, Ndziami omi yuha evuoniŋi e we. Nde aka limaŋa apuha a we asihi anga owuha ni.

³² Tuma baari adze Zope na atsuolo Simon ma tsuoloho o Piere. Nde okaha o ndzo e Simon omo otuli, onga ndzo eli o paani okeri onini.”

³³ O ntsi na ntsi ŋaa me etumi baari na ayaha we. We se asi yemiŋi ma oya. Bisi aso leli ŋa o miisi a we ma oyuha maami a Nkumu atumi we oduha bisi.»

Mbari e Piere o ndzo e Korneye

³⁴ Ŋa Piere oyahi mbari ndi: «Sisiele me emi yaa mbri Ndziami aka pamaŋa reŋe ni.

³⁵ O ntsa esi eso, mvuuru anyiima Ndziami, asa maami a tele, Ndziami amono ove mo nde.

³⁶ Ndziami atumi mbari e nde na baari a Isayele. Otoosi bo Ntsia e Mve oduusu o Zezi Krisi a Nkumu a baari aso.

³⁷ Be leyaa mbri maami ma ayiri o ntsa osi o Zide oso, mo abaani o Ngalili, o ntini e Zan atoosihi mbari na lempa le ateeme.

³⁸ Be leyaa osuumbu a Ndziami ampi Zezi a Nazarete a nde asuoli mpari Oduduma Santi. Zezi ayirihi ma ebiri eso na osa leve. Nde ovusihi baari a Dzabri asuesihi, obila Ndziami aki bla Zezi.

³⁹ Bisi baari lesiisa enyua o maami a nde asi aso, ntsa osi Azife bla Zerizaleme. Bo abumi nde ma okomo nde ma lembandzi.

⁴⁰ Ŋa tsuhu otari Ndziami onyuusi nde ntsa leku. Nde ompi nde lengulu ma olaha nyuru e nde na baari.

⁴¹ Ka na baari aso ni, ŋa na bisi. Ma oma Ndziami aki ama biha na osuolo bisi, baari lesiisaha enyua. Ŋa ntini e Zezi anyusihi ntsa leku bisi, ledzi lenyui bla nde.

⁴² Zezi otumi bisi otooso baari maami maa, na lesiisa le enyua ndi: Zezi mvuuru a Ndziami asuoli ma opama baari ma ali muo bla akui.

⁴³ Awobi a Mbari e Ndziami aso aduhi o nde ndi, mpini mvuuru alehe oyalihi o nkuumi e Zezi, abolihi ambiini a nde.»

Baari ma ali ka Azife ni ma baha Oduduma Santi

⁴⁴ Piere oki okini awobo, Oduduma Santi oyi o yula baari ma yuhii mbari e Ndziami aso.

⁴⁵ Baari ma ama yalaha Zezi ma ali Azife, ma ayi bla Piere akimi. Ma osuumbu ma ampi puha Oduduma Santi o baari ma ali ka Azife ni!

⁴⁶ Ma oma bo aki ma yuha baari baa ma wobo adzuuyi akema, ma kuusa lekuma le Ndziami. Piere ovurihi oyahi mbari ndi:

⁴⁷ «Baari ba ami baha Oduduma Santi, va na osa ma buuna oliha bo ateeme ma andza?»

⁴⁸ Ŋa Piere otumi baari ompa bo ateeme o nkuumi e Zezi Krisi. Bo aso apisi nde ma osa tsa etsuhu bla bo.