Dzandza 1 - Obamba Kiwoyeti (mdt) NT Portions

Zezi alehe ndahi Oduduma Santi

¹ Tiofile, ntsa osaangumu o me o ntsomi, me ema teende maami a Zezi asi na a nde ayisihi aso o ntini e nde abaani dzandza e nde,

² tii ngo o tsuhu mayeni na nde yulu. Nde oki okini odze yulu ni, ŋa nde osa ampa antuma a nde asuoli anduo mo Oduduma Santi.

³ Ŋa Zezi omana okua, nde olahi nyuru na bo, nde se olahi bo andiimi kuna, ndi nde oli muo. Nde olahi nyuru na bo lemihi le ekuumi ma etsuhu ena, ma owobo na bo ma Onkani o Ndziami.

⁴ Tsuhu mo Zezi aki adza bla antuma a nde, nde olehi bo ngri ndi: «Be leka tsiehe Zerizaleme ni. Ŋa be ledeli ndahi e Taara alehi, e me eki eduhi be.

⁵ Zan ampi ateeme ma andza. Ŋa mo be, ntsa etsuhu ma eya, be ledze obaha ateeme ma Oduduma Santi.»

Eyeniŋi e Zezi yulu

⁶ Bo ama kusaha abuha, ŋa Zezi se. Bo apisi nde ndi: «E Nkumu dzi ntini e we avuura Onkani o Isayele?»

⁷ Zezi okaali na bo ndi: «Be kaama ma oyaa esibi bla antini a Taara ama yeese, lemihi na onkumu o nde kali.

⁸ Ŋa be ledze obasaha mpari o ntini Oduduma Santi aya o be, be ledze oka baari ma siisa enyua e me o Zerizaleme, na o ntsa Zide eso, na Samari tii ngo o yula ntsie eso.»

⁹ Nde omana owobo vua, nde oyeni yulu o miisi a bo. Lenguri lewuhi nde.

¹⁰ Bo aki akini ma akeese na yulu mpili eyeniŋi nde, abalaha vuele ma ama laasa amfa a fu, awasihi kruu o paani e bo.

¹¹ Bo na antuma ndi: «Be baari a Ngalili, be lemakaana ŋa ma okeese yulu ma oma? Zezi a be lemoni ma adze ŋa nde yulu, adze oya na avuruha ma osuumbu dzu dzua a be lemoni ma adze ŋa nde yulu.»

Odzu antuma bla aluoni maamo

¹² Antuma atsiehi Okuri eti ma Eliive ma odze Zerizaleme. Okuri kia la na Zerizaleme kali.

¹³ Bo ato Zerizaleme, bo akumi ntsa otini o ndzo o yulu, o bo ma vuniŋii o tso na otiiri. Eki na Piere, Zan, Zaake, Andre, Filipe bla Toma, Batelemi bla Matie, Zaake a muana Alife, Simon a Zelote bla Zude a muana Zaake.

¹⁴ Bo aso avuoniŋi antini aso otima omo, ma ovuono bla na akaasi ake mva Mariya a nguhu a Zezi, bla baana ma nguhu a Zezi.

Ma suolo Matiase o biri e Zida

¹⁵ Ntsa etsuhu bia, Piere otemiŋi o mua baana ma anguhu. Bo aki ma buuna oto onkama na ekuumi dziele e baari. Nde oduhi ndi:

¹⁶ «Baana ma anguhu a me, eki ove lemoni maami ma Oduduma Santi atoosi ntsa osaangumu o Ndziami, ma onyua a Davide. Oduduma Santi owobi o Zida mvuuru abiri baari ma akuari Zezi.

¹⁷ Nde aki bla bisi, nde se aki na o nde otomi mva bisi.

¹⁸ Amana ompa nde adoro a wura e mbi, nde osuumi lepaangu. Nde ovi otsui na ntsi, muo abahi, nyiaha eso etsalihi.

¹⁹ Baari a Zerizaleme ayuhi dzaa dzia. Kia obila o bo ma tsuoli lepaangu lia ma “Aklidama” o dzuuyi le bo. Ma oduha ndi “lepaangu le tohi.”

²⁰ Kia obila ma amateende ntsa osaangumu Asoome ndi: “Ndzo e nde oka kruu”, mvuuru se i ka o yo ni! Aluusi ndi: “Mvuuru okima ayaha biri e nde!”

²¹ Saabe ove lesuoli balaha mo o mpanihi e baari ma yenihi bla saabe ntini Zezi ayirihi na epiinga.

²² Ma obaana o ntini e Zan ampi nde ateeme, tii ngo tsuhu mayeni na nde yulu o miisi a saabe. Ove balaha dzia eki mvuuru asiisa enyua ma enyusihi e Zezi bla saabe.»

²³ Alahi bo abalaha vuele: Zuzefe, ma atsuolihi o Barasabase nkuumi e nde e mo Zistise, ŋa na Matiase.

²⁴ Emana bo avuoni ndi: «E Nkumu, we mvuuru adziabi etima e baari aso, laha bisi a we asuoli o mpanihi e bo vuele.

²⁵ Nde osa dzandza antuma o biri e Zida anyili ma odze mpili e nde anku asuoli.»

²⁶ Bo ati owani bla ankuumi a muele. Nkuumi e Matiase etsuuhi. Aluusi Matiase bla antuma a kuumi na omo.