2 Timote 4 - Obamba Kiwoyeti (mdt) NT Portions

¹ Me eselehe oduha we o miisi a Ndziami bla a Zezi Krisi, adze oya na pama baari ma ali muo bla ma amakua, me eduha we lo o nkuumi e Krisi adze oya bla onkumu o nde se:

² tooso mbari e Ndziami, selehe odzisiha ma antini ma ave bla ma abi, dziese bo, bie na bo, yaasa bo, wobo na bo bla ledila, na onguo mo oyisiha.

³ Antini ma adze oya, ma eli baari ake ma aka adze obuuna okura okiini ntini ma wobo ma eyisihi ma opeende, ŋa ma ediiŋi e bo ankulu, bo ma adze odia ankumu ma duha bo maami a bo ma ali na ndzala oyuha.

⁴ Bo ama kiisa atsui a bo o maami ma asisiele, bo ama kalaha ma oyuha maami ma eyuumba.

⁵ Ŋa we, ka yemiŋi o maami aso, kura okiini ma ampasi, tooso Ntsia e Mve, sa dzandza e we.

⁶ Ŋa mo me, ami mpa me mva vuoŋi, antini a me ma odze ami to.

⁷ Me emi dzuana ngru e mve, me emi mana ntsiini, me ema kiele oyalihi.

⁸ Ma obaana o tsuhu lobi ami ntsuusa me ongundza opami o Nkumu adze ompa me o tsuhu opami. Nde ali opami a tele, ŋa ka me otu ni, na o baari ma adze odia edziihi e nde.

Tibi e nde anku

⁹ Sa mpari ma oya na basaha me asisari.

¹⁰ Obila Demase o ma nyila me obila o dia le mo maami a yula ntsie. Nde oma adze Tesalonike, Kresan se oma adze Ngalasi, Tite oma dze Dalmasi.

¹¹ Like otu oli bla me. Yaha Marke we odze bla nde, obila nde abuuna oyamaŋa me o dzandza.

¹² Me ema tuma Tisike Efeze.

¹³ We oto mo oya we oyi na me mfa e me e nyili o Truase mpili e Karpose, we se oyi na esaangumu, vuli vuli a parseme.

¹⁴ Aleksandre otuli oma sa me maami ma abi kuna, Nkumu adze ompa nde gura lemihi na esima a nde.

¹⁵ Ŋa we se sa oyeri bla nde, obila nde oma bele eyisihi e saabe kayi kayi.

¹⁶ Ntini e me ewobi ma lengulu le me o dzue le ntsomi, mvuuru se omo aka yamaŋa me ni, baari aso a subi me kalihi, ŋa Ndziami o boloho bo.

¹⁷ Ŋa Nkumu o yamiŋi me, nde ompi me mpari. Mo bu ndi ongula me aselehe otooso mbari e Ndziami, baari ma ali ka Azife ni aso ayuha yo. Ŋa ama vusaha me se mo onyua ongungu.

¹⁸ Nkumu adze ovusuha me o maami ma abi aso, nde se adze ovusaha me ma onyuniŋa ntsa Onkani o nde o yulu. Lekuma leka na nde ma antini a mbumbu! Amene.

Ewoosi ma lembisa

¹⁹ Wooso Priska bla Akilase, na nkuono e Onezifore.

²⁰ Eraste oma siila o Korinte. Me se ema nyila Trofime na ngaa o Mile.

²¹ Sa mpari mo oya levusu le ntini e mpebe. Ebilise awooso we, bla Pudene, na Linise, na Klodia bla baana ma anguhu aso.

²² Nkumu oka bla oduduma a we! Mpolo eka bla saabe aso!