2 Timote 3 - Obamba Kiwoyeti (mdt) NT Portions

Antini ma lembisa

¹ Ove we oyayi mbri: ma antini ma lembisa, etsuhu e mpasi ma edze oya.

² Ma oma, baari madze oka anga lebi, andihi ma adoro, baari ma ali ndzala amoni bo, anga kuuna, baari ma tuuha Ndziami, i nyima ankuono a bo ni, baari ma ali i yaa leve ni, bla baari ma li i nyima Ndziami ni.

³ Bo etima kali, bo nkerihi e baari kali, baari ma wobiho maami ma abi ma buha, baari ma siaha maami mo otsa otsa, anga ndoki, ndzala maami ma ave kali,

⁴ baari ma sosiho abuha, ama luula o kuuna, bo a ma dia eve e yula ntsie okoroho bo i dia Ndziami ni.

⁵ Bo ma laha ndi bo baari ma ave ma oyalihi o bo, okoroho bo ama bese mpari e tso. Labaha na baari mva baa se!

⁶ Obila bo osuumbu omo, maamo ma nyuniha ma a ntsa ma andzo, bo ma yaha ntsa ekia e bo, eki kaasi me esiaha ambiini kuna, ma bira bo ntsa ediiŋi me ebi eso.

⁷ Antini aso bo okaaha ma osaha oyiha maami, okoroho bo i buuna oyaa asisiele ni.

⁸ Mo osuumbu dzu dzua mva Zanese bla Zambrese ma bisi maami a Moyize, baari baa se ma bisa asisiele, bo baari ma ali na edidima ma ekiini, oyalihi o bo se oyalihi otsa.

⁹ Ŋa bo ma ka labaha ni, obila ma mono lari e bo mua baari aso, mva ma moni e Zanese bla Zambrese.

Mbari le mbisa

¹⁰ Ŋa we, we oma luono me ntsa eyisihi e me bla onguo oso, na ekiihi e me, maami a me, oyalihi o me, na ledila le me, na dia le me bla nkomoŋo e me.

¹¹ Ntsa osuesihi, na ampasi a me emoni ŋa Antiose, ŋa Ikoniome, bla Listre. Asuesihi me kuna, ŋa Nkumu ovusihi me ntsa mo aso!

¹² O ngula ŋa, baari ma saha oka tele bla Zezi Krisi aso madze osuesehe bo.

¹³ Ŋa mo baari ma abi bla ma kiisaha abuha, bo ma adze olabaha ntsa maami ma abi, bo ma kiisa a buha, bo se ma kiisa anyuru a bo anku.

¹⁴ Ŋa we selehe okiele maami ma yisihi we yemiŋi, na a we ayambi bla oyalihi tso mini, we oyaa mvuuru ayisihi we mo.

¹⁵ Esi wa we onkere, we oyaa Esaangumu e Ndziami, dzo ma ebuuna ompa we ntsimi evusuha we ma oyalihi o ma Zezi Krisi.

¹⁶ Esaangumu e Ndziami awaangi eso eki ma oyisiha, mo obisa maami ma abi, ma osa mvuuru oki tele, ma ompa se anduo a tele.

¹⁷ Mo bu ndi mvuuru a Ndziami oka yemiŋi, nde omi basaha lengulu ma osa maami ma ave aso.