2 Timote 2 - Obamba Kiwoyeti (mdt) NT Portions

Osuumbu ma oka oworo a tele a Zezi Krisi

¹ Ŋa we a muana me, sa mpari mo mpolo ewa na e Zezi Krisi.

² Maami a we ayuhi me etooso o miisi a baari ma siisihi enyua kuna maa, duha mo na baari ma ali tele. Bo se ma adze obuuna oyisiha mo na abuha akema.

³ Mono a we ampasi mva oworo ove a Zezi Krisi.

⁴ Oworo ali na onguo o dzandza e nde i ma keese maami akimani, yuhu nde asaha osa nkumu a nde ove.

⁵ Mo vua se, odumi ntsiini obasaha ongundza se yuhu nde aduma ntsiini ma lemihi ma ama yeese angri.

⁶ Okuni amono nkala e dzandza, mvuuru antsomi abaana obaha e nde mburu.

⁷ Tsimiŋa maami a me eduha we. Ŋa Nkumu adze osa ndi we oyuha mo aso.

⁸ Yibiha Zezi Krisi a ma ombisa o Davide ma anyuusi o mpaniŋi akui, mva o Ntsia e Mve e me etoosoho.

⁹ Me emono ampasi ŋa o yo, me se ama kura ma ankoso mva ombeŋe. Okoroho mbari e Ndziami akini okura ma ankoso ni!

¹⁰ Kia obila o me ekura okiini o maami aso obila mo baari a Ndziami ama suolo. Mo bu ndi bo se avuuha mo Zezi Krisi, abaha lekuma le mbumbu.

¹¹ Mbari dzi asisiele: «Saabe okua bla nde, saabe se leedze obaha lebihi bla nde.

¹² Yuhu saabe lemono ampasi bla nde, saabe se leedze okuuma bla nde. Saabe osuba nde kalihi, nde se adze osuba saabe kalihi.

¹³ Saabe obisa oka tele, nde, nde okaha ni tele. Obila nde i buuna obengele nyuru e nde anku ni.»

Odzandzi a Ndziami ayalaha

¹⁴ Ŋa maa aso, ove we yubihi bo mo o miisi a Ndziami, bo i toho o mpaniŋi e bo o yula ampura a mbari ni. Etohi bia otsa, o ngula letsala le baari ma yuuha bo.

¹⁵ Sa mpari ma olaha na Ndziami mbri we mvuuru ma suesehe, we odzandzi ali i sue ni, ayisiha mbari asisiele tele.

¹⁶ We onyili lesuhu le otsa, le oyalihi kali. Baari ma siaha vua ma adze oselehe olabaha na Ndziami.

¹⁷ Mbari e bo mva mpura ondolo edziaha akabi. Mva Imene bla Filetose.

¹⁸ Bo ama labaha na asisiele, bo aduuha ndi ama mana omono enyusihi. Bo ma posoho oyalihi o baari kuna.

¹⁹ Okoroho ebaaniŋi e maami ma ave a Ndziami ema yama. Ama teende mbari ndi: «Nkumu odziabi baari a nde», si kali ndi: «Mpini mvuuru abuusa nkuumi e Nkumu ove onyili maami ma abi osa!»

²⁰ Ntsa ndzo enini i buuna obasaha akobo a ma akele amvunu bla adoro atu ni. Eli se na a ma eti, na ama oboyi. Ake a ma atsinda, maamo lekuaraha etsuhu eso.

²¹ Mvuuru atsuka nyuru mo maami a nde ma abi, nde adze oka mva kobo e mvunu, mvuuru dzua oka opeende. Nde adze oka yemiŋi mo Nkumu, nde oya abuuna osa mpini dzandza e mve.

²² Labaha na etsimiŋi ma ebi ma ongondo. Saha opami bla oyalihi, na dia bla oduusu mo baari ma vuonoŋo Nkumu bla etima e tse tse.

²³ Ŋa we obisi lesuhu le otsa na mbari odzili. We oyaa mbri mo maami ma dziaha na etohi.

²⁴ Odzandzi a Nkumu nkaa i toho bla abuha ni, nde nkaa oka o ntsa oduusu bla abuha, mvuuru abuuna oyisiha. Ove nde osi okiini o maami a baari ma woboho.

²⁵ Nde owobo na baari ma ama bele nde bla oduusu oso. Leke Ndziami adze ompa bo lengulu ma okaala eku, bo ayaa asisiele.

²⁶ Bo aya na avuriha o bo anku, atsuuha ntsa okia o Dzabri aki ama kuara bo, bo ama kiriha ayiha ma ediiŋi e nde.