2 Timote 1 - Obamba Kiwoyeti (mdt) NT Portions

Ewoosihi

¹ Me Pole a ntuma Zezi Krisi ma ediiŋi e Ndziami, ma otooso saabe lebihi ma lehi ndahi o Zezi Krisi.

² Me eteende we Timote a muana a me a dia. Ŋa Ndziami a Taara bla Zezi Krisi Nkumu a saabe ampa we mpolo bla ove na oduusu!

Evuonihi e Ndziami

³ Me empa Ndziami a me edzandziha o nde leve bla etsimiŋi ma eve, mva esiihi ankaha a me. Ma antini aso me etsimiŋa o we, na na mui na na mpiibi, o ntsa evuoniŋi e me.

⁴ Me kini eyibiha antsia a we. Me se eki na ndzala ovuriha omono we, mo bu ndi me eka ntsa osuere bo mini.

⁵ Me kini eyibiha oyalihi o dzaa dzaa eli o we. Oyalihi obaani oka na nkaaha a we okaasi Loyise, bla nguhu a we Enise se. Ŋa me emono mbri sisiele oyalihi oli o we se.

⁶ Kia obila o me eyibiha we mbri: kiele puha e Ndziami ampi we yemiŋi, o ntini e me elehi dziala o yula we.

⁷ Ma oma, Ndziami aka mpa saabe oduduma a vuoho ni, ŋa oduduma a mpari na dia bla ekiihi e mvuuru.

⁸ Kaa monoŋo okru ma osiisa enyua o Nkumu a saabe ni, kaa monoŋo se okru o me eli mo ongeneŋe mo nde ni. Ŋa mono ampasi bla me obila o Ntsia e Mve, lehe tari o mpari e Ndziami.

⁹ Nde mvuuru avusihi saabe nde se otsuoli saabe ma osa lebihi le opeende. Ka ma esima e saabe ma eve ni, ŋa mo maami a nde anku amayeese bla mpolo e nde. Nde ampi saabe mpolo dzia kala kala, levusu le antini a mbumbu mo Zezi Krisi.

¹⁰ Nde oma laha saabe mpolo dzia lobi ma edziihi e Zezi Krisi ovusihi. Nde oma buuna mpari leku, nde se oma sa okieme lebihi le mbumbu obila mo Ntsia e Mve.

¹¹ Ndziami oma suolo me ma otooso Ntsia e Mve dzi, me ntuma me se oyisihi.

¹² Kia obila o me emono ampasi ma. Okoroho me i mono okru ni, obila me eyaa mvuuru a me ema lehe oyalihi o nde. Me eyaa mbri nde na onkumu ma okiele maami a nde aduhi me, tii ngo tsuhu opami.

¹³ We okieli mbari e tele e me eduhi we, sa mpari ntsa oyalihi bla dia ma eli o Zezi Krisi.

¹⁴ Kyele maami ma ave ma duhi we ma Oduduma Santi ali se o saabe.

Ondihi ma ove

¹⁵ Ma osuumbu a we adziabi, asi ngaala Azi aso ama suba me kalihi, ŋa Fizele bla Ermozene se.

¹⁶ Ŋa Nkumu osa nkuono Onezifore leve, obila nde se ayaasihi me, nde aka mono okru ma osuumbu a me eki ma ongeneŋe ni.

¹⁷ O ngula ŋa nde oto Rome nde oselihi osaha me, tii ngo e nde asuoli me.

¹⁸ Ŋa Nkumu osa ndi Ndziami osa nde ove o tsuhu opami! We se oyaa yemiŋi osuumbu a nde ayamiŋi me ŋa Efeze.