1 TIMOTE 6 - Obamba Kiwoyeti (mdt) NT Portions

Ayiha

¹ Baari aso ma ali ayiha anyiimi ankumu a bo bla onyiimi onini. Mo vua, baari i ma tuha Ndziami ni bo se i duha ndi eyisihi e saabe ebi ni.

² Ayiha ma ali na ankumu ma ama yala Ndziami ove anyiimi ankumu a bo, bo i ma duha ndi saabe baana ma anguhu ni. O ngula ŋa, ayiha aselihi o dzandza o bo yemiŋi, ma oma bo baari ma ama yalaha Ndziami bo se baana ma anguhu ma ave a dia. Mono maami a we ayisiha bla a we aduha.

Oyalihi o ma Ndziami oma kaha osolo a dzaa dzaa

³ Yuhu mvuuru ayisiha maami akema, nde onyili mbari e tele e Nkumu a saabe Zezi bla eyisihi e yemiŋi ma edze bla oyalihi o saabe,

⁴ ŋa kuuna ema biinda nde miisi, nde i yaa dzaa ni. Nde na ngaa bla ekemi o ntsa mbari e nde, bla angru. O ŋa mfunwamuo eyi, bla otohi na letuha le Ndziami, na lebanaŋa le abuha maami ma abi.

⁵ Bo akaha antini aso ntsa otohi, o mpaniŋi e baari ma ali na odidima akruha baari. Bo asisiele kali, bo obaa ndi oyalihi lebaha le adoro.

⁶ Ŋa oyalihi o dzaa dzaa o ma Ndziami oka osolo onini o ntini e we ayalaha okiehe o we ali na bo.

⁷ Ma oma, saabe leka aya na kiila o yula ntsie ni, saabe se leka adze obira kiila ni.

⁸ Saabe obasaha biila bla mfa eya yemiŋi!

⁹ Ŋa mo baari ma saha osolo, asoŋi bo, bo avi ntsa oyere. Omana bo aya ma asa maami a ntsimi kali, ma tuma bo ntsa mpasi omana bo atamiŋi.

¹⁰ Ndzala adoro oma kaha osina o maami ma abi kuna. Baari kuna ama suba oyalihi kalihi obila o bo. Ŋa bo anku ama lehe ampasi o nyuru.

Ma ampa Timote tibi

¹¹ Ŋa we ali mvuuru a Ndziami, labaha na maami maa! Sa mpari ma osa maami a tele: we onyiima Ndziami bla oyalihi na dia, sa nkomoŋo ntsa oduusu.

¹² Dzuana ngru e mve e ntsa oyalihi. Yaha lebihi le mbumbu ma tsuoli we o lo, le we ayalihi mo mbari e we e mve o miisi a baari kuna ma siisi enyua.

¹³ Me eduha we o miisi a Ndziami asuumbi biibi eso, na o miisi a Zezi Krisi mvuuru asiisi enyua, o mbari e nde e mve oyalihi o miisi a Posi Pilaate.

¹⁴ Nyiima esibii ma lehi we, kiele mo yemiŋi maami ma abi kali, tii ngo tsuhu e Nkumu a saabe Zezi adze owasaha.

¹⁵ Ma antini a Ndziami ama yeese nde anku, nde a nga leve, nkumu aso nde, ali Nkani ankani nde se Nkumu ankumu.

¹⁶ Nde i kua, nde oka o ntsa oyalala eli mvuuru i buuna otsiina ni. Mvuuru o muo se omo okini omono Ndziami ni, i buuna se omono nde ni. Lekuma leka ŋa nde, mpari e nde eka mbumbu! Amene.

Matiba anga osolo

¹⁷ Duha na anga osolo a yula ntsie anyila kuuna. Bo se i lehe tari ma osolo ali ibuha ni. Lila oka ni o Ndziami mvuuru ampaha saabe enaama e ntsie eso, mo bu ndi saabe lesuere.

¹⁸ Duha bo asa leve, bo avuha ma esiima e ma eve, bo aka na eku ma eve, bo ampa nyengele, bo aka na kabi o mpaniŋi abuha.

¹⁹ Mo vua, bo akusuha otambu ove bla onini ma antini ma adze oya, bo abaha lebihi le dzaa dzaa.

²⁰ E Timote, kiele maami ma yisihi we. We oka nyuniŋa o ntsa lesuhu le otsa ni, maa maami ma ali i dze bla oyalihi ni. We oka nyuniŋa ntsa ontiha a ma eyisihi ma otsa ni.

²¹ Baari ake maduha ndi bo na oyaa vua, ŋa bo ama labaha na oyalihi. Mpolo e Ndziami eka na be!