1 TIMOTE 5 - Obamba Kiwoyeti (mdt) NT Portions

Tibi ma mpaha nkumu okuha

¹ Ka bieŋe na okuuru bla nkala eso ni, ŋa we wobo na nde mva taara. Yaha endzambu e baari mva baana ma anguhu.

² We otibi akaasi ma akuuru mva anguhu, endzambu ma kaasi mva ankeri, bla o tse tse oso.

Akaasi ma akuuli a ma okuha

³ Yamaha akaasi ma akuuli bla onyiimi, akuuli a dzaa dzaa.

⁴ Ŋa okaasi okuuli yuhu na baana si kali andaala, bo baari mabaana olaha oyalihi levusu na nkuono e bo anku. Ove bo ayamiŋi nkuono e bo. Mono maami ma ave a Ndziami ama dia.

⁵ Ŋa ma okaasi okuuli a dzaa dzaa, ama siila nde otu, nde oma lehe lila le nde o Ndziami ŋa na mui na na mpiibi, nde se oma sa nkomoŋo ntsa lepisa le kolokolo bla evuoni.

⁶ Ŋa mo okuuli okaasi ali otsimiŋa eso maami me eve e yula ntsie, nde oma mana okua se ŋa nde okini muo.

⁷ Ŋa mono se maami a we avriha oyibiha akuuli, ove bo aki baari ma ali i mono dzaa e mbi o bo ni.

⁸ Mvuuru ali i koso nkuono e nde ni, vuli vuli baari ma kaha o ndzo e nde, nde ŋa nde abisi oyalihi, nde se ovuli na mvuuru a kini yalaha Ndziami ni obi.

⁹ Okaasi ma teende nkuumi ntsa odzu akaasi ma ali akuuli, o ma kaha ni okaasi ami to tuha na ekuumi me esibi esiami. Nde se aki olumi omo otu.

¹⁰ Ove ayaa nde ma esima e nde ma eve: ayaa ndi nde oma kuusa baana a nde, nde oma yamba baari, oma tsuka nyili e baari ma ali epeende, nde oma kooso baari ma ali ntsa ndoho, oma sa esima ma eve eso.

¹¹ Ŋa ma akuuli ma kini enkere, we olehi bo opaani, obila ntini ediiŋi e bo me edze osa bo alabaha na Krisi, bo asahi obaha olumi okima.

¹² Ŋa bo akui ntsoso ma osuumbu a bo ma aka nyiima ndahi e bo ma lehi bla Krisi ni.

¹³ O ngula ŋa, bo yuhu dzandza kali, bo aya oyira ma andzo. Se bo dzandza kali, bo se ma wobo kuna, bo dzisihi kali, bo se aya owobo otsa otsa.

¹⁴ Me ediha mbri akuuli ma kini enkere avrihi abahi alumi akema, bo akuli baana, adii se ndzo ebo. Mo vua bo i ma mpa buha le ombangu lengulu ma otiha saabe ni.

¹⁵ Obila akuuli ake ami tamaŋa mo oluono Sata.

¹⁶ Yuhu okaasi a ma yaliha Ndziami na akuuli ntsa nkuono e nde, nde oyamiŋi bo. Nde i ma nyila bo na okuha otu oyamaŋa bo ni, mo bu ndi okuha oyamiŋi akuuli a dzaa dzaa.

Akuuru ma okuha

¹⁷ Akuuru ma okuha ma asa dzandza e bo yemiŋi aguri bo gura dzuele, vuli vuli baari ma monoŋo mpasi ma letooso le mbari bla leyisiha le yo.

¹⁸ Osaangumu o Ndziami eduha ndi: «Lekaa kuriha ngoombo onywa ma oliha nde odza o ntini e nde adzaraha ble ni», si kali ndi: «Odzandzi ove na gura.»

¹⁹ Ka yalaha mbri abaniŋi okuuru a mo okuha, yuhu baari vuele si kali atari akini siisa enyua ni.

²⁰ Baari ma sa mbiini, we owobi na bo o mua baari aso, mo bu ndi abuha ma amo amoni vuoho.

²¹ Me eselehe ojisiha we o miisi a Ndziami bla a Krisi Zezi, na abaandzi a Ndziami ma ama suolo mbri, nyiima maami maa yemiŋi, we i ka ma lengulu le mvuuru ni, we se i pama reeŋe ni.

²² Kaa siaha asisari ma oleehe dziala o yula baari ni, kaa anyunuŋa o mbiini e mvuuru ni. We anku, we okieli nyuru tse tse.

²³ Kaa nyuaha andza atu ni, we onyui se mpesi e mali. Obila mo gusi le we bla angaa a we.

²⁴ Baari maamo mamono ambiini a bo tselele, o ntini ma kini i pama se bo ni. Ŋa mpili e baari maamo, omono mo kala kala.

²⁵ Ma mono esima me eve se tselele, osuumbu dzu dzua se e ma esima ma li i mono parabu ni, ma eka adze obuuna oka ma dzisihi ni.