1 TIMOTE 4 - Obamba Kiwoyeti (mdt) NT Portions

Biibi e Ndziami awaangi eso eve

¹ Oduduma aduha lo tselele ndi: ma antini ma lembisa, ake ma kemeŋe oyalihi, bo adia edidima me kiisa bo bla eyisihi ma ebi ma edidima ma eduha bo.

² Bo ma adze onyuoŋo obila ma anga ompiele na ndii, ma ali etsimiŋi e bo mva ama kila ampri a ba.

³ Bo ma adze oliha baala, bo ma liha ndi i dza biibi eke ni. Ŋa Ndziami awaangi dzo mo bu ndi baari ma ama yalaha Ndziami, baari ma ayaa asisiele yemiŋi, ma ayaha dzo bla lempa la leve.

⁴ Obila e Ndziami ama waanga eso biibi ma eve, kiila se omo le bisa kali yuhu leyaha dzo bla lempa la leve.

⁵ Obila, mbari e Ndziami bla ovuoni ma esa ndi dzo eka tse tse.

Odzandzi a zezi Krisi ove

⁶ Yisiha maami ma aso na baana ma anguhu: mo vua we okiriha odzandzi ove a ntsa okuha a Krisi zezi, ma ama bunuŋa bla mbari oyalihi na oyisihi ove a we ama luono yemiŋi.

⁷ Ŋa bisa maami ma eyuumba ma ekubu ma akaasi ma wobiho kuna ma ali i dze yemiŋi bla oyalihi ni.

⁸ Lenyuha le nyuru leli yemihi mo maami a ntseeri. Okoroho leka le yemiŋi bla Ndziami se dzaa e mve o maami kuna, ndahi lebihi se eka aka na nde, ma lebihi le parabu si kali ma lebihi ledze oya ni?

⁹ Dzia mbari e tele ma buuna olehe tari o yo, baari aso se ma yamba yo yemiŋi.

¹⁰ Obila yuhu saabe lemono mpasi, si kali ledzuana, obila saabe lema lehe lila le saabe o Ndziami a muo, ali ovusihi a baari aso, vuli vuli baari mama yalaha nde.

¹¹ Mono maami a we aduha ma osa, bla a we ayisiha.

Laha ayalihi a Ndziami osuumbu oka

¹² Mvuuru se omo i bese we ma osuumbu a we ekini ondzambu ni! Ŋa we, laha leka le we letele mo baari ma ama yalaha o ntsa mbari e we bla ekiihi e we, o dia le we bla oyalihi na leka le tse tse le we.

¹³ Ma odila edziihi e me, mpa nyuru e we ma oliira Osaangumu o Ndziami o mua baari, na letooso le mbari, bla leyisiha.

¹⁴ Ka besehe puha e mpolo eli o we ni, ma ampi we o ntini awobi a ma lengulu le Ndziami ma wobi, bla ŋa ntini akuuru ma okuha ma lehi dziala oyula we.

¹⁵ Mono maami a we akiele ntsa otima, mono osuumbu a we a sa nkomoŋo. Ŋa baari aso amono osuumbu a we ŋa kula.

¹⁶ Ka muo o we anku bla eyisihi e we. Sa nkomoŋo, ntini e we a sa vua, we asi yemiŋi we avusaha we anku bla baari ma yuha we.