1 TIMOTE 3 - Obamba Kiwoyeti (mdt) NT Portions

Ankumu ma ekuha e Ndziami

¹ Mbari dzi mbari e dzaa dzaa, mvuuru yuhu asaha oka nkumu o ntsa okuha, dzia dzandza e mve e nde adii.

² Nkumu ove oki mvuuru ove, ove nde se oka okari omo otu, nde oki na eku ma eve nde oki mvuuru ma nyiimaŋa, oki na ekiihi ma e mve, nde oki mvuuru ayambaha baari, nde se oki mvuuru abuuna oyisaha.

³ Nde i ka oyiha a mali ni, nde i ka na ndzala angru ni, nde oki na oduusu, nde i ka na ndzala otohi ni, nde se i ka oyiha adoro ni.

⁴ Ove nde oyaa oka nkumu e ndzo e nde anku, ove nde osi ndi baana a nde aki na onyiimi bla eku ma eve.

⁵ Ŋa mvuuru ali i yaa okiele ndzo e nde anku ni, nde okiele okuha a Ndziami yemiŋi buni?

⁶ Nde i buuna oka mvuuru akini ma okaala eku ni, ma oduma nde oma va, kuuna ema biinda nde miisi, nde onyuniŋa ongeneŋe mva Dzabri.

⁷ Ove se baari ma ali o ndzi asiisi enyua ma antsia a nde ma ave, ma odima ama bese nde si kali nde oma va ntsa oyere a Dzabri.

Adzandzi a ntsa okuha

⁸ Ma osuumbu dzu dzua, ove adzandzi a ntsa okuha asi ndi baari anyiima bo, enyua e bo otusuha dzaa mo ntu, bo i nyua mali a kuna ni. Bo i saa maami ma okru ma obaha adoro ni.

⁹ Ove bo akieli maami a ma adzisihi ma oyalihi bla etsimiŋi ma eve.

¹⁰ Ove asa miha bo, omana yuhu i mono dzaa e mbi o bo ni, bo adzandzi o ntsa okuha mva adiakre.

¹¹ Ma osuumbu dzu dzua se, ove akaasi aki na baani, bo i wobo otsa otsa ni, bo aki na eku ma eve, ove bo aki baari ma buuna olehe tari o bo o maami aso.

¹² Adzandzi a ntsa okuha obaha okari omo otu, ove bo akieli baana bla andzo a bo yemiŋi.

¹³ Obila baari ma dzandzaha ntsa okuha yemiŋi, ma abaha etomi ma eve bla tari le ma oyalihi o ma Krisi zezi.

Edziabi ma oyalihi empa saabe

¹⁴ Me eteende we osaangumu ki, me na lila ma oya na basaha we asisari.

¹⁵ Ŋa me osa andira ma oya, ngula osaangumu ki we ayaa osuumbu ma oka o ntsa ndzo e Ndziami, eli okuha a Ndziami a muo. Oleembe bla okieli asyisyele.

¹⁶ Dzaa dzaa maami ma anini ma aki ma adzisihi, ma lahi na baari ma ali yemiŋi bla Ndziami. Krisi... Olahi nyuru mva mvuuru o muo, Oduduma Santi oyahi nde mo mvuuru a tele, nde olahi nyuru na antuma. Atoosi nde na baari aso, ayambi nde bla oyalihi o yula ntsie eso, akuusi nde ntsa lekuma!