1 TIMOTE 2 - Obamba Kiwoyeti (mdt) NT Portions

Osuumbu ovuono

¹ Kiila o ntsomi o me eduha be ma osa oma kaha episihi e na Ndziami ntsa evuoni na lepisa le kolo kolo, na lempa le nde leve mo baari ma omuo aso.

² Levuono ma ankani na baari aso ma ali na onkumu, mo vua saabe lebaha lebihi le nyengele, le ntsa oduusu na le nyiima leka le yemiŋi bla Ndziami, leka na eku ma eve.

³ Mono maami ma ave, a yemiŋi o miisi a Ndziami Ovusihi a saabe.

⁴ Nde na ndzali ndi baari aso avuuha, bo se abuuna oyaa asisiele.

⁵ Obila Ndziami ni omo otu, oyeesi maami o mpaniŋi e Ndziami bla baari se ni omo, mvuuru o muo yu, omo: Krisi zezi,

⁶ ampi nyuru e nde mva gura evusuha baari aso. Dzua osuumbu a Krisi zezi alahi ma antini a Ndziami ayeesi.

⁷ Kia obila ma suoli me ma oka otoosi bla ntuma, me eduha ŋa dzaa dzaa ka me ekura ni, ma oyisiha se oyalihi bla asisiele na baari ma ali ka Azife ni.

Eku ma akaasi bla abalaha o ntsa okuha

⁸ Ŋa me esaha mbri baari avuono ma ebiri eso, bo akuusi dziala ma eli epeende na yulu, i bira nkala na buha ni, otohi se kali.

⁹ Ŋa ntini akaasi ma vuono ove bo alaasi amfa a yemiŋi bla onyimi na baani. Bo i tua etsui eluari ni. Bo i laasa ankuere ama akele amvunu ni, bo i laasa ayaka ni, bo se i laasa amfa a mvunu ni

¹⁰ Ŋa bo asi maami ma ave bla oduusu, mva esiaha akaasi ma duuha ndi bo ma nyiima Ndziami.

¹¹ Ove akaasi aki tsuo o ntini ma yisiha bo. Bo se anyiimi.

¹² Me eka adia mbiri okaasi oyisihi si kali obahi onkumu o yula balaha ni. Ove nde oki pi.

¹³ A Ndziami abaani osuumba ntsomi eki ni Adam, emana nde osuumbi Eeve.

¹⁴ Ŋa ma akuri kaa Adam ni, ma akuri eki Eeve, nde se aka nyiima maami a Ndziami aduhi ni.

¹⁵ Okoroho ma vusuha nde ma obila o nde akuli baana, ŋa ove se nde osi nkomoŋo o ntsa oyalihi na dia bla opeende ŋa na baani.