1 TIMOTE 1 - Obamba Kiwoyeti (mdt) NT Portions

Ewoosihi

¹ Me Pole, me ntuma a Krisi zezi, ma osuumbu a Ndziami Ovusihi a saabe bla Krisi zezi a lila le saabe atumi me.

² Me eteende we Timote, muana a me a dzaa dzaa a ma oyalihi. Ndziami a Taara bla Zezi Krisi a Nkumu osa we mpolo, osa we ove, ompa we oduusu!

Madziese ayisihi a mbari e Ndziami ma abi

³ We okaha ma Efeze mva o me eduhi we, o ntini e me eyenihi Maseduane. Ntsa onguundu kia, na baari ma ayisiha eyisihi ekima. Ŋa ove we oduhi bo, bo i ma sa vua ni!

⁴ Duha bo asuba maami ma eyuumba bla ŋa otsia ŋa ombisa eli iwani. Maa maami ma dziaha na etohi. Mo se maliha bo osa dzandza e Ndziami ayeesi ntsa oyalihi.

⁵ Me eduha mo, o bu mbri abaha dia ewa ma otima a tse tse, bla etsimiŋi ma eve na oyalihi o sisiele.

⁶ Baari ake ama bisa bia esiihi, ama tamaŋa ntsa lesuhu le otsa.

⁷ Bo ma duha ndi bo ayisihi ma angri a Ndziami. Okoroho bo i yaa maami a bo ma duuha, na a bo ma wobiho na mpari eso ni.

⁸ Saabe leyaa mbri angri na ove, yuhu lesa mbri e mo maduha.

⁹ Ove saabe leyuhi ndzele ndzele mbri, angri aka ampa o baari ma ali tele ni. Ŋa ma embeŋe na baari ma ali baani kali, bla ŋa baari ma ali i nyiima angri ni, na ma siaha ambiini. Mo baari ma ali i nyiima Ndziami na maami ma awa na e nde bla ŋa baari ma sebehe Ndziami. Mo baari ma bumaŋa ataara bla ŋa ma bumuŋa anguhu, na abumi a baari.

¹⁰ Mo baari masiaha ntsuuma, na abalaha ma tsiaha bla abuha ma abalaha. Baari matehe ayiha, anga osami na ma labaha ekesi otsa otsa. Si kali baari ma bisiha eyisihi e tele.

¹¹ Mono eyisihi e Ntsia e Mve ma ampi me, yo ewuaha na e Ndziami lekuma a nga leve.

Ledziaba le ove o Ndziami

¹² Me empa mvuuru a ma ampa me mpari leve kuna, Krisi zezi a Nkumu a saabe. Nde mvuuru alehi tari o me, nde oyahi me o dzandza le nde.

¹³ Se na o me eki mvuuru atuuhi Ndziami, me esuesehi baari bla nkala eso. Ŋa Ndziami omoni me nkerihi, obila me esiihi vua olimiŋi me eki oyalihi kali.

¹⁴ Nkumu a saabe ama selehe ompa me mpolo e nde. Nde oma mpa me oyalihi bla dia me ewa ma ondihi o bla Krisi zezi.

¹⁵ Dzia mbari e tele ma buuna olehe tari o yo. Ove baari aso adii yo: Krisi zezi ayi o yula ntsie na vusuha asi ma ambiini. Me mvuuru a ntsomi o mpaniŋi e bo.

¹⁶ Ŋa yuhu amoni me nkerihi, mo bu ndi o me, mvuuru a ntsomi Krisi zezi olaha maami a nde ma ave aso mva lemihi mo laha na baari ma adze oyalaha nde aso, bo ma adze obaha lebihi le mbumbu.

¹⁷ Nkani esibi na esibi, Ndziami ali i kua ni, ma ali i mono ni nde ni omo otu, ove bla lekuma leka ma esibi eso. Amene.

¹⁸ Muana a me Timote mono dzandza e me empa we, yo oma ka mva mbari awobi ma toosi kala kala o we. Mo bu ndi, mbari dzia empa we mpari we odzuana ngru e mve.

¹⁹ Bla oyalihi na etsimiŋi ma eve. Baari ake ama bisa mbari, bo se ama bisa eyisihi ma eve. Bo ama biisa oyalihi o bo.

²⁰ O ntsa bo eli na Imene bla Aleksandre. Me ema mpa bo na Sata, mo bu ndi bo i matuha Ndziami ni.