Loma 3 - Gandja na Mbɨa

Ebhe ndʉ ’kpɨ́ hana bedhe ngʉ́ namene engʉ́ ɨnde anɨ apa me nɨ améne e-o

¹ Ɨ dʉ me a nde mo-o, ta nadʉ ne maYuda ne nɨ? Nalɨ gandja ngateteke kpála lele pɨ?

² Ndʉ ’ngʉ́ bhomʉ-o hana bha ndjɨndjɨ! Ebhe ambamba ngaɨza nanɨ ta engʉ́ gba e pɨ uo omaYuda.

³ A na paká me okpála koko bhʉ́ ká uo kpata nanɨ ongʉ́ lɨ Ebhe apa e ne bua bini-e de. La-a, Ebhe amene bha naae engʉ́ ɨnde anɨ apa nanɨ me nɨ améne e pɨ uo-o.

⁴ Abana lɨ ndʉ okpála hana dʉ bha ne obhʉlʉ eu-o, Ebhe papa bha naae kʉkʉlʉ ’ngʉ́. A maka u aye lɨe bhʉ́ Bhuku gba anɨ-e me: «Ngamʉ Ebhe, nedhɨnga mʉ ngagama ’ngʉ́ lɨe, ndʉ okpála hana ngambɨla me mʉ ne ngbili kpála . Ɨ dʉ di me u nde anʉ ne mʉ gba okpála nakodho ’ngʉ́-o, u ú ehe ɨnde ayo me u holo mʉ lɨ e belegʉ de bini.»

⁵ Ma gama nga ’ngʉ́ nakpata lele maka okpála-kʉtɨ agagama ’ngʉ́ lɨe. Nedhɨnga koko, okpála koko pá me siti ’ngʉ́ nɨ́ ngamene e ngateteke okpála ngʉ́ nambɨla me Ebhe ne ngbili kpála. U pa mo-o, nɨ́ gíe pɨ uo mangua ’ngʉ́ dho? Nɨ́ gíe pɨ uo me a ko paká, Ebhe ne ngbili kpála, anga anɨ ngao mangɨmbo pɨ́ ’ndjɨ nɨ́ ade.

⁶ Ebhe bha ndʉ ’kpɨ́ hana ne ngbili kpála, anɨ ngakodho ’ngʉ́ gba okpála na doto kaka.

⁷ Engʉ́ bini, okpála koko tɨ da napa me eu o ngapa e ngagbe kʉkʉlʉ ’ngʉ́ gba Ebhe bhʉ́ mbasʉ, a di ngaha sangu pɨ anɨ. A ko la nɨ lɨ Ebhe ngao ’ngʉ́ lɨe pɨ́ o mʉgɨto me o ne osisiti okpála?

⁸ Okpála koko ngasobho ya. U ngapa lɨ ya me ya apa me: «Nɨ́ mene siti ’ngʉ́, amba nɨ́ u lele bádha ’ngʉ́ ɨnde akóto bhʉ́bhʉ́-o.» Ebhe ao mangɨmbo pɨ́ okpála bhomʉ-o ao. U atɨ la bhadi ne di.

Ndʉ okpála hana ngamene siti ’ngʉ́

⁹ Nganɨ́ omaYuda-a, nɨ́ belegʉ bhʉ́ djila Ebhe ngbéngbé ade da nane opiga koko. Ma apa ɨgɨnɨ apa me ndʉ nɨ́ okpála hana nɨ́ sa lɨ́lɨ gba siti ’ngʉ́.

¹⁰ A maka u aye lɨe bhʉ́ Bhuku gba Ebhe-e me: «Ngbili kpála ade, belegʉ de bini.

¹¹ Kpála ɨnde ngakɵ mboli ’ngʉ́ ade, kpála ɨnde ngagɨlɨ Ebhe-e belegʉ ade bini.

¹² Ndʉ okpála hana ao ká kpadjɨ gba Ebhe-e ao, ndʉ uo hana angɨta. Kpála ɨnde ngamene bádha ’ngʉ́-o ade, belegʉ de bini!

¹³ Tangʉlʉ uo mana lata ɨnde lɨ ’bhɵ e nde bábá. ’Mi uo ngapa ’ngʉ́ napite okpála. Eli ɨnde ngaze bhʉ́ ’bhɵ uo mana sɨlɨ kpʉlʉ ɨnde ngabhili okpála.

¹⁴ U ngatʉ pɵdjɵ lɨ okpála ndʉ ’kpɨ́ hana ne ’bhɵ o, u di ngapa oeli na sʉsʉ pɨ uo.

¹⁵ U ngagu holo ne angu o hana ngʉ́ nanʉ nabhili okpála.

¹⁶ Ndʉ bɨlɨ u ngapʉ lɨ e hana-a, u ngasiti ohe, u di ngato mbolo lɨ okpála.

¹⁷ U mbɨla kpadjɨ na guo ’ngʉ́ de.

¹⁸ Tsʉlʉ Ebhe bhʉ́ uo belegʉ ade bini.»

¹⁹ Nɨ́ mbɨla hana me ndʉ ’ngʉ́ ɨnde u aye e bhʉ́ lɨ́lɨ-e hana, u aye pɨ okpála ɨnde lɨ Ebhe aha nanɨ lɨ́lɨ ango-o pɨ o-o. Ebhe amene mo-o ngʉbula nagbite ’bhɵ ndʉ okpála hana ne napa me nɨ o mangɨmbo pɨ́ ’ndjɨ ndʉ uo hana.

²⁰ Padhá de, anga kpála bini belegʉ ade ɨnde ɨ tɨ da nakoto ngbili kpála kala Ebhe ka namene lɨ́lɨ-o. Kulu gba lɨ́lɨ-e bha bini ne nateteke okpála ngʉ́ nambɨla me siti ’ngʉ́ ngae dho-ie.

Kpála ngakolo ngbingbili bhʉ́ djila Ebhe ka nabhuka

²¹ Mbɨa ɨnde-e, Ebhe apana kpadjɨ ɨnde ngamene lɨe me okpála kolo ngbingbili kala nɨ-o. Kpadjɨ ango-o kpi, a koto lɨ lɨ́lɨ de. Obhuku na olɨ́lɨ di ne obhuku gba opolofeta apa nanɨ engʉ́ ango-o kalanʉ.

²² Kpadjɨ ango-o me, Ebhe ngao okpála ngbingbili kala e lɨ kpadjɨ nabhuka Yesu Kilisito ka uo-o. Anɨ ngamene mo-o pɨ ndʉ okpála hana ɨnde ngabhuka anɨ-o. Ndʉ uo hana ngasia mʉkobho bha lɨ koli kpadjɨ bini ɨnde gba Yesu Kilisito-o.

²³ Padhá de, anga ndʉ okpála hana amene siti ’ngʉ́, kaka-a, Ebhe bhʉ́ sangu gba e adji ’ngbʉ e lɨ uo adji.

²⁴ Engʉ́ bini, Ebhe bhʉ́ bádha bhʉ́ ’bu gba e amene me u kolo ngbingbili bhʉ́ djila nɨ padhá. Anɨ amene mo-o lɨ kpadjɨ gba Yesu Kilisito ɨnde ngagbegbe uo sakpa siti-o.

^25-26 Yesu Kilisito ne kpála ɨnde lɨ Ebhe abhʉ e me anɨ kpi mada nɨ́ ka siti ’ngʉ́ gba nɨ́-o. Anɨ tuko ngʉte e ngʉ́ nae siti ’ngʉ́ gba nɨ́-o. Kpadjɨ ango-o Ebhe aleke pɨ okpála bhende abhuka-o. Ebhe amene mo-o ngʉbula me nɨ́ mbɨla me nɨ ne ngbili kpála. Bhʉ́ nedhɨnga na kalanʉ-o, nedhɨnga lɨ okpála adʉ namene siti ’ngʉ́ lɨe, anɨ adʉ ne ’ndjá bua pɨ uo, anɨ adʉ atsia siti ’ngʉ́ ɨnde u adʉ amene e mʉgɨto me anɨ u de. Bhʉ́ nedhɨnga na mbɨa ɨnde-e, anɨ ngasuno me nɨ ne ngbili kpála. Kaka-a, anɨ ao ndʉ okpála hana ɨnde abhuka Yesu-o me u dʉ ngbingbili bhʉ́ djila nɨ.

²⁷ Ɨ nde lɨe mo-o, engʉ́ bini belegʉ ade ɨnde ɨ tɨ da naha ’ngbé ’ndjɨ pɨ nɨ́. Ka nɨ? Anga ehe bhende ane ne engbé-e, a ko matá namene lɨ́lɨ-e de, engʉ́ bini, a ko bha bini nabhuka.

²⁸ Padhá de, anga ya au me kpála-kʉtɨ ngakolo ngbingbili kala Ebhe ka nabhuka gba e. A ko de me anga anɨ amene lɨ́lɨ-e hana-a de.

²⁹ Yi abhundja naayi me Ebhe bha ne Ebhe ka omaYuda? A ko di Ebhe gba okpála ɨnde ne omaYuda ade-e dɨ? A mo-o ade. A ko di Ebhe gba okpála ɨnde ne omaYuda ade-o.

³⁰ Padhá de, anga koli Ebhe bha bini. Anɨ amene me nɨ o omaYuda kala nɨ ngbingbili lɨ kpadjɨ na nabhuka. Anɨ améne bhadi pɨ okpála ɨnde ne omaYuda ade-e moko.

³¹ Ɨ dʉ me a nde mo-o, a kʉnda napa me nɨ́ u ɨbili lɨ́lɨ-e padhá? A mo-o ade, nɨ́ mangbo bhomʉ-o ngao lɨ́lɨ-e bhʉ́ da e.