Zacarías 5 - La'qaatqa ñi qota'olec Qota'olec & Qota'olec Novita Na Qomyipi

Qaiuana aso lere 'ue na lerqaipi

¹ Ca 'ue so liỹa iuanaxanaxac. Seuane'ta aso lere ỹaỹoxontac.

² Ca' so nelaatec piguim le'ec yinat: ¿Negue' só'maq reuanachiqui'? Ca' shinac: Seuane'ta aso lere 'vii naua lerqa, ỹaỹoxonta; nueve metro da ladogaxa chaqai cuatro y medio dá'maq leca'gue.

³ Ca na'le, ca 'naapiguiỹa': Ca' chaqaiyi hueetalec qoỹeretañi dá'maq se no'uen ỹovita nqohin yá'ogue yi 'laua. Ma' chaqaida dá'maq qoỹeretalgoto naua'que naua lahil, ca' cá'maq rocachi loqo'm ca ỹaanec ca la'qaatec nallitalta', qam se ipaguigui ca la'qaatec, ca chaqa'ma' 'ue ca nouaxanaxaset.

⁴ Ñi qara'gaxala' sqaica lqalanec i'taxajñi da la'qaatec: Ỹim selatalo qamiri dajo se no'uen, qaiyi inoxonaugui ca lauo' ca cuataxai chaqai ca lauo' cá'maq ỹaanec ca la'qaatec nallitalta', qam se ipacqajñigui, ỹiquetapigui da ỹeenaxat. Ca dá'maq se no'uen chaqaiyi hueeta'ñi chaqai ỹovireto'o' ma' tot qaica ca niquiaq chaqai ca qa'.

Qaiuana aso naloqojnaxanaxaqui hueetañigui aso 'aalo

⁵ Ime, ca' nqo'neho só'maq piguim le'ec retaqata'pegue' aỹim, ca 'naac: ¡Ñaqai 'ajñite' ñí'maq re'oq ma'le'!

⁶ Ca' senat, shinac: ¿Negue' ñi'maxare? Ca so'maxare 'naac caỹim: Ñi'maxare naloqojnaxanaxaqui, ñí'maq naloqojnaxaqui na lasauaxaset ná'maq neetalec najo 'laua.

⁷ Ca' aso naloqojnaxanaxaqui 'ue aso lapooquete imaañi na quiguiñi. Ca na' qanauasshiguim aso lapooquete, ca 'ue aso 'aalo nqa'xantañi, neetañigui aso naloqojnaxanaxaqui.

⁸ Ca 'naac caỹim só'maq nelaatec piguim le'ec: “Ñijo 'aalo, ñi'maxare chaqaina ná'maq se no'uen.” Ca' pataxañigui asó'maq naloqojnaxanaxaqui, ca ỹapoñigui caso lapooquete quiguiñi.

⁹ Ca na' liỹa ya'ỹa'a, ca' seuane'talo saua dos 'aalo, qam 'vii naua laua' chaqai qaỹamaqate' quena nonot. Naua laua' 'ec naua damec laua', ca ỹoote', qam i'xatete' aso naloqojnaxanaxaqui.

¹⁰ Ca na'le, ca' senat só'maq nelaatec piguim le'ec só'maq setaqata'pegue', shinac: ¿Negue' cá'maq ỹodootegue aso naloqojnaxanaxaqui?

¹¹ Ca so'maxare 'naac caỹim: Taategue da Babilonia, no'xoñishiguim ca no'ueenaxanaxaqui. Ca ma' ỹomate' ca no'ueenaxanaxaqui, ca chaqaiyi illiralec ma'le cá'maq lomala'.