Salmos 98 - La'qaatqa ñi qota'olec Qota'olec & Qota'olec Novita Na Qomyipi

¡Chi ỹovireta'a doxonaxan ñi qara'gaxala'!

¹ ¡'Viiñii ca dalaxaic no'ueenec quiñi qara'gaxala', ma' ñi'maxare chalego loyac dá'maq ỹo'uet! ¡Ma' ỹovireta'a doxonaxana da chalego lecaic lquesaxanaxa da lqai'laxat co'teeta!

² Ñi qara'gaxala' na'le ỹa'xateta'guit quiyim rauegaxan, ñi'maxare re'oq nqai'en dá'maq no'uen lo'ueenataxanaxac, ỹauanchigui nqai'en ná'ogue na ỹoreta'oguit qomyipi quena 'laua;

³ ỹaatqajam se coua'e da le'xorenataxanaxa chaqai da laqamaxa quena llaalqaipi so Israel. ¡Qaiuana quenaua'que naua lahil na 'laua quiyim rauegaxan ñi qota'olec coqomi'!

⁴ Netooñitac 'ueenaxañitalec ñi qota'olec, qamiá'ogue ná'maq ñiitalec na 'laua; ỹaatqajam 'xañite'uegue da netoonaxaguii 'ueenaxañilec queca no'ueenec.

⁵ 'Viiñii ca no'ueenec quiñi qara'gaxala', cuañitegueñi ca lelamaxa aca neviigue leenaxat arpa, cuañitegueñi ca lelamaxa na neviiguellipi 'ue na lequeeteripi.

⁶ Netooñitalec da ro'viiñigui quiñi qara'gaxala' ñí'maq nashi, cuañitapigui da lelamaxa ana npe'te.

⁷ Rauaxan da lelamaxa ana huaaxai chaqai ná'ogue ná'maq hueetañigui, na 'laua chaqai ná'ogue ná'maq hueetalec;

⁸ ỹouaxanta' naua napoquena na lachiuguellipi, chaqai lapoỹata' na quemaralgoto qa' ladocaipi, ca' ỹaualqagui queda netoonaxac,

⁹ reloqoto'ot ñi qara'gaxala' novi' quiyim ỹoiquentac na 'laua. Ñi'maxare ỹoiquentac ma'le na qomyipi quena 'laua, ỹa'maqachiguiñi da lo'ueenataxanaxac, ná'ogue naloqojne'ejta'.